ຂ່າວເດັ່ນ

ເມືອງກາສີ ເປີດການສອບເສັງ ຈົບຊັ້ນມໍ 4 ເນັ້ນຄຸນນະພາບ



ວັນທີ່ 18 ມິຖຸນາ 2019 ນີ້, ຢູ່ທີ່ໂຮງຮຽນມໍສໍກາສີ ໄດ້ເປີດພິທີການສອບເສັງຈົບຊັ້ນມໍ 4 ຂຶ້ນຢ່າງເປັນທາງການ ໂດຍການເປັນກຽດເຂົ້າຮ່ວມຂອງ ທ່ານ ສີທົນ ແສງພະຈັນ ຮອງເຈົ້າເມືອງໆກາສີ, ມີຄະນະຮັບຜິດຊອບຈາກພະແນກສຶກສາທິການ ແລະ ກິລາແຂວງວຽງຈັນ, ຫ້ອງການສຶກສາທິການ ແລະ ກິລາເມືອງ, ມີຜູ້ອຳນວຍການໂຮງຮຽນ, ຄູ - ອາຈານພ້ອມດ້ວຍນ້ອງນັກຮຽນຊັ້ນມໍ 4 ເຂົ້າຮ່ວມຢ່າງພ້ອມພຽງ.



ໃນໂອກາດດັ່ງກ່າວ ທ່ານ ອ.ຈ ລາຢູ ແສນໃຈວຸດ ຫົວໜ້າຫ້ອງການສຶກສາທິການ ແລະ ກິລາເມືອງກາສີ ຂຶ້ນກ່າວເປີດພິທີການ ໃນຄັ້ງນີ້ວ່າ: ການສອບເສັງຈົບຊັ້ນມໍ 4 ໃນປີນີ້ແມ່ນຈະໄດ້ດຳເນີນໄປເປັນເວລາ 3 ວັນຄື: ວັນທີ 18-19-20 ມິຖຸນາ 2019.



ສະເພາະຢູ່ເມືອງກາສີມີ 3 ສູນສອບເສັງ, ມີຄະນະກຳມະການຍາມຫ້ອງເສັງ ຈຳນວນ 84 ຄົນ, ຍິງ 33 ຄົນ, ມີນັກຮຽນຊັ້ນມໍ 4 ຂຶ້ນທະບຽນເຂົ້າສອບເສັງທັງໝົດ 732 ຄົນ, ຍິງ 329 ຄົນ, ເຊີ່ງມາຈາກ 9 ໂຮງຮຽນໃນທົ່ວເມືອງ. ສຳລັບວິຊາສອບເສັງແມ່ນມີ 6 ວິຊາຄື: ພາສາລາວ-ວັນນະຄະດີ, ຄະນິດສາດ, ວິທະຍາສາດທຳມະຊາດ, ສຶກສາພົນລະເມືອງ, ວິທະຍາສາດສັງຄົມ ແລະ ພາສາອັງກິດ,



ພ້ອມນັ້ນທ່ານກໍ່ໄດ້ຜ່ານລະບຽບຂອງການສອບເສັງ, ຫຼັງຈາກນັ້ນທ່ານ ອ.ຈ ສັງທອງ ສີສຸວັນທອງ ກໍ່ໄດ້ຂຶ້ນຜ່ານຂໍ້ຕົກລົງແຕ່ງຕັ້ງຄະນະກຳມະການຍາມຫ້ອງເສັງໃນຄັ້ງນີ້. ຕໍ່ມາທາງຄະນະຮັບຜິດຊອບຈາກພະແນກສຶກສາທິການ ແລະ ກິລາແຂວງວຽງຈັນ ໃຫ້ກຽດມອບຫົວບົດສອບເສັງໃຫ້ແກ່ເມືອງກາສີ ເຊີ່ງກ່າວຮັບໂດຍທ່ານ ອ.ຈ ລາຢູ ແສນໃຈວຸດ ຫົວໜ້າຫ້ອງການສຶກສາທິການ ແລະ ກິລາເມືອງກາສີ ໂດຍຊ່ອງໜ້າກັບການນຳຂອງເມືອງ, ຄະນະກຳມະການ, ຄູ - ອາຈານ ພ້ອມດ້ວຍນ້ອງນ້ອຍນັກຮຽນເປັນສັກຂີພິຍານ.



ໃນໂອກາດຕອນທ້າຍພິທີທ່ານ ທົນ ແສງພະຈັນ ຮອງເຈົ້າເມືອງໆກາສີ ໄດ້ເໜັ້ນໜັກໃຫ້ຄູ - ອາຈານ ກໍ່ຄືຄະນະກຳມະການສອບເສັງໃນຄັ້ງນີ້ ຈົ່ງເອົາໃຈໃສ່ເຮັດລ້ອນໜ້າທີ່ຂອງຕົນທີ່ໄດ້ຮັບມອບໝາຍ ເຮັດໃຫ້ການສອບເສັງໃນຄັ້ງນີ້ ປະສົບຜົນສຳເລັດຕາມລະດັບຄາດໝາຍທີ່ວາງໄວ້. ສ່ວນນ້ອງນັກຮຽນກໍ່ຕ້ອງໄດ້ເອົາໃຈໃສ່ ຈັດຕັ້ງປະຕິບັດກົດລະບຽບຂອງການສອບເສັງຢ່າງເຂັ້ມງວດ ພ້ອມກັນສຶກສາຄົ້ນຄ້ວາຮ່ຳຮຽນ ຕັ້ງໜ້າເຂົ້າສອບເສັງສູ້ຊົນຍາດໃຫ້ໄດ້ຄະແນນດີຫມົດທຸກຄົນ.

ຂ່າວ: ເມືອງກາສີ



ແບ່ງປັນເລື່ອງນີ້:

Post a Comment


ປະກາດ Pakaad: ຮຽນຮູ້, ແບ່ງປັນ, ສ້າງສັນສັງຄົມ
ຢ່າລືມກົດຕິດຕາມແຟນເພຈ ປະກາດ Pakaad ເພື່ອໄດ້ຮັບຂ່າວສານ ແລະ ສາລະໜ້າຮູ້

ຫາກທ່ານພົບເຫັນຂໍ້ມູນຂ່າວບໍ່ຖືກຕ້ອງ ຫຼື ທ່ານຕ້ອງການສົ່ງຂ່າວຫາທີມງານປະກາດ ສາມາດສົ່ງໄປທາງຂໍ້ຄວາມດ້ານລຸ່ມ



ພິເສດ: ເປັນກໍາລັງໃຈໃຫ້ທີມງານພວກເຮົາ ຢ່າລືມແບ່ງປັນ ແລະ ປະກອບຄໍາຄິດເຫັນດ້ວຍ

 
Copyright © ປະກາດ Pakaad.