Header Ads

ລັດຖະບານກຽມອອກແຜນແມ່ບົດ ເລັ່ງແກ້ບັນຫາທີດິນ ໃນປີໜ້າ!


 ບັນຫາທີ່ດິນ ຍັງເປັນບັນຫາເຄັ່ງຮ້ອນມາຢ່າງຕໍ່ເນື່ອງ ເຊິ່ງກອງປະຊຸມສະໄໝສາມັນຂອງສະພາແຫ່ງຊາດໃນຊຸດຜ່ານໆມາກໍ່ໄດ້ຍົກບັນຫາກັ່ງກ່າວ ຖາມເຈາະຈີ້ມຂະແໜງທີ່ກ່ຽວຂ້ອງຢ່າງຕໍ່ເນື່ອງ.
 ໂດຍໃນກອງປະຊຸມສະພາແຫ່ງຊາດເມື່ອເດືອນເມສາຜ່ານມາ  ສະມາຊິກສະພາແຫ່ງຊາດ ກໍ່ໄດ້ຕັ້ງຄຳຊັກຖາມວ່າ: ບັນຫາການໃຫ້ສຳປະທານທີ່ດິນໃຫ້ກັບບໍລິສັດເອກະຊົນ ພາຍໃນ ແລະ ຕ່າງປະເທດ ແຕ່ບໍລິສັດບໍ່ປະຕິບັດຕາມສັນຍາ ( ຈັບຈອງທີ່ດິນແຕ່ບໍ່ພັດທະນາ ? ) ບັນຫາບໍລິສັດຂະຫຍາຍເນື້ອທີ່ເກີນກຳນົດທີ່ພາກລັດອະນຸມັດ ເຮັດໃຫ້ປະຊາຊົນໄດ້ຮັບຜົນກະທົບ ແລະ ບັນຫາທີ່ລັດຖະບານອະນຸມັດທີ່ດິນສຳປະທານໃຫ້ບໍລິສັດຢູ່ໃນເຂດທ້ອງຖິ່ນ ແຕ່ບໍລິສັດເຮັດຕາມໃຈ ບໍ່ຮັບຟັງອຳນາດການປົກຄອງທ້ອງຖິ່ນ ເນື່ອງຈາກເປັນໂຄງການທີ່ໄດ້ຮັບອະນຸມັດຈາກລັດຖະບານ, ທາງລັດຖະບານຈະມີວິທີແກ້ໄຂ ແລະ ມາດຕະການຈັດຕັ້ງປະຕິບັດຄືແນວໃດ?.



ຕໍ່ກັບບັນຫາດັ່ງກ່າວ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຊີ້ແຈງຕໍ່ບັນດາ ສສຊ ວ່າ: ບັນຫາການສຳປະທານທີ່ດິນໃຫ້ແກ່ບໍລິສັດລົງທຶນພາຍໃນ ແລະ ຕ່າງປະເທດ ທີ່ລັດຖະບານ ຫຼື ແຂວງໄດ້ອະນຸມັດ ປັດຈຸບັນມີຫຼາຍບໍລິສັດໄດ້ຮັບອະນຸຍາດ, ສຳປະທານແຕ່ບໍ່ປະຕິບັດຕາມລະບຽບກົດໝາຍ, ລະບຽບການທີ່ກ່ຽວຂ້ອງ, ສັນຍາສຳປະທານ ແລະ ອື່ນໆ; ການບຸກເບີກເນື້ອທີ່ບໍ່ໄດ້ຮັບອະນຸມັດກໍ່ມີ, ລ່ວງລ້ຳໄປກໍ່ມີ, ກວມເອົາດິນຂອງປະຊາຊົນ, ການພັດທະນາບໍ່ໄປຕາມກຳນົດເວລາ ແລະ ເງື່ອນໄຂຂອງສັນຍາສຳປະທານ ແລະ ອື່ນໆ.



ທ່ານກ່າວຕື່ມວ່າ: ບັນຫາດັ່ງກ່າວນີ້ແມ່ນມີມາແຕ່ດົນ, ລັດຖະບານຊຸດຜ່ານໆມາກໍ່ໄດ້ພະຍາຍາມແກ້ໄຂ ແຕ່ວ່າຍັງຫຼາຍອັນທີ່ຈະຕ້ອງໄດ້ສືບຕໍ່ແກ້ໄຂ. ລັດຖະບານໄດ້ນຳເອົາບັນຫາທີ່ດິນຂຶ້ນ​ມາ ເພື່ອສຶກສາຄົ້ນຄວ້າວ່າ: ການປະຕິບັດກົດໝາຍທີ່ດິນຂອງພວກເຮົາມີ ຈຸດດີ, ຈຸດອ່ອນ ແລະ ຂໍ້ບົກຜ່ອງແນວໃດ? ເຊິ່ງມີຫຼາຍຂໍ້ຈຸດອ່ອນ ແລະ ຂໍ້ບົກຜ່ອງ, ບັນຫາທີ່ຟົດຮ້ອນກໍ່ຄື: ແຂວງມີສິດອະນຸຍາດເທົ່ານີ້ ແຕ່ປະຕິບັດຕົວຈິງແມ່ນກາຍກັບໂຕທີ່ກຳນົດ, ຕະຫຼອດຮອດເມືອງ ແລະ ບ້ານກໍ່ມີສິດເຊັນໃຫ້ສຳປະທານທີ່ດິນເປັນຕົ້ນ.


ຕໍ່ກັບບັນຫາທີ່ດິນ ໃນກອງປະຊຸມລັດຖະບານ ສະໄໝສາມັນ ປະຈຳເດືອນມັງກອນ 2017 ນາຍົກລັດຖະມົນຕີ ກໍ່ໄດ້ແຕ່ງຕັ້ງຄະນະສະເພາະກິດໜຶ່ງຂຶ້ນ ເພື່ອສຶກສາ ແລະ ວິເຄາະ - ວິໄຈບັນຫາທີ່ດິນໃຫ້ເລິກເຊິ່ງ ໂດຍມອບໃຫ້ ທ່ານ ບຸນທອງ ຈິດມະນີ ຮອງນາຍົກລັດຖະມົນຕີເປັນຜູ້ຊີ້ນຳ, ມີລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມເປັນຫົວໜ້າຄະນະ, ມີບັນດາຮອງລັດຖະມົນຕີກະຊວງກ່ຽວຂ້ອງປະກອບເປັນຄະນະ, ມີກອງເລຂາປະຈຳການຢູ່ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ມີງົບປະມານໃນການເຄື່ອນໄຫວປະຕິບັດໜ້າທີ່ ແລະ ຄວາມຮັບຜິດຊອບຂອງຄະນະ.

ໂດຍມອບໃຫ້ຄະນະທີ່ຖືກແຕ່ງຕັ້ງ ສຶກສາ, ວິເຄາະ - ວິໄຈບັນຫາທີ່ດິນໃຫ້ລະອຽດ, ເລິກເຊິ່ງ, ພ້ອມທັງເບິ່ງບົດຮຽນຂອງປະເທດເພື່ອນມິດສາກົນ, ຄາດໝາຍໃນການເຮັດວຽກຂອງຄະນະໃຫ້ສຳເລັດ ແລະ ສາມາດລາຍງານລັດຖະບານຢ່າງຊ້າ ພາຍໃນເດືອນຕຸລາ 2017, ກ່ອນຈະນຳສະເໜີກອງປະຊຸມກົມການເມືອງ ສູນກາງພັກ ແລະ ກອງປະຊຸມສະພາແຫ່ງຊາດພິຈາລະນາ.


ພ້ອມທັງມອບໃຫ້ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມສືບຕໍ່ຕິດຕາມກ່ຽວກັບສະພາບບັນຫາການຄຸ້ມຄອງ, ນຳໃຊ້, ການເຊົ່າ, ສຳປະທານ ແລະ ການບຸກລຸກທີ່ດິນປ່າສະຫງວນ, ປ່າຕົ້ນນ້ຳ, ຊັບພະຍາກອນທຳມະຊາດອື່ນໆທີ່ບໍ່ຖືກຕ້ອງໃນຂອບເຂດທົ່ວປະເທດ ຢ່າງເປັນປົກກະຕິ, ມີການລາຍງານໃຫ້ລັດຖະບານຮັບຊາບ ແລະ ສະເໜີທິດທາງແກ້ໄຂເປັນແຕ່ລະໄລຍະ.

ຫລ້າສຸດທ່ານ ບຸນມີ ພຸດທະວົງ, ຮອງລັດຖະມົນຕີ ກະຊວງ  ຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ກ້່າວ ກອງປະຊຸມວິທະຍາສາດ ເພື່ອຄົ້ນຄວ້າ ແລະ ປະກອບຄຳເຫັນໃສ່ຮ່າງກຳນົດແຜນແມ່ບົດຈັດສັນທີ່ດິນແຫ່ງຊາດໃນວັນທີ 15 ສິງຫາ2017 ວ່າ: ໃນໄລຍະຜ່ານມາ ການນຳໃຊ້ທີ່ດິນມີລັກສະນະຟູມເຟືອຍ, ມີການຈັບຈອງດິນ-ປ່າສາທາລະນະຢ່າງຊະຊາຍ , ການເກັບລາຍຮັບຈາກທີ່ດິນຖືກຮົ່ວໄຫຼ ທ່າແຮງບົ່ມຊ້ອນຂອງທີ່ດິນບໍ່ໄດ້ຮັບການເສີມຂະຫຍາຍເທົ່າທີ່ຄວນ ສະນັ້ນຈຶ່ງຄວນສ້າງແຜນແມ່ບົດການນຳໃຊ້ທີ່ດິນຢ່າງຖືກຕ້ອງ ແລະ ຍືນຍົງ.


ທ່ານ ກ່າວຕື່ມວ່າ: ນອກນັ້ນ ລາຄາທີ່ດິນນັບມື້ນັບແພງຂຶ້ນຢ່າງຕໍ່ເນື່ອງ ໂດຍສະເພາະແມ່ນທີ່ດິນໃນເຂດຕົວເມືອງ, ໃນຂະນະດຽວກັນຍ້ອນຂາດການຄຸ້ມຄອງທີ່ດີ ຈຶ່ງເຮັດໃຫ້ການຈັດເກັບພາສີ -ອາກອນຈາກທີ່ດິນ ແລະ ຈາກການມອບ-ໂອນ, ຊື້-ຂາຍ ສິດນຳໃຊ້ທີ່ດິນຖືກຮົ່ວໄຫຼຢ່າງໜັກໜ່ວງ. ທ່າແຮງບົ່ມຊ້ອນຂອງທີ່ດິນບໍ່ໄດ້ຮັບການເສີມຂະຫຍາຍເທົ່າທີ່ຄວນ, ການຮ້ອງຟ້ອງ ແລະ ເກີດຄະດີຄວາມກ່ຽບກັບທີ່ດິນນັບມື້ນັບຫຼາຍຂຶ້ນ, ການຫັນທີ່ດິນເປັນທຶນຍັງບໍ່ທັນມີນິຕິກຳລະອຽດ ເຮັດໃຫ້ລັດ ແລະ ປະຊາຊົນບໍ່ທັນໄດ້ຮັບຜົນປະໂຫຍດເທົ່າທີ່ຄວນ. ການເວນຄືນທີ່ດິນເພື່ອຮັບໃຊ້ໂຄງການພັດທະນາຕ່າງໆ ທັງເປັນພາລະໜັກໜ່ວງ, ທັງເປັນບັນຫາຫຼໍ່ແຫຼມທີ່ສ້າງຜົນກະທົບຕໍ່ຄວາມເປັນລະບຽບຮຽບຮ້ອຍຂອງສັງຄົມ.

ທ່ານ ສຸປານີ ສຸລິປຸນໂຍ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງຈຳປາສັກ ຕ່າງໜ້າ ໃຫ້ຈຸຄົ້ນຄວ້າໄດ້ຂຶ້ນສັງລວມ ວ່າ:ຮ່າງແຜນແມ່ບົດຕ້ອງຖືກຮັບຮອງ ແລະ ຈັດຕັ້ງປະຕິບັດໄວ ເພື່ອໃຫ້ການຄຸ້ມຄອງ ການນຳໃຊ້ທີ່ດິນມີຄວາມ ເປັນເອກະພາບ ແລະ ຈັດຕັ້ງໄປໃນລວງດຽວ ຫຼີກລຽງບັນຫາອື່ນໆ.

ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ

 ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານອົງການກວດກາລັດຖະບານ, ຜູ້ຊີ້ນຳຄະນະສະເພາະກິດ ເພື່ອດຳເນີນການກວດກາ, ສຶກສາຄົ້ນຄວ້າ ແລະ ວິໄຈທີ່ດິນ  ກ່າວຕໍ່ກອງປະຊຸມໃນວັນທີ 16 ສິງຫານີ້ວ່າ:  ຈາກຜົນສຳເລັດຂອງກອງປະຊຸມໃນຄັ້ງນີ້  ພວກເຮົາໄດ້ຄົ້ນຄວ້າ ແລະ ເປັນເອກະພາບກັນໃນຫຼາຍດ້ານເຊັ່ນ: ການກຳນົດເຂດ, ປະເພດທີ່ດິນ, ທ່າແຮງ ແລະ ການກຳນົດທິດທາງໃນການພັດທະນາທີ່ດິນແຕ່ລະປະເພດ, ກຳນົດແນວທາງການຄຸ້ມຄອງທີ່ດິນຕາມ 8 ປະເພດທີ່ດິນ ແລະ ອື່ນໆ ຕໍ່ກັບໝາກຜົນຂອງກອງປະຊຸມນີ້ ຈະເປັນຂໍ້ມູນທີ່ສຳຄັນທີ່ຈະນຳໄປປັບປຸງ ແລະ ປະກອບໃສ່ຮ່າງແຜນແມ່ບົດຈັດສັນທີ່ດິນແຫ່ງຊາດໃນຂັ້ນຕໍ່ໄປເພື່ອສະເໜີຜ່ານໃນກອງປະຊຸມລັດຖະບານໃນເດືອນກັນຍາ 2017 ນີ້ ແລະ ສະເໜີທີ່ສະພາແຫ່ງຊາດຮັບຮອງໃນຂັ້ນຕໍ່ໄປ ພ້ອມທັງຈະສາມາດປະກາດໃຊ້ໄດ້ພາຍໃນປີ 2018.




________
ປະກາດ ຮ່ວມສ້າງຄວາມສຸກສູ່ສັງຄົມລາວ






No comments

Powered by Blogger.