ຂ່າວເດັ່ນ

ສະພາຄົ້ນຄວ້າ ຮ່າງກົດໝາຍ ວ່າດ້ວຍການຄຸ້ມຄອງໄພພິບັດ


ການດຳເນີນກອງປະຊຸມສະໄໝສາມັນເທື່ອທີ 7 ຊອງສະພາແຫ່ງຊາດ ຊຸດທີ 8 ທີ່ຫໍປະຊຸມສະພາແຫ່ງຊາດຫຼັກ 6 ນະຄອນຫຼວງວຽງຈັນ, ໃນຕອນເຊົ້າວັນທີ 24 ມິຖຸນາ 2019 ໂດຍການເປັນປະທານຂອງ ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ.



ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ສະເໜີຮ່າງກົດໝາຍວ່າດ້ວຍການຄຸ້ມຄອງໄພພິບັດ ເຊິ່ງເປັນກົດໝາຍສ້າງໃໝ່, ປະກອບດ້ວຍ 10 ພາກ, 8 ໝວດ ແລະ 76 ມາດຕາ. ໂດຍເວົ້າເຖິງການປ້ອງກັນ, ຄວບຄຸມ ແລະ ການຟື້ນຟູໄພພິບັດ, ການປ້ອງກັນໄພພິບັດ, ການຊ່ວຍເຫຼືອ, ຄວາມຮັບຜິດຊອບຂອງລັດ, ຂອງຊຸມຊົນ ແລະ ການມີສ່ວນຮ່ວມຂອງສັງຄົມ, ສິດ ແລະ ພັນທະຂອງຜູ້ປະສົບໄພພິບັດ, ກອງທຶນຄຸ້ມຄອງໄພພິບັດ ແລະ ເນື້ອໃນສຳຄັນອື່ນໆ.



ທ່ານ ຄຳແພງ ໄຊສົມແພງ ໄດ້ຊີ້ໃຫ້ເຫັນວ່າ ເຫດຜົນ ແລະ ຄວາມຈຳເປັນຂອງການສ້າງຮ່າງກົດໝາຍວ່າດ້ວຍການຄຸ້ມຄອງໄພພິບັດ ເພື່ອເຮັດໃຫ້ວຽກງານນີ້ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ປະສິດທິຜົນ ແລະ ທັນສະໄໝ, ແນ່ໃສ່ເຝົ້າລະວັງ ຫຼຸດຜ່ອນຜົນກະທົບທີ່ເກີດຈາກໄພພິບັດຕໍ່ສຸຂະພາບ, ຊີວິດ, ຊັບສິນຂອງລັດ, ລວມໝູ່, ປະຊາຊົນ, ສິ່ງແວດລ້ອມ ແລະ ໂຄງລ່າງພື້ນຖານ ພ້ອມທັງບູລະນະ ແລະ ກໍ່ສ້າງຄືນໃໝ່ ຫຼັງໄພພິບັດ ແລະ ຄວາມຈຳເປັນອື່ນໆ.



ຈາກນັ້ນ ປະທານກອງປະຊຸມໄດ້ໃຫ້ທິດຊີ້ນຳໃນການປະກອບຄຳເຫັນໃສ່ຮ່າງກົດໝາຍ ວ່າດ້ວຍການຄຸ້ມຄອງໄພພິບັດຂອງສະມາຊິກສະພາແຫ່ງຊາດ, ໂດຍເນັ້ນໜັກໃສ່ຊື່ຂອງຮ່າງກົດໝາຍສະບັບນີ້ວ່າ ສອດຄ່ອງເໝາະສົມ ຫຼື ບໍ່, ເນື້ອໃນຂອງມາດຕາຕ່າງໆ ເປັນຕົ້ນມາດຕາ 4 ເວົ້າເຖິງນະໂຍບາຍຂອງລັດກ່ຽວກັບວຽກງານຄວບຄຸມໄພພິບັດ, ມາດຕາ 15 ການປະເມີນຄວາມສ່ຽງ, ມາດຕາທີ 18 ການແຈ້ງເຕືອນໄພລ່ວງໜ້າ, ມາດຕາທີ 29 ມາດຕາການຄວບຄຸມໄພພິບັດ ແລະ ມາດຕາອື່ນໆມີຄວາມເໝາະສົມຮັດກຸມແລ້ວບໍ.

ທ່ານ ນາງ ບົວຄຳ ທິບພະວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 1 ນະຄອນຫຼວງວຽງຈັນປະກອບຄຳຄິດເຫັນໃສ່ມາດຕາທີ 25 ເວົ້າເຖິງການປະເມີນຜົນເສຍຫາຍ ແລະ ຄວາມຕ້ອງການຮີບດ່ວນໃນເບື້ອງຕົ້ນ, ມາດຕາທີ 29 ມາດຕະການຄວບຄຸ້ມໄພພິບັດ ແລະ ມາດຕະການອື່ນໆທີ່ເຫັນວ່າ ຍັງມີບາງຄຳສັບ, ບາງປະໂຫຍກບໍ່ທັນມີຄວາມໝາຍຊັດເຈນ ແລະ ຮັດກຸມເທົ່າທີ່ຄວນ.





ທ່ານ ບຸນປັນ ດວງລາຕີ ສະມາຊິກສະພາແຫ່ງຊາດ ເຂດເລືອກຕັ້ງທີ 12 ແຂວງຄຳມ່ວນ ປະກອບຄຳເຫັນກ່ຽວກັບ ການຕັ້ງຊື່ກົດໝາຍສະບັບນີ້ຄວນໃສ່ຄຳວ່າ ກົດໝາຍວ່າດ້ວຍການຄວບຄຸມໄພພິບັດ ແທນຄຳວ່າ ກົດໝາຍວ່າດ້ວຍການຄຸ້ມຄອງໄພພິບັດ, ກ່ຽວກັບມາດຕາທີ 6 ເວົ້າເຖິງພັນທະຂອງພົນລະເມືອງລາວ, ມາດຕາ 17 ການປົກປ້ອງຕອບໂຕ້ໄພພິບັດ, ມາດຕາ 33 ການດຳເນີນການຟື້ນຟູເຖິງຈຸດໄພພິບັດ ແລະ ມາດຕາອື່ນໆ, ໂດຍສະເໜີໃຫ້ປ່ຽນບາງຄຳສັບໃນບາງປະໂຫຍກໃຫ້ມີຄວາມໝາຍຈະແຈ້ງ, ຮັດກຸມກວ່າເກົ່າ.

ພາຍຫຼັງສະມາຊິກສະພາແຫ່ງຊາດຈາກເຂດເລືອກຕັ້ງຕ່າງໆ ຫຼາຍທ່ານໄດ້ປະກອບຄຳເຫັນໃສ່ຮ່າງກົດໝາຍວ່າດ້ວຍການຄຸ້ມຄອງໄພພິບັດແລ້ວ, ອະນຸກຳມະການສ້າງຮ່າງກົດໝາຍໄດ້ໃຫ້ຄວາມກະຈ້າງແຈ້ງເພີ່ມຕື່ມກ່ຽວກັບເນື້ອໃນຂອງຮ່າງກົດໝາຍສະບັບນີ້.

ຂຽນຂ່າວ: ຍືນຍົງ ແກ້ວເວີນໄຊ
Lao National Radio

ແບ່ງປັນເລື່ອງນີ້:

Post a Comment


ປະກາດ Pakaad: ຮຽນຮູ້, ແບ່ງປັນ, ສ້າງສັນສັງຄົມ
ຢ່າລືມກົດຕິດຕາມແຟນເພຈ ປະກາດ Pakaad ເພື່ອໄດ້ຮັບຂ່າວສານ ແລະ ສາລະໜ້າຮູ້

ຫາກທ່ານພົບເຫັນຂໍ້ມູນຂ່າວບໍ່ຖືກຕ້ອງ ຫຼື ທ່ານຕ້ອງການສົ່ງຂ່າວຫາທີມງານປະກາດ ສາມາດສົ່ງໄປທາງຂໍ້ຄວາມດ້ານລຸ່ມ



ພິເສດ: ເປັນກໍາລັງໃຈໃຫ້ທີມງານພວກເຮົາ ຢ່າລືມແບ່ງປັນ ແລະ ປະກອບຄໍາຄິດເຫັນດ້ວຍ

 
Copyright © ປະກາດ Pakaad.