ຂ່າວເດັ່ນ

ໄຊຍະບູລີປຶກສາຫາລືການກະກຽມຈັດງານມະຫະກຳບຸນຊ້າງປະຈຳປີ 2020




ກອງປະຊຸມຫາລືການກະກຽມຈັດງານມະຫະກໍາບຸນຊ້າງປະຈຳປີ 2020 ທີ່ແຂວງໄຊຍະບູລີ ໄດ້ຈັດຂື້ນໃນວັນທີ 15ພະຈິກ 2019 ນີ້ຢູ່ທີ່ ຫ້ອງປະຊຸມຫ້ອງວ່າການປົກຄອງແຂວງໄຊຍະບູລີໂດຍການເປັນປະທານຂອງທ່ານ ນາງບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ທັງເປັນຮອງປະທານຈັດງານມະຫະກຳບຸນຊ້າງ ມີບັນດາຫົວໜ້າພະແນກການ , ກົມກອງພ້ອມດ້ວຍນັກທຸລະກິດ, ອົງການຈັດຕັ້ງອ້ອມຂ້າງແຂວງເຂົ້າຮ່ວມ.



ໃນພິທີຜູ້ເຂົ້າຮ່ວມໄດ້ຮັບຟັງຂໍ້ຕົກລົງຂອງທ່ານເຈົ້າແຂວງໄຊຍະບູລີສະບັບເລກທີ 1373 / ຈຂຊຍ. ລົງວັນທີ 8 ພະຈິກ 2019 ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນຳການກະກຽມ ແລະ ຈັດງານມະຫະກຳບຸນຊ້າງໄຊຍະບູລີປະຈຳປີ 2020 ມີທັງໝົດ 27 ທ່ານ, ຄະນະດັ່ງກ່າວມີໜ້າທີ່ໃນການກະກຽມ ແລະ ຈັດງານມະຫະກຳບຸນຊ້າງປະຈຳປີ2020ໃຫ້ສຳເລັດຕາມລະດັບຄາດໝາຍ. ແບ່ງຄວາມຮັບຜິດຊອບໃຫ້ບັນດາຄະນະກຳມະການໃຫ້ລະອຽດ ເພື່ອສະດວກໃນການ ຊີ້ນຳ-ນຳພາ ບັນດາກິດຈະກຳໃຫ້ສຳເລັດ ແຕ່ງຕັ້ງກອງເລຂາຊ່ວຍວຽກປະກອບມີທັງໝົດ 13 ທ່ານສິດ ແລະ ໜ້າທີ່ກອງເລຂາ ແມ່ນຈັດກອງປະຊຸມສ້າງແຜນເຄື່ອນໄຫວຂອງຄະນະຮັບຜິດຊອບຊີ້ນຳການກະກຽມເປັນແຕ່ລະໄລຍະ ເພື່ອລາຍງານຄວາມຄືບໜ້າຂອງບັນດາກິດຈະກຳ ກຳນົດຕາຕະລາງຈັດງານມະຫະກຳບຸນຊ້າງປະຈຳປີ2020, ກະກຽມເຮັດບົດຖະແຫຼງຂ່າວ, ບົດກ່າວຈຸດປະສົງ, ບົດລາຍງານກະກຽມບຸນຊ້າງ, ບົດກ່າວເປີດ, ກ່າວປິດ, ບົດລາຍງານຜົນສຳເລັດການຈັດງານບຸນຊ້າງຄັ້ງທີ 14 ປີ 2020 ອອກແບບເວທີກາງ ພ້ອມທັງປະດັບປະດາໃຫ້ມີຄວາມສວຍງາມ ແລະ ມີຄວາມໝາຍ.



ຄົ້ນຄວ້າ ແລະອອກແບບຂອງທີ່ລະນຶກ, ກຳນົດແຂກພາຍໃນ ແລະ ຕ່າງປະເທດເຂົ້າຮ່ວມງານ, ພ້ອມທັງຮັບຜິດຊອບແຂກພາຍໃນເຊັ່ນ: ແຂກຂັ້ນສຸນກາງ, ແຂກຕ່າງແຂວງ ແລະພາຍໃນແຂວງກຳນົດແລະ ຄົ້ນຄວ້າເຮັດບັດຄ້ອງຄໍ ແຂກ VIP , ແຂກທົ່ວໄປ, ບັດຄະນະກຳມະການ, ບັດຕິດລົດ, ບັດເຊີນ, ກໍານົດປ້າຍຕ້ອນຮັບໂຄສະນາຕ່າງໆພາຍໃນງານ ແລະ ເທດສະບານເມືອງ, ມີສິດແຕ່ງຕັ້ງພະນັກງານຊ່ວຍວຽກເພີ້ມເຕີມຕາມຄວາມເໝາະສົມ ຈາກນັ້ນບັນດາຜູ້ເຂົ້າຮ່ວມ ໄດ້ຮັບຟັງຂໍ້ຕົກລົງວ່າດ້ວຍການແບ່ງຄວາມຮັບຜິດຊອບໃຫ້ຄະນະກະກຽມ ແລະຈັດງານມະຫະກຳບຸນຊ້າງໄຊຍະບູລີປະຈຳປີ 2020 ຮອງເຈົ້າແຂວງໄຊຍະບູລີປະທານຄະນະກະກຽມ ແລະ ຈັດງານມະຫະກຳບຸນຊ້າງຕົກລົງເຫັນດີ ແບ່ງຄວາມຮັບຜິດຊອບໃຫ້ຄະນະກະກຽມແຕ່ລະທ່ານທັງໝົດ 17 ທ່ານແຕ່ລະທ່ານມີຄວາມຮັບຜິດຊອບແຕກຕ່າງກັນເຊັ່ນ:ວຽກລະດົມທຶນ ລາຍຮັບ-ລາຍຈ່າຍ, ຄວາມຄືບໜ້າຂອງວຽກງານຕ່າງໆຂອງບັນດາກິດຈະກຳອອກແບບງານບຸນ, ສິລະປະວັນນະຄະດີ, ຄົ້ນຄວ້າອອກແບບຂອງທີ່ລະນຶກ, ຈັດບ່ອນພັກເຊົາຂອງແຂກ ແລະ ຕິດຕາມແຂກທີ່ຈະມາຮ່ວມຂະບວນຊ້າງ ແລະ ອາຫານຊ້າງ, ປະດັບປະດາ ແລະ ອະນາໄມເທດສະບານເມືອງໃຫ້ມີຄວາມສະອາດສວຍງາມ ຈັດຫາຊ້າງຈຳນວນ 70 ໂຕ, ເຝິກແອບກິດຈະກຳການສະແດງຂອງຊ້າງ, ຈັດບຸບເຟຊ້າງ, ເຄື່ອງໃຊ້ຂອງຄວນຊ້າງ, ເຄື່່ອງປະດັບປະດາຊ້າງ, ຮັກສາສຸຂະພາບຊ້າງ, ຈັດຕັ້ງທາບທາມການປະມູນໃຫ້ໄປຕາມລະບຽບກົດໝາຍ, ການຄູ້ມຄອງລາຄາສິນຄ້າຕ່າງໆຢູ່ຕະຫຼາດ ແລະ ສະຖານທີ່ຈັດງານ, ແຜນປ້ອງກັນບຸນໃຫ້ມີຄວາມສະຫງົບ ແລະ ເປັນລະບຽບຮຽບຮ້ອຍ, ຈັດຫາພິທີກອນ, ນັກຂ່າວ ຖ່າຍທອດສົດໂທລະພາບ, ຄູ້ມຄອງລາຄາບ້ານພັກ ແລະ ໂຮງແຮມ, ກຳນົດບ່ອນຈອດລົດ, ກໍ່ສ້າງຂົວຂ້າມນໍ້າຮຸ່ງຊົ່ວຄາວ, ກວດກາຄືນຫ້ອງນໍ້າສະໜາມຫຼວງ, ແລະ ວຽກອື່ນທີ່ກ້ຽວພັນເຖິງງານບຸນດັ່ງກ່າວອີກ.
ຈາກນັ້ນບັນດາຜູ້ເຂົ້າຮ່ວມໄດ້ປະກອບຄຳຄິດຄຳເຫັນຕໍ່ຮ່າງຂໍ້ຕົກລົງຂອງທ່ານເຈົ້າແຂວງປະທານຈັດງານມະຫະກຳບຸນຊ້າງປະຈຳປີ 2020 ເພື່ອໃຫ້ເປັນເອກະພາບກັນ ແລະ ຊີ້ນຳ-ນຳພາ ຈັດຕັ້ງປະຕິບັດໜ້າວຽກທີ່ຖືກແຕ່ງຕັ້ງຮັບຜິດຊອບໃຫ້ປະກົດຜົນເປັນຈິງ ແລະ ການຈັດງານມະຫະກຳບຸນຊ້າງຄັ້ງທີ 14 ປະຈຳປີ 2020 ທີ່ແຂວງໄຊຍະບູລີຈະໄດ້ຈັດຂື້ນໃນວັນທີ 21 – 28 ຂອງເດືອນກຸມພາ 2020 ນິີ້ຄາດວ່າຈະມີຊ້າງເຂົ້າຮ່ວມທັງໝົດ 70 ໂຕ.

ຂ່າວ: ບຸນທີ ແສງຈັນທະລາ.
Medialaos xayaboury


ແບ່ງປັນເລື່ອງນີ້:

Post a Comment


ປະກາດ Pakaad: ຮຽນຮູ້, ແບ່ງປັນ, ສ້າງສັນສັງຄົມ
ຢ່າລືມກົດຕິດຕາມແຟນເພຈ ປະກາດ Pakaad ເພື່ອໄດ້ຮັບຂ່າວສານ ແລະ ສາລະໜ້າຮູ້

ຫາກທ່ານພົບເຫັນຂໍ້ມູນຂ່າວບໍ່ຖືກຕ້ອງ ຫຼື ທ່ານຕ້ອງການສົ່ງຂ່າວຫາທີມງານປະກາດ ສາມາດສົ່ງໄປທາງຂໍ້ຄວາມດ້ານລຸ່ມ



ພິເສດ: ເປັນກໍາລັງໃຈໃຫ້ທີມງານພວກເຮົາ ຢ່າລືມແບ່ງປັນ ແລະ ປະກອບຄໍາຄິດເຫັນດ້ວຍ

 
Copyright © ປະກາດ Pakaad.