ຂ່າວເດັ່ນ

ຄົ້ນພົບວັດຖຸບູຮານຈຳນວນຫລາຍຢູ່ໃນບໍລິເວນ ບໍ່ຄຳ-ທອງ ເຊໂປນ




ບໍ​ລິ​ສັດ ລ້ານ​ຊ້າງ ມິນ​ເນ​ໂຣນ​ສ໌ ລິ​ມິ​ເຕັດ (ບໍ​ລິ​ສັດ ລ​ຊມ​ລ) ໄດ້​ມອບ​ວັດ​ຖຸ​ບູ​ຮານຫຼາຍກວ່າ 7,800 ລາຍ​ການ ທີ່​ເປັນ​ວັດ​ຖຸ​ພັນ​ປະ​ເພດທອງ​ແດງ, ທອງ​ເຫຼືອງ, ​ເຫຼັກ, ​ດິນເບົ້າຫຼໍ່, ​ແກ້ວ​ປະ​ດັບ-ເຈ​ລະ​ໄນ (ເຄື່ອງ​ເອ້-ປະ​ດັບ​ກາຍ), ເຄື່ອງ​ປັ້ນ​ດິນ​ເຜົາ, ​ໄມ້ ​ທີ່ທາງ​ບໍ​ລິ​ສັດ ແລະ ນັກ​ບູ​ຮານ​ນະ​ຄະ​ດີ ໄດ້​ຄົ້ນ​ພົບ​ຢູ່ໃນ​ບໍ​ລິ​ເວນ​ ບໍ່​ຄຳ-ທອງ ​ເຊ​ໂປນ ໃຫ້​ແກ່ລັດ​ຖະ​ບານ. ກາ​ນມອບ​ຮັບ​ໃນ​ຄັ້ງ​ນີ້ ແມ່ນ​ ​ຜົນ​ງານ​ອັ​ນ​ພົ້ນ​ເດັ່ນຂອງ​ບໍ​ລິ​ສັດ ລ​ຊມ​ລ. ທີ່ໄດ້​ໃຫ້​ການ​ສະ​ໜັບ​ສະ​ໜູນ​ໃຫ້​ແກ່ລັດ​ຖະ​ບານ​ ໃນ​ກວ່າ​ໜຶ່ງ​ທົດ​ສະ​ວັດຜ່ານ​ມາ ເພື່ອ​ໃຫ້​​ໄດ້ມີ​ການ​ສຶກ​ສາ​ຄົ້ນ​ຄວ້າ​ທາງ​ດ້ານວັດ​ຖຸບູ​ຮານ ແລະ ​​​ການອະ​ນຸ​ລັກມໍ​ລະ​ດົກ​ວັດ​ທະ​ນະ​ທຳຂອງ​ຊາດ ​​​ໄວ້.



ທ່ານ ສະ​ໝານ ອະ​ເນ​ກາ – ຜູ້​ອຳ​ນວຍ​ການ​ໃຫ​ຍ່ ໄດ້ເປັນ​ຜູ້ຕາງ​ໜ້າ​ໃຫ້​ບໍ​ລິ​ສັດ​ ລ​ຊມ​ລ ​ໃນ​ການມອບ​ວັດ​ຖະ​ບູ​ຮານດັ່ງ​ກ່າວ​ ໃຫ້​ແກ່ ທ່ານ​ນາງ ວັນ​ເພັງ ແກ້ວ​ປັນ​ຍາ – ຜູ້​ອຳ​ນວຍ​ການຫໍ​ພິພິ​ດ​ທະ​ພັນ​ແຫ່ງ​ຊາດ; ທ່ານ ນາ​ລາ​ທິ​ເວດ ອຳ​ມະ​ລາ​ທິ​ທາ​ດາ – ຜູ້​ອຳ​ນວຍ​ການ​ຫໍ​ພິ​ພິ​ດ​ທະ​ພັນ​ແຂວງ​ສະ​ຫວັນ​ນະ​ເຂດ; ແລະ ທ່ານ​ນາງ ຕຸ້ຍ​ທອງ ແກ້ວ​ວົງ​ສາ – ຫົວ​ໜ້າ​ຫ້ອງ​ການຖ​ະ​ແຫຼງ​ຂ່າວ, ວັດ​ທະ​ນະ​ທຳ ແລະ ການ​ທ່ອງ​ທ່ຽວ​ເມືອງວິ​ລະ​ບູ​ລີ.

ໃຫ້​ກຽດ​ເປັນ​ສັກ​ຂີ​ພິ​ຍານໃນ​ພິ​ທີມອບ-ຮັບ ໂດຍ: ທ່ານ ບົວ​ເງິນ ຊາ​ພູ​ວົງ – ຮອງ​ລັດ​ຖະ​ມົນ​ຕີ ກະ​ຊວງ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ; ທ່ານ ຄຳ​ພູນ ຕຸ​ໄພ​ທູນ – ຮອງ​ເຈົ້າ​ແຂວງໆ​ສະ​ຫວັນ​ນະ​ເຂດ ພ້ອມ​ດ້ວຍ​ຜູ້​ຕາງ​ໜ້າ​ຈາກພາກ​ສ່ວນ​ລັດ​​, ​ພະ​ແນກ​ການ​ຂອງແຂວງ ແລະ ເມືອງ ​ທີ່​ກ່ຽວ​ຂ້ອງ.

ວັດ​ຖຸ​ບູ​ຮານ ທີ່​ໄດ້​​ມອບ-ຮັບໃນ​ຄັ້ງ​ນີ້, ຈະ​ໄດ້​ນຳ​ໄປວາງ​ສະ​ແດງ ຢູ່​ທີ່ຫໍ​ພິ​ພິດ​ທະ​ພັນ​ແຫ່ງ​ຊາດ (​ຈຳ​ນວນ 828 ລາຍ​ການ), ​ຫໍ​ພິ​ພິ​ດ​ທະ​ພັນ​ແຂວງ​ສະ​ຫວັນ​ນະ​ເຂດ (​ຈຳ​ນວນ 409ລາຍ​ການ) ແລະ ຫໍ​ວັດ​ທະ​ນະ​ທຳ​ເມືອງວິ​ລະ​ບູ​ລີ (​ຈຳ​ນວນ 6,644 ລາຍ​ການ).

ທ່ານຮອງ​ລັດ​ຖະ​ມົນ​ຕີ ກະ​ຊວງ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ການ​ທ່ອງ​ທ່ຽວ ໄດ້​ກ່າວໃຫ້​ຄວາມ​ໝາຍ​ສຳ​ຄັນ​ຕໍ່​ພິ​ທີ​ມອບ-​ຮັບ ​ວ່າ: “​ການ​ຈັດ​ຕັ້ງ​ປະ​ຕິ​ບັດ​ບົດ​ບັນ​ທຶກ​ຄວາມ​ເຂົ້າ​ໃຈ (MoU ທັງ​ສາມ​ສະ​ບັບ) ​ໄດ້​ກາຍ​ເປັນ​ຜົນ​ງານ​ອັນ​ດີ​ເດັ່ນ ​ທີ່​ເຕັມ​ໄປ​ດ້ວຍ​ຢາດ​ເຫື່ອ ທີ່​ທາງ​ບໍ​ລິ​ສັດ ແລະ ​ທຸກ​ພາກ​ສ່ວນກ່ຽວ​ຂ້ອງໄດ້​ທຸ້ມ​ເທ​ທັງແຮງ​ກາຍ-ແຮງໃຈ ແລະ ການ​ມີ​ສ່ວນ​ຮ່ວມ​ຂອງ​ທຸກ​ພາກ​ສ່ວນ​ ທີ່​ກ່ຽວ​ຂ້ອງ ຢ່າງ​ເປັນ​ເຈົ້າ​ການ ແລະ ດ້ວຍ​ຄວາມ​ຮັບ​ຜິດ​ຊອບ​ສູງ​”

“ນອກ​ຈາກ ການ​ໄດ້​ມາຊຶ່ງ​ເຄື່ອງວັດ​ຖຸ​ບູ​ຮານ​ ໂດຍ​ຜ່ານ​ຂະ​ບວນ​ການສຶກ​ສາ-ຄົ້ນ​ຄວ້າ ທີ່​ຖືກ​ຕ້ອງ​​ທາງດ້ານວິ​ຊາ​ການ, ລະ​ບຽບການ​ຂອງ​ບໍ​ລິ​ສັດ ລ​ຊມ​ລ​ ແລະ ສອດ​ຄ່ອງ​ຕາມ​ລະ​ບຽບ​ກົດ​ໝາຍ ແລ້ວ, ພວກ​ເຮົາ​ກໍ​ຍັງ​ໄດ້​ຮູ້​​ເຫັນ​​ຂໍ້​ມູນ​ ທີ່​ສຳ​ຄັນ​ທາງ​ດ້ານ​ປະ​ຫວັດ​ສາດ ແລະ ຄວາມ​ເປັນ​ມາ​ທາງ​ດ້ານ​ມໍ​ລະ​ດົກວັດ​ທະ​ນະ​ທຳ ​ຢ່າງ​ມີ​ວິ​ທະ​ຍາ​ສາດ ທີ່​ໄດ້​ສະ​ທ້ອນ​ໃຫ້​ເຫັນຮູບ​ການ​ທາງ​ດ້ານເສດ​ຖະ​ກິດ-ສັງ​ຄົມໃນ​ອະ​ດີດ​ ໂດຍ​ສະ​ເພາະ​ແມ່ນ​​ດ້ານ​ໂລ​ຫະ​ກິດ ແລະ ການ​ຄ້າ​ໃນ​ສະ​ໄໝ​ບູ​ຮານ ເຊິ່ງ​ບໍ່​ພຽງ​ແຕ່​​ໄດ້ມີ​ຊື່​ສຽງ​ໃນ​ລະ​ດັບ​ທ້ອງ​ຖິ່ນ (ເມືອງວິ​ລະ​ບູ​ລີ, ແຂວງ​ສະ​ຫວັນ​ນະ​ເຂດ) ຫຼື ໃນລະ​ດັບ​ຊາດ​ເທົ່າ​ນັ້ນ ແຕ່​ຫາກ​ຍັງ​ໄດ້​ມີ​ຊື່​ສຽງ​ໃນ​ລະ​ດັບ​ພາກ​ພື້ນ ນຳ​ອີກ​ດ້ວຍ.”

ນັບ​​ແຕ່​ປີ 2008 ເປັນ​ຕົ້ນ​ມາ, ບໍ​ລິ​ສັດ ລ​ຊມ​ລ ໄດ້​ລົງ​ທຶນກວ່າ 1.3 ລ້ານໂດລາສະຫະລັດ ເຂົ້າໃສ່​ໃນ​ການ​ສະ​ໜັບ​ສະ​ໜູນໃຫ້​ແກ່ການ​ອະ​ນຸ​ລັກ​ມໍ​ລະ​ດົກ​ທາງ​ປະ​ຫວັດ​ສາດ​ ແລະ ວັດ​ທະ​ນະ​ທຳ ​ທີ່​ມີ​ມາ​ດົນກວ່າ 3,000 ປີ ໂດຍຜ່ານ​ການ​ຮ່ວມ​ມື​​ ກັບກົມ​ມໍ​ລະ​ດົກ​, ກະ​ຊວງຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ການ​ທ່ອງ​ທ່​ຽວ; ມະ​ຫາ​ວິ​ທະ​ຍາ​ໄລ​ແຫ່ງ​ຊາດ​ລາວ ແລະ ມະ​ຫາ​ວິ​ທະ​ຍາ​ໄລ ​ເຈມ​ສ໌​ຄຸກ ​ຂອງປະ​ເທດອົດ​ສະ​ຕ​ຣາ​ລີ.
ການ​ຮ່ວມ​ມື​ດັ່ງ​ກ່າວ ​ໄດ້ສະ​ໜັບ​ສະ​ໜູນ​ວຽກ​ງານ​ພາກ​ສະ​ໜາມ ​ທີ່​ມີ​ລັກ​ສະ​ນະ​ພິ​ເສດ​ໃນ​ລະ​ດັບ​ຊຸມ​ຊົນ​ທ້ອງ​ຖິ່ນ, ລະ​ດັບປະ​ເທດ ແລະ ສາ​ກົນ ຊຶ່ງ​ໄດ້​ມີອາ​ສາ​ສະ​ໝັກທີ່​ເປັນ​ນັກ​ສຶກ​ສາຈາກນະ​ຄອນຫຼວງວຽງ​ຈັນ, ຊຸມ​ຊົນ​ທ້ອງ​ຖິ່ນ, ປະ​ເທດອົດ​ສະ​ຕ​ຣາ​ລີ​, ນັກ​ບູ​ຮານ​ຄະ​ດີ, ແລະ ເຈົ້າ​ໜ້າ​ທີ່​ຈາກ​ກົມ​ມໍ​ລະ​ດົກປະ​ຈຳ​ຢູ່ບໍ່​ຄຳ-ທອງ ​ເຊ​ໂປນ ໄດ້ຮ່ວມ​ມື​ກັນ​ຢ່າງ​ໃກ້​ຊິດ ໃນ​ວຽກ​ງານ​ສຶກ​ສາ​-ຄົ້ນ​ຄວ້າ​ ທີ່​ກ່ຽວ​ຂ້ອງ ແລະ ​ໄດ້​​​ພົບເຫັນ​​ວັດ​ຖຸ​ບູ​ຮານ ​ທີ່ສຳ​ຄັນຫຼາຍໆ​ຢ່າງ ຢູ່​ທີ່​ບໍ່​ຄຳ-ທອງ ​ເຊ​ໂປນ, ​ເມືອງວິ​ລະ​ບູ​ລີ, ແຂວງ​ສະ​ຫວັນ​ນະ​ເຂດ.

ໃນເດືອນ ມີ​ນາ 2018, ທີມ​ງານ​ນັກ​ບູ​ຮານ​ຄະ​ດີ ໄດ້​ຄົ້ນ​ພົບຫຼັກ​ຖານ ທີ່​ເປັນໄມ້​ຄ້ຳ-​ກັນ​ພັງ ຢູ່ໃນຂຸມ​ສ້າງ​ບໍ່​ແຮ່​ທອງ ໃນ​ສະ​ໄໝ​ບູ​ຮານ ຫຼາຍກວ່າ 200 ​ຂຸມບໍ່ ທີ່​ມີ​ອາ​ຍຸຫຼາຍ​ກວ່າ 3,000 ປີ​ກ່ອນ. ​​ການ​ຄົ້ນ​ພົບ​​ໃນ​ຄັ້ງນີ້ ໄດ້ເຮັດ​ໃຫ້ເມືອງວິ​ລະ​ບູ​ລີ ​ໄດ້​ກາຍເປັນ​ໜຶ່ງ​ໃນ​ເຂດ ​ທີ່​ມີ​ການ​ຄົ້ນ​ພົບ​ຮ່ອງ​ຮອຍ​ການ​ຂຸດ​ຄົ້ນບໍ່​ແຮ່ ແລະ ​ສະ​ຖານ​ທີ່​ໂລ​ຫະ​ກິດ ຢູ່​ໃນ​ຂົງ​ເຂດ​ພາກ​ພື້ນ​ອາ​ຊີ​ຕາ​ເວັດ​ນ​ອອກ​ສ່ຽງ​ໃຕ້​​ໃນຍຸກ​ກ່ອນ​ປະ​ຫວັດ​ສາດ ທີ່​ຫາ​ໄດ້​ຍາກ. ພວກ​ເຮົາ​ເຊື່ອ​ວ່າ ການ​ຂຸດ​ຄົ້ນ-ປຸງ​ແຕ່ງ​ແຮ່​ທາດ ໃນ​ສະ​ໄໝ​ບູ​ຮານ​​ຢູ່ໃນ​ຂົງ​ເຂດ​ບໍ່​ຄຳ-ທອງ ​ເຊ​ໂປນ ແຫ່ງ​ນີ້ ແມ່ນ​ໄດ້​ສືບ​ຕໍ່​ປະ​ຕິ​ບັດ​ກັນ​​ມາຈົນ​ເຖິງ​ປະ​ມານ 1,300 ປີ​ກ່ອນ (​ກໍຄື: ຈົນ​ຮອດ ຄ.ສ 700) ເຊິ່ງ​ ເປັນ​ໄລ​ຍະ​ທີ່ ຜູ້​ຄົນ​ໄດ້​ຂຸດ​ຄົ້ນ-ຫຼໍ່ຫຼອມ​ແຮ່​ທອງ ​ທີ່​ອຸ​ດົມ​ສົມ​ບູນ ຢູ່ໃນຈຸດ ​’ເປີ້ນ​ເບົ້າຫຼໍ່’ ແລະ ຢູ່​ທີ່ ‘ທົ່ງ​ນາ​ເງືອກ’ ແລ້ວ​ໄດ້​ນຳ​​ໄປ​ແລກ​ປ່ຽນ-ຊີ້​ຂາຍ​ກັນຕໍ່​ໄປ. ການ​ສັນ​ນິ​ຖານ​ນີ້ ແມ່ນ​ໄດ້​ມາ​ຈາກ​ຜົນ​ການ​ວິ​ໃຈເມັດ​ຖ່ານ (”ກາກບອນ 14”) ​ຈາກ​ຝາ​ກະ​ແຕະ​ໄມ້​ໄຜ່​ ທີ່ນັກ​ບູ​ຮານ​ນະ​ຄະ​ດີ ​ໄດ້​ເກັບ​ເອົ​າ​ຕົວ​ຢ່າງ​ມາຈາກ​ຊາກ​ຕະ​ກອນ​ ​ທີ່​ຢູ່​ເລິກ​ເຖິງ 10 ຫາ 40 ແມັດ ໃນຫລຸມ​ບໍ່​ແຮ່ຂອງ​ຄົນ​ບູ​ຮານ.

ວັ​ດ​ຖຸ​ບູ​ຮານ​ອື່ນໆ​ທີ່​ຄົ້ນ​ຄົບ​ໃນ​ບໍ​ລ​ບິ​ເວນ​ນີ້ ​ແມ່ນລວມ​ມີ: ອຸ​ປະ​ກອນ​ນຳ​ໃຊ້​ໃນ​ການ​ຂຸດ​ຄົ້ນ​ແຮ່​ ເຊັ່ນ: ຂັ້ນ​ໄດ​​ໄມ້ກົມ ແລະ ລູກ​ໝາກ​​ລໍ້-​ລ໋ອກ, ໄມ້​ຄ້ຳ, ກະ​ຕ່າ​ໄມ້​ໄຜ່ ແລະ ເຊືອກຫວາຍ; ຄ້ອງ​ບ້າງ​ທອງ​ສຳ​ລິດ​ (ທອງ​ເຫຼືອງ) ຈາກ​ຍຸກ​ທອງເຫຼືອງ ເຊິ່ງວາງ​ສະ​ແດງ​ໄວ້​ຢູ່​ທີ່ຫໍ​ພິ​ພິດ​ທະ​ພັນ​ແຫ່ງ​ຊາດ​ໃນ​ປັດ​ຈຸ​ບັນ; ກ້ອ​ນ​ທອງ, ເຄື່ອງ​ປັ້ນ​ດິນ​ເຜົາ, ກະ​ດິງ​ທອງ​ສຳ​ລິດ, ເຄື່ອງ​ປະ​ດັບ, ເຄື່ອງ​ໃຊ້​ໃນ​ພິ​ທີ​ກຳ​ເສັ້ນ​ໄຫວ້ ແລະ ວັດ​ຖຸ​ບູ​ຮານ​ອື່ນໆ ເຊິ່ງຊີ້​ໃຫ້​ເຫັນ​ວ່າ ປະ​ເທດ​ລາວ​ໃນ​ອະ​ດີດ ເປັນ​ສະ​ຖານ​ປະ​ຫວັດ​ສາດ​ທີ່​ສຳ​ຄັນ​ຍິ່ງ​ໃນ​ຂົງ​ເຂດ​ພາກ​ພື້ນແຫ່ງ​ນີ້.

ທ່ານ ສະ​ໝານ ອະ​ເນ​ກາ, ຜູ້​ອຳ​ນວຍ​ການ​ໃຫ​ຍ່​ ​ບໍ​ລິ​ສັດ ລ​ຊມ​ລ ໄດ້​ກ່າວ​ວ່າ: “ໃນ​ຄະ​ນະ​ທີ່ການມອບ-ຮັບ​ວັດ​ຖຸ​ບູ​ຮານ​ມື້​ນີ້ ​ໄດ້ເປັນ​ນິ​ມິດ​ໝາຍ​ທີ່​ສຳ​ຄັນ​ຍິ່ງ​ຂອງ​ການ​ຮ່ວມ​ມື​ດ້ານ​ການ​ອະ​ນຸ​ລັກປະ​ຫວັດ​ສາດ ແລະ ມໍ​ລະ​ດົກ​ທາງ​ວັດ​ທະ​ນະ​ທຳ, ການ​​ຮ່ວມ​ມືຂອງ​ບໍ​ລິ​ສັດ. ລ​ຊມ​ລ ທາງວຽກ​ງານ​ມໍ​ລະ​ດົກ​ວັດ​ທະ​ນະ​ທຳກໍ​ຍັງ​ບໍ່​ໄດ້​ຊິ້ນ​ສຸດ​ລົງເທື່ອ. ​ໝາຍ​ຄວາມ​ວ່າ: ​ບໍ​ລິ​ສັດ. ລ​ຊມ​ລ ​ຍັງໝາຍ​ໝັ້ນ ຈະ​ສືບ​ຕໍ່​ໃຫ້​ການ​ສະ​ໜັບ​ສະ​ໜູນ ແລະ ເຮັດ​ວຽກ​ຢ່າງຄຽງບ່າ​ຄຽງ​ໄຫຼ່​​-​ໄກ້​ຊິດ-ສະ​ໜິດ​ແໜ້ນ ກັບ​ຄູ່​ຮ່ວມ​ງານ​ຈາກ​ທາງ​ພາກ​ລັດ​​ຂອງ​ພວກ​ເຮົາ ​ຕໍ່​ໄປ​ອີກ​ 10 ປີ ​ເປັນ​ຢ່າງ​ນ້ອຍ! ຫຼື ຈົນ​ກວ່າ ບໍ່​ແຮ່​ເຊ​ໂປນ ຈະ​ປິດ​ລົງ.”

ການ​ຄົ້ນ​ພົບ​ຂຸມ​ຂຸດ​ຄົ້ນ​ບໍ່​ແຮ່-ບູ​ຮານ ​ສະ​ແດງ​ໃຫ້​ເຫັນ​ວ່າ: ບໍ່​ແຮ່ໄດ້ເປັນ​ປັດ​ໃຈ​ອັນ​ສຳ​ຄັນ ​ໃນ​ການ​ພັດ​ທະ​ນາ​ຊຸມ​ຊົນ ແລະ ສັງ​ຄົມ ມາ​ແຕ່​​ປະ​ຫວັດ​ສາດ. ​ໃນ​ຄະ​ນະ​ທີ່ການ​ຂຸດ​ຄົ້ນ​ບໍ່​ແຮ່ ຍັງ​ຈະ​ດຳ​ເນີນ​ຕໍ່​ໄປ, ພວກ​ເຮົາຫວັງ​ວ່າ ຈະ​ໄດ້​ມີ​ການເຜີຍ​ແຜ່​ການ​ຄົ້ນ​ພົບ​ ທີ່​ໜ້າ​ຕື່ນ​ເຕັ້ນ​ກວ່າ​ເກົ່າ ທາງ​ດ້ານ​ມໍ​ລະ​ດົກວັດ​ທະ​ນະ​ທຳ ແລະ ປະ​ຫວັດ​ສາດ​ລາວ ​ໄດ້ຕື່ມ​ໄປ​ອີກ​ຕໍ່ໆ​ໄປ.




ແບ່ງປັນເລື່ອງນີ້:

Post a Comment


ປະກາດ Pakaad: ຮຽນຮູ້, ແບ່ງປັນ, ສ້າງສັນສັງຄົມ
ຢ່າລືມກົດຕິດຕາມແຟນເພຈ ປະກາດ Pakaad ເພື່ອໄດ້ຮັບຂ່າວສານ ແລະ ສາລະໜ້າຮູ້

ຫາກທ່ານພົບເຫັນຂໍ້ມູນຂ່າວບໍ່ຖືກຕ້ອງ ຫຼື ທ່ານຕ້ອງການສົ່ງຂ່າວຫາທີມງານປະກາດ ສາມາດສົ່ງໄປທາງຂໍ້ຄວາມດ້ານລຸ່ມ



ພິເສດ: ເປັນກໍາລັງໃຈໃຫ້ທີມງານພວກເຮົາ ຢ່າລືມແບ່ງປັນ ແລະ ປະກອບຄໍາຄິດເຫັນດ້ວຍ

 
Copyright © ປະກາດ Pakaad.