ຂ່າວເດັ່ນ

ຮອງນາຍົກລັດຖະມົນຕີ ສສ ຫວຽດນາມ ຢ້ຽມຢາມເຮັດວຽກຢູ່ ສປປ ລາວ



ໂດຍຕອບສະໜອງຕາມຄຳເຊີນຂອງທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງສປປ ລາວ, ທ່ານ ຈິງ ດິງ ຢຸງ, ຮອງນາຍົກລັດຖະມົນຕີແຫ່ງ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ, ໃນລະຫວ່າງວັນທີ 24-25 ມິຖຸນາ 2019, ເພື່ອເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ.



ໃນວັນທີ 24 ມິຖຸນາ 2019, ທີ່ ຫໍປະຊຸມແຫ່ງຊາດ, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ແລະ ພົບປະສອງຝ່າຍກັບ ສະຫາຍ ຈິງ ດິງ ຢຸງ, ຮອງນາຍົກລັດຖະມົນຕີແຫ່ງ ສສ. ຫວຽດນາມ.

ກອງປະຊຸມພົບປະສອງຝ່າຍ ໄດ້ດຳເນີນໄປດ້ວຍບັນຍາກາດອັນອົບອຸ່ນແຫ່ງໄມຕີຈິດມິດຕະພາບ ແລະ ຄວາມສາມັກຄີຮັກແພງອັນສະໜິດສະໜົມ.



ໃນໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ແລະ ເຮັດວຽກຢູ່ ສປປ ລາວ, ຊຶ່ງເປັນການປະກອບສ່ວນອັນສຳຄັນ ເຂົ້າໃນການເພີ່ມທະວີ ແລະ ເສີມຂະຫຍາຍມູນເຊື້ອອັນດີງາມແຫ່ງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ທີ່ມີມາແຕ່ດົນນານແລ້ວນັ້ນໃຫ້ມີຄວາມແໜ້ນແຟ້ນ ແລະ ມີປະສິດທິຜົນສູງຂຶ້ນກວ່າເກົ່າ.

ສອງຝ່າຍ ໄດ້ຕີລາຄາຄືນເຖິງໝາກຜົນຂອງການຮ່ວມມືສອງຝ່າຍ ລາວ-ຫວຽດນາມ ໃນໄລຍະຜ່ານມາ ແລະ ປຶກສາຫາລືທິດທາງແຜນການຮ່ວມມືໃນຕໍ່ໜ້າ. ການພົວພັນຮ່ວມມືລະຫວ່າງສອງຝ່າຍດ້ານການເມືອງ ແມ່ນຢູ່ໃນລະດັບສູງສຸດ ເຫັນໄດ້ຈາກການນຳສູງສຸດ ພັກ-ລັດ ຂອງທັງສອງປະເທດ ໄດ້ມີການໄປມາຫາສູ່ກັນຢ່າງເປັນປົກກະຕິ.

ສອງຝ່າຍ ໄດ້ຕີລາຄາສູງຕໍ່ ພັກ-ລັດຖະບານຂອງສອງປະເທດ ທີ່ໄດ້ເອົາໃຈໃສ່ໃນການຊຸກຍູ້ການພົວພັນຮ່ວມມືດ້ານເສດຖະກິດຂອງສອງຝ່າຍ, ໂດຍສະເພາະແມ່ນການຈັດຕັ້ງປະຕິບັດບັນດາຂໍ້ຕົກລົງການຮ່ວມມືຕ່າງໆ ລະຫວ່າງສອງປະເທດ ໃນບົດບັນທຶກຄວາມເຂົ້າໃຈຂອງສອງກົມການເມືອງ, ບົດບັນທຶກຂອງກອງປະຊຸມຄັ້ງທີ 41 ຂອງ ສອງຄະນະກຳມະການຮ່ວມມື ລາວ-ຫວຽດນາມ ກໍ່ຄື ຂໍ້ຕົກລົງຮ່ວມມືປະຈຳປີ 2019 ແລະ ເອກະສານຮ່ວມມືອື່ນໆທີ່ສອງຝ່າຍໄດ້ມີການຕົກລົງຮ່ວມກັນ.




ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ສອງຝ່າຍແມ່ນສືບຕໍ່ຮ່ວມມືກັນຢ່າງແໜ້ນແຟ້ນ ເພື່ອປົກປັກຮັກສາຜືນແຜ່ນດິນອັນຄົບຖ້ວນ ແລະ ແນວທາງການພັດທະນາຂອງແຕ່ລະປະເທດ, ແນໃສ່ເພື່ອສ້າງເສັ້ນຊາຍແດນໃຫ້ເປັນເສັ້ນຊາຍແດນແຫ່ງສັນຕິພາບ ແລະ ມີການພັດທະນາແບບຍືນຍົງ, ມູນຄ່າການຄ້າສອງຝ່າຍ ເພີ່ມຂຶ້ນ 13,24% ໃນ 5 ເດືອນຕົ້ນປີ 2019 ແລະ ຊຸກຍູ້ໃຫ້ມີການຮ່ວມມືກັນຫຼາຍຂຶ້ນດ້ານພະລັງງານໄຟຟ້າ ເພື່ອໃຫ້ສາມາດບັນລຸໄດ້ຕາມເປົ້າ ໝາຍ, ຊຶ່ງໃນປີ 2018 ຜ່ານມາ ການຄ້າສອງຝ່າຍສາມາດບັນລຸໄດ້ 1 ຕື້ໂດລາ ສະຫະລັດ.
ພ້ອມນີ້, ສສ.ຫວຽດນາມ ຍັງເປັນປະເທດ ທີ່ຈັດຢູ່ໃນອັນດັບ 3 ຂອງການລົງທຶນຕ່າງປະເທດຢູ່ ສປປ ລາວ, ຊຶ່ງນັບແຕ່ປີ 1989 ເປັນຕົ້ນມາ, ມີທັງໝົດ 413 ໂຄງການ, ມູນຄ່າອະນຸມັດທັງໝົດຫຼາຍກວ່າ 4,1 ຕື້ໂດລາສະຫະລັດ.
ສຳລັບປີ 2019, ສສ.ຫວຽດນາມ ສືບຕໍ່ໃຫ້ການຊ່ວຍເຫຼືອແກ່ ສປປ ລາວ ຊຶ່ງອີງຕາມແຜນປະຈຳປີ 2019 ແມ່ນມີມູນຄ່າ 711 ຕື້ດົງ, ຊຶ່ງຖືກນຳໃຊ້ເຂົ້າໃນການຈັດຕັ້ງປະຕິບັດວຽກງານໃນບັນດາໂຄງການຕ່າງໆຢ່າງມີຈຸດສຸມ, ຮັບປະກັນຄຸນນະພາບ ແລະ ມີຄວາມຄືບໜ້າ.


ປະຈຸບັນ ໂຄງການປຸກສ້າງຫໍສະພາແຫ່ງຊາດລາວ ຫຼັງໃໝ່ ມູນຄ່າ 111,75 ລ້ານໂດລາສະຫະລັດ ແມ່ນມີຄວາມຄືບໜ້າເປັນຢ່າງດີ; ໂຄງການກໍ່ສ້າງໂຮງໝໍແຂວງຊຽງຂວາງ ແລະ ໂຮງໝໍແຂວງຫົວພັນ ຄາດວ່າຈະສຳເລັດຕາມກຳນົດໃນໄວໆນີ້; ສຳລັບໂຄງການກໍ່ສ້າງສະໜາມບິນໜອງຄ້າງ ແມ່ນສຳເລັດແລ້ວປະມານ 75% ແລະ ສະເໜີໃຫ້ສືບຕໍ່ຊຸກຍູ້ໃຫ້ສຳເລັດຕາມກຳນົດເວລາ.


ນອກຈາກນີ້, ສອງຝ່າຍ ຍັງໄດ້ລາຍງານສະພາບການພັດທະນາເສດຖະກິດ-ສັງຄົມໂດຍລວມຂອງສອງປະເທດ ໃຫ້ກັນຊາບ.

ໃນໂອກາດນີ້, ທ່ານສອນໄຊ ສີພັນດອນ ໄດ້ຕີລາຄາສູງຕໍ່ຜົນສຳເລັດໃນການພົບປະສອງຝ່າຍໃນຄັ້ງນີ້, ຊຶ່ງໄດ້ສ້າງພື້ນຖານອັນໜັກແໜ້ນ ທັງເປັນການຊີ້ນຳ ແລະ ຊຸກຍູ້ໃຫ້ບັນດາພາກສ່ວນກ່ຽວຂ້ອງຂອງທັງສອງຝ່າຍ ໄດ້ນຳໄປຈັດຕັ້ງຜັນຂະຫຍາຍໃຫ້ເກີດດອກອອກຜົນ, ມີປະສິດທິຜົນສູງຍິ່ງໆຂຶ້ນ.


ພ້ອມດຽວກັນນີ້, ທ່ານສອນໄຊ ສີພັນດອນ ໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈຕໍ່ພັກ, ລັດຖະບານ ແລະ ປະຊາຊົນຫວຽດນາມ ອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງ, ລ້ຳຄ່າ, ມີປະສິດທິຜົນ ແລະ ທັນການ ແກ່ພາລະກິດປະຕິວັດລາວ ມາໂດຍຕະຫຼອດ, ທັງອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈົ່ງໝັ້ນຄົງຂະໜົງແກ່ນຕະຫຼອດກາລະນານ.


ໃນຂະນະດຽວກັນ, ທ່ານ ຈິງ ດິງ ຢຸງ ກໍ່ໄດ້ສະແດງຄວາມຂອບໃຈຢ່າງຈິງໃຈ ມາຍັງ ພັກ-ລັດຖະບານລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ, ຊຶ່ງເຕັມໄປດ້ວຍໄມຕີຈິດມິດຕະພາບໃນການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ທັງໄດ້ສະແດງຄວາມຍິນດີໃນການສືບຕໍ່ຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ໃຫ້ນັບມື້ໄດ້ຮັບການຍົກລະດັບສູງຂຶ້ນອີກ ແລະ ມີບາດກ້າວອັນໃໝ່ໃນອະນາຄົດ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ຫວຽດນາມ-ລາວ ແລະ ລາວ-ຫວຽດນາມ.

ພາຍຫຼັງສຳເລັດກອງປະຊຸມພົບປະ, ທັງສອງຮອງນາຍົກລັດຖະມົນຕີ ລາວ ແລະ ຫວຽດນາມ ກໍ່ໄດ້ເຂົ້າຮ່ວມເປັນສັກຂີພິຍານໃນພິທີເຊັນສັນຍາ ຊື້-ຂາຍ ໄຟຟ້າ ຈາກເຂື່ອນໄຟຟ້ານ້ຳຊຳ 3 ລະຫວ່າງ ບໍລິສັດ ພົງຊັບທະວີ ຂອງລາວ ກັບ ລັດວິສາຫະກິດໄຟຟ້າ ຂອງຫວຽດນາມ.

ໃນຕອນບ່າຍຂອງວັນດຽວກັນ, ທ່ານ ຈິງ ດິງ ຢຸງ ພ້ອມດ້ວຍຄະນະ ຍັງໄດ້ພົບປະເຮັດວຽກຮ່ວມກັບ ທ່ານ ສົມພັນ ແພງຄຳມີ, ຮອງປະທານສະພາແຫ່ງຊາດແຫ່ງ ສປປ ລາວ, ທັງເປັນຫົວໜ້າຄະນະຊີ້ນຳໂຄງການປຸກສ້າງຫໍສະພາແຫ່ງຊາດລາວ ຫຼັງໃໝ່.

ພາຍຫຼັງສຳເລັດພິທີພົບປະ ກໍ່ໄດ້ມີພິທີເຊັນບົດບັນທຶກການພົບປະເຮັດວຽກຮ່ວມກັນໃນຄັ້ງນີ້ອີກດ້ວຍ.

ແບ່ງປັນເລື່ອງນີ້:

Post a Comment


ປະກາດ Pakaad: ຮຽນຮູ້, ແບ່ງປັນ, ສ້າງສັນສັງຄົມ
ຢ່າລືມກົດຕິດຕາມແຟນເພຈ ປະກາດ Pakaad ເພື່ອໄດ້ຮັບຂ່າວສານ ແລະ ສາລະໜ້າຮູ້

ຫາກທ່ານພົບເຫັນຂໍ້ມູນຂ່າວບໍ່ຖືກຕ້ອງ ຫຼື ທ່ານຕ້ອງການສົ່ງຂ່າວຫາທີມງານປະກາດ ສາມາດສົ່ງໄປທາງຂໍ້ຄວາມດ້ານລຸ່ມ



ພິເສດ: ເປັນກໍາລັງໃຈໃຫ້ທີມງານພວກເຮົາ ຢ່າລືມແບ່ງປັນ ແລະ ປະກອບຄໍາຄິດເຫັນດ້ວຍ

 
Copyright © ປະກາດ Pakaad.