ຂ່າວເດັ່ນ

ອພສ ແຂວງສາລະວັນ ຕີລາຄາການລົງການເຜີຍແຜ່ທຳມະນູນສົງ ແລະ ວຽກງານກຳມາທິການ




ພາຍຫຼັງອົງການພຸດສາດສະໜາສຳພັນລາວ ແຂວງສາລະວັນ ໄດ້ລົງເຜີຍແຜ່ທຳມະນູນສົງລາວ ສະບັບປັບປຸງປີ 2018 ໃຫ້ກັບ ອພສ ເມືອງ 5 ຕົວເມືອງ ຄື: ເມືອງສາລະວັນ, ເລົ່າງາມ, ວາປີ, ລະຄອນເພັງ ແລະ ເມືອງຄົງເຊໂດນ, ພ້ອມທັງໄດ້ມອບກາປະທັບໃຫ້ຫ້ອງການ ອພສ ແຕ່ລະເມືອງ ໄດ້ນຳໃຊ້ເຂົ້າໃນໜ້າທີ່ວຽກງານຂອງສົງ. 

ມາໃນທ້າຍອາທິດຜ່ານມານີ້ ຢູ່ທີ່ວັດໄຕຣພູມ ເມືອງຄົງເຊໂດນ ແຂວງສາລະວັນ ໄດ້ສະຫຼຸບ ແລະ ຕີລາຄາຜົນສຳເລັດໃນການເຜີຍແຜ່ທຳມະນູນສົງ ໂດຍເປັນກຽດເຂົ້າຮ່ວມຂອງ ພຣະຫຼັກຄຳລັດຕະນະຄຸນາຈານ ຍາທ່ານໃຫຍ່ ສອນໄຊ ແກ້ວເມືອງໃຕ້ ກຳມະການສູນກາງ ອພສ, ເຈົ້າຄະນະແຂວງສາລະວັນ, ມີພຣະອາຈານຮອງເຈົ້າຄະນະແຂວງ, 
ຄະນະກຳມາທິການຕ່າງໆຂັ້ນເມືອງ, ແຂວງ ພ້ອມດ້ວຍຫ້ອງການທີ່ກ່ຽວຂ້ອງອ້ອມຂ້າງເມືອງ ເຂົ້າຮ່ວມ.



ໃນພິທີໄດ້ມີການປຶກສາຫາລືຄົ້ນຄວ້າການເຜີຍແຜ່ທຳມະນູນສົງລາວ ສະບັບປັບປຸງປີ 2018, ມີທັງໝົດ 13 ໝວດ, 76 ມາດຕາ ແລະ ຄຳແນະນຳວ່າດ້ວຍການຈັດຕັ້ງປະຕິບັດທັມມະນູນສົງລາວ ກ່ຽວກັບຜູ້ທີ່ຈະເຂົ້າບວດ, ການເອີ້ນຊື່ນຳໜ້າບຸກຄະລາກອນສົງ, ເຄື່ອງໝາຍ, ທຸງ ແລະ ຕາປະທັບ ເພື່ອໃຫ້ມີຄວາມເຂົ້າໃຈຖືກຕ້ອງ, ຊັດເຈນ ແລະ ເປັນເອກະພາບກັນຈັດຕັ້ງປະຕິບັດໃນຂອບເຂດທົ່ວປະເທດ ແລະ ໄດ້ຕີລາຄາສູງຕໍ່ຜົນສຳເລັດໃນການລົງເຜີຍແຜ່ ແລະ ການປະກາດ, ແຕ່ງຕັ້ງກຳມາທິການຕ່າງໆ, ພ້ອມທັງມອບກາປະທັບເຂົ້ານຳໃຊ້ໃນໜ້າທີ່ວຽກງານ, ຊື່ງບັນດາຄະນະກຳມາທິການຕ່າງໆ ກໍ່ປະກອບຄຳຄິດເຫັນ ກ່ຽວກັບການຈັດຕັ້ງປະຕິບັດທຳມະນູນສົງລາວ 



ເພື່ອໃຫ້ເປັນເອກະພາບກັນໃນການຈັດຕັ້ງປະຕິບັດວຽກງານ ໂດຍສະເພາະ 4 ໜ້າວຽກຂອງກຳມາທິການຂັ້ນເມືອງ ຄື: ກຳມາທິການປົກຄອງສົງ ໃນການຄຸ້ມຄອງພຣະສົງໃນຂອບເຂດຄວາມຮັບຜິດຊອບ, ວຽກງານການສຶກສາສົງ, ການເຜີຍແຜ່-ປະຕິບັດກຳມະຖານ, ວຽກງານກຳມາທິການສາທາລະນຸປະການ ກ່ຽວກັບການປະຕິສັງຂອນ ແລະ ການກໍ່ສ້າງວັດວາອາຮາມ. ນອກນັ້ນຍັງຮ່ວມກັນຄົ້ນຄວ້າບັນດາເອກະສານທີ່ສຳຄັນຕ່າງໆ ແລະ ໄດ້ຍົກເອົາບັນຫາການຍ້າຍພຣະສົງ-ສຳມະເນນ ໃຫ້ເປັນລະບົບລະບຽບ ກ່ອນຈະຮັບ ແລະຍ້າຍ ຄວນໄດ້ມີການຕິດຕາມເອກະສານທີ່ກ່ຽວຂ້ອງ, ການບວດ-ການສີກ ຫຼື ຈະເຄື່ອນໄຫວໄປຕ່າງໆປະເທດ ແລະ ອື່ນໆ ຄຽງຄູ່ກັນການເຜີຍແຜ່, ການປະຕິບັດ ແມ່ນຈະໄດ້ມີການຕິດຕາມ, ປະເມີນຜົນການປະຕິບັດທຳມະນູນສົງ ຄຽງຄູ່ກັນໄປ.



ໃນໂອກາດດຽວກັນນັ້ນ, ຍາທ່ານໃຫຍ່ເຈົ້າຄະນະແຂວງສາລະວັນ ກໍ່ໄດ້ກ່າວຈຸດປະສົງໃຫ້ຮູ້ວ່າ: ການເຜີຍແຜ່ທຳມະນູນສົງ ຄັ້ງນີ້ ແມ່ນມີຄວາມໝາຍຄວາມສຳຄັນຫຼາຍຕໍ່ກັບອົງການພຸດທະສາດສະໜາສຳພັນລາວ ແຂວງສາລະວັນ ກໍ່ຄືບັນດາເມືອງ ເປັນການປັບປຸງກົງຈັກທີ່ສຳຄັນໃນການຄຸ້ມຄອງພຣະສົງ ແລະ ບໍລິຫານວຽກງານຕ່າງໆ ໄດ້ຮັບການປັບປຸງໃນດ້ານວິທີການເຮັດວຽກງານຂອງພຣະສົງ ຄຽງຄູ່ໄປກັບການນຳພາຂອງ ພັກ-ລັດ. ນອກນັ້ນຍັງເຮັດໃຫ້ການຈັດຕັ້ງປະຕິບັດວຽກງານ ມີຄວາມເຂັ້ມແຂງ ແລະ ເປັນໄປຢ່າງມີລະບົບລະບຽບ ແນໃສ່ເຕົ້າໂຮມຄວາມສາມັກຄີຂອງພຣະສົງ ກັບ ຍາດໂຍມ ຮູ້ຈັກເຄົາລົບກົດໝາຍບ້ານເມືອງ ແລະ ພຣະສົງ ກໍໍ່ເດີນຕາມຫຼັກພຣະທຳມະ, ວິໄນຂອງສາດສະໜາ. ທັງໄດ້ເນັ້ນໜັກ ຈະສືບຕໍ່ເອົາໃຈໃສ່ຜັນຂະຫຍາຍວຽກງານຕ່າງໆ ທີ່ໄດ້ຮັບການປັບປຸງໃຫ້ທົ່ວສັງຄົມຮັບຮູ້, ເຂົ້າໃຈຢ່າງກວ້າງຂວາງ, ທັງພຣະສົງ ແລະ ອອກຕົນຍາດໂຍມ.

ແບ່ງປັນເລື່ອງນີ້:

Post a Comment


ປະກາດ Pakaad: ຮຽນຮູ້, ແບ່ງປັນ, ສ້າງສັນສັງຄົມ
ຢ່າລືມກົດຕິດຕາມແຟນເພຈ ປະກາດ Pakaad ເພື່ອໄດ້ຮັບຂ່າວສານ ແລະ ສາລະໜ້າຮູ້

ຫາກທ່ານພົບເຫັນຂໍ້ມູນຂ່າວບໍ່ຖືກຕ້ອງ ຫຼື ທ່ານຕ້ອງການສົ່ງຂ່າວຫາທີມງານປະກາດ ສາມາດສົ່ງໄປທາງຂໍ້ຄວາມດ້ານລຸ່ມ



ພິເສດ: ເປັນກໍາລັງໃຈໃຫ້ທີມງານພວກເຮົາ ຢ່າລືມແບ່ງປັນ ແລະ ປະກອບຄໍາຄິດເຫັນດ້ວຍ

 
Copyright © ປະກາດ Pakaad.