ຂ່າວເດັ່ນ

ເສດຖະກິດແຂວງຈໍາປາສັກຂະຫຍາຍຕົວ 8,17% ຕໍ່ປີ.





ການພັດທະນາເສດຖະກິດແຂວງຈໍາປາສັກມີການຂະຫຍາຍຕົວຕົວຢ່າງຕັ້ງໜ້າສະເລ່ຍ 8,17 % ຕໍ່ປີ, ລວມຍອດ ( GDP ) ສະເລ່ຍຕໍ່ຫົວຄົນໄດ້ 3.153 ໂດລາສະຫາລັດ ຕໍ່ຄົນ/ປີ, ໂຄງປະກອບເສດຖະກິດ ຫັນປ່ຽນຕາມທິດທີ່ຕັ້ງໜ້າ : ກະສິກໍາກວມ 23%, ອຸດສາຫະກໍາ ກວມ 24% ແລະ ບໍລິການ ກວມ 54% ຂອງ GDP.

ທ່ານ ບົວສອນ ວົງສອງຄອນ ຮອງເຈົ້າແຂວງໆຈໍາປາສັກໃຫ້ຮູ້ຕື່ມວ່າ: ສາເຫດທີ່ເຮັດໃຫ້ເສດຖະກິດມີການຂະຫຍາຍຕົວ ກໍຍ້ອນການລົງທຶນພາຍໃນ ແລະ ຕ່າງປະເທດ ມີບັນຍາກາດດີຂຶ້ນ ປະຈຸບັນນີ້ ມີ 18 ປະເທດ ມາລົງທຶນຢູ່ແຂວງຈໍາປາສັກ, ມີ 574 ໂຄງການ ແລະ 5 ເຂດເສດຖະກິດ, ມູນຄ່າຕາມການອະນຸມັດ 40.600 ຕື້ກ່ວາກີບ ຫລື ເທົ່າກັບ 5.075 ລ້ານໂດລາສະຫາລັດ,ການຜະລິດເປັນສິນຄ້າ ມີການຂະຫຍາຍຕົວຢ່າງເເຂງແຮງ, ສິນຄ້າສົ່ງອອກຕົ້ນຕໍ ຂອງແຂວງ ແມ່ນຜະລິດກະສິກໍາ ກວມ 95%,


ປະຈຸບັນແຂວງຈໍາປາສັກ ມີ 04 ທ່າແຮງຕົ້ນຕໍທີ່ ໃນການພັດທະນາທີ່ໄດ້ສຸມໃສ່ຄື :
1.ທ່າແຮງທາງດ້ານການຜະລິດກະສິກໍາ (ຜະລິດເພືື່ອຄໍ້າປະກັນສະບຽງອາຫານ ແລະ ຜະລິດເປັນສິນຄ້າ).
2. ທ່າແຮງທາງດ້ານ ການທ່ຽວທ່ຽວທໍາມະຊາດ, ປະຫວັດສາດ ແລະ ວັດທະນະທໍາ.
3.ທ່າແຮງທາງດ້ານ ການຄ້າ, ການລົງທຶນ ແລະ ການບໍລິການທາງຜ່ານ ຕາມແລວທາງເສດຖະກິດຕາເວັກອອກ-ຕາເວັກຕົກ.
4. ທ່າແຮງທາງດ້ານ ອຸດສາຫະກໍາພະລັງງານໄຟຟ້າ ແລະ ບໍ່ແຮ່, ອຸດສາຫະກໍາປຸງແຕ່ງ ຜະລິດຕະພັນກະສິກໍາ.

ເພື່ອພັດທະນາທ່າແຮງດັ່ງກ່າວ ໃຫ້ມີຜົນສໍາເລັດ ແຂວງຈໍາປາສັກ ໄດ້ກໍານົດວິໃສທັດ ແລະ ຍຸດທະສາດຂອງການພັດທະນາເສດຖະກິດ-ສັງຄົມ ຂອງແຂວງແຕ່ນີ້ຮອດປີ 2030 ຄື: ສ້າງແຂວງຈໍາປາສັກ ເປັນຈຸດໃຈກາງທາງດ້ານເສດຖະກິດ-ສັງຄົມ ຂອງພາກໃຕ້ ລາວ, ພັດທະນາການບໍລິການ ທີ່ເປັນຈຸດໃຈກາງທາງຜ່ານ ຕາມແລວເສດຖະກິດຕາເວັນອອກ-ຕາເວັນຕົກ, ພັດທະນາເສດຖະກິດສັງຄົມຂອງແຂວງ ໃຫ້ມີການຂະຫຍາຍຕົວຢ່າງຕໍ່ເນື່ອງ, ໝັ້ນທ່ຽງ, ເຂັ້ມແຂງ ຕາມທິດສີຂຽວ ແລະ ຍືນຍົງ, ປະຊາຊົນຢູ່ດີ,ກິນດີ ມີຄວາມສາມັກຄີປອງດອງເປັນປຶກແຜ່ນ, ພັດທະນານະຄອນປາກເຊ ເປັນສູນກາງທາງດ້ານເສດຖະກິດ-ສັງຄົມ ຂອງພາກໃຕ້, ສ້າງເປັນເມືອງສີຂຽວ, ສະອາດ, ສະຫງົບ, ສະເໜ່ ແລະ ສີວິໄລ.

ພາບ-ຂ່າວ: ເກດສະໜາ ແກ້ວສຸວັນນະແສງ (ວສຈ)

ແບ່ງປັນເລື່ອງນີ້:

Post a Comment


ປະກາດ Pakaad: ຮຽນຮູ້, ແບ່ງປັນ, ສ້າງສັນສັງຄົມ
ຢ່າລືມກົດຕິດຕາມແຟນເພຈ ປະກາດ Pakaad ເພື່ອໄດ້ຮັບຂ່າວສານ ແລະ ສາລະໜ້າຮູ້

ຫາກທ່ານພົບເຫັນຂໍ້ມູນຂ່າວບໍ່ຖືກຕ້ອງ ຫຼື ທ່ານຕ້ອງການສົ່ງຂ່າວຫາທີມງານປະກາດ ສາມາດສົ່ງໄປທາງຂໍ້ຄວາມດ້ານລຸ່ມ



ພິເສດ: ເປັນກໍາລັງໃຈໃຫ້ທີມງານພວກເຮົາ ຢ່າລືມແບ່ງປັນ ແລະ ປະກອບຄໍາຄິດເຫັນດ້ວຍ

 
Copyright © ປະກາດ Pakaad.