Header Ads

ຊ່ວງເຮືອອອກພັນສາ ປະວໍຣະນາ ທີ່ ນະຄອນຫຼວງ ຈະບໍ່ມີການປ່ຽນແປງ!


ໃນອາທິດຜ່ານມາ ໄດ້ມີຂ່າວຫນາຫູພໍສົມຄວນ ເລື່ອງນະຄອນຫຼວງອາດປ່ຽນວັນເວລາຈັດງານບຸນຊ່ວງເຮືອຈາກເຫດຜົນທີ່ແລວນໍ້າມີການປ່ຽນແປງຕາມການເວລາ.

ຫລ້າສຸດ ຫນັງສືພິມ ວຽງຈັນໃຫມ່ ສະບັບວັນທີ17 ສິງຫາ 2017 ລາຍງານວ່າ: ບຸນອອກພັນສາປະວໍລະນາແມ່ນກົງກັບມື້ຂຶ້ນ 15 ຄໍ່າເດືອນ 11 ລາວຂອງທຸກໆປີ ແລະ ບຸນດັ່ງກ່າວຈະຕິດພັນກັບບຸນຊ່ວງເຮືອປະເພນີປະຈຳປີທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ເຊິ່ງເປັນບຸນປະເພນີປະຈຳຊາດທີ່ປະຊາຊົນບັນດາເຜົ່າ ໂດຍສະເພາະປະຊາຊົນນະຄອນຫຼວງວຽງຈັນທີ່ເຄີຍປະຕິບັດກັນມາຫຼາຍເຊັນຄົນ ແລະ ສືບທອດ ຕໍ່ໆໄປ.

ສຳລັບບຸນຊ່ວງເຮືອປະເພນີປະຈຳປີທ່າວັດຈັນມີຟາມໄຊຢູ່ທ່າວັດຈັນທີ່ເປັນສະຖານທີ່ສຳລັບໃຫ້ການນຳພັກ-ລັດ ແຂກຕ່າງປະເທດ ແລະ ພະນັກງານ ພ້ອມດ້ວຍມວນຊົນທົ່ວໄປ ໄດ້ຊົມການແຂ່ງຂັນເຮືອຊ່ວງຢູ່ໜ້ານໍ້າຂອງ ແລະ ໄດ້ກຳນົດເອົາຈຸດນີ້ເປັນສະຖານທີ່ຊ່ວງເຮືອມາຕະຫຼອດ ແຕ່ຕົກມາໄລຍະສອງປີມານີ້ເນື່ອງຈາກສະຖານທີ່ຊ່ວງເຮືອທ່າວັດຈັນສະພາບນໍ້າຂອງໄດ້ມີການປ່ຽນແປງນໍ້າບົກແຫ້ງບໍ່ສາມາດຊ່ວງເຮືອຂະໜາດໃຫຍ່ໄດ້.


ດັ່ງນັ້ນຄະນະກໍາມະການຈັດງານ ໂດຍການເຫັນດີຈາກອຳນາດການປົກຄອງເມືອງ ແລະ ນະຄອນຫຼວງວຽງຈັນກໍ່ຄືພາກສ່ວນກ່ຽວຂ້ອງໄດ້ມີການປ່ຽນສະຖານທີ່ຊ່ວງເຮືອຍັບຍ້າຍຂຶ້ນມາຊ່ວງຢູ່ເຂດບ້ານສີຖານເໜືອ ເມືອງສີໂຄດຕະບອງ ແລະ ຜ່ານການຈັດຕັ້ງເຫັນວ່າສະຖານທີ່ຟາມໄຊຈຸດດັ່ງກ່າວແມ່ນບໍ່ມີຄວາມເໝາະສົມຄືກັບຢູ່ຈຸດທ່າວັດຈັນເນື່ອງຈາກມີສະຖານທີ່ຄັບແຄບ ແລະ ການເຂົ້າ-ອອກລົດແອອັດພົບຄວາມຫຍຸ້ງຍາກ ເມື່ອເປັນຄືແນວນັ້ນຄະນະກຳມະການກໍ່ຄືອຳນາດການປົກຄອງເມືອງຈັນທະບູລີສົມທົບກັບພາກສ່ວນກ່ຽວຂ້ອງໄດ້ປຶກສາຫາລືກ່ຽວກັບການປ່ຽນແປງວັນເວລາຈັດງານບຸນຊ່ວງເຮືອປະເພນີທ່າວັດຈັນມາໃສ່ມື້ບຸນຫໍ່ເຂົ້າສະຫຼາກໃນວັນທີ 5-6 ກັນຍາ 2017 ແລະ ກໍ່ໄດ້ສະເໜີໄປຍັງການນໍານະຄອນຫຼວງວຽງຈັນພິຈາລະນາ ຕໍ່ກັບບັນຫານີ້ໄດ້ມີບາງຄົນນຳເອົາບັນຫາດັ່ງກ່າວລົງທາງສື່ອອນລາຍ ໂດຍສະເພາະເຟສບຸກເຮັດໃຫ້ສັງຄົມມີຄວາມສັບສົນຕໍ່ກັບການຈັດວັນເວລາງານບຸນຊ່ວງເຮືອທີ່ທ່າວັດຈັນຈະເອົາມື້ໃດແທ້.



ທ່ານ ບຸນທ່ຽງ ຂຸນສີ ປະທານແນວລາວສ້າງຊາດນະຄອນຫຼວງວຽງຈັນ ໄດ້ໃຫ້ສຳພາດວັນທີ 15 ສິງຫາ 2017 ວ່າ: ກ່ຽວກັບບຸນປະເພນີຊ່ວງເຮືອທ່າວັດຈັນປີ 2017 ແລະ ຜ່ານການຄົ້ນຄວ້າສະເໜີຂອງເມືອງຈັນທະບູລີ ຄະນະນຳກໍ່ຄືຄະນະປະຈຳພັກນະຄອນຫຼວງວຽງຈັນໄດ້ຄົ້ນຄວ້າເປັນເອກະພາບກັນເຫັນວ່າບຸນຊ່ວງເຮືອທີ່ທ່າວັດຈັນແມ່ນໃຫ້ເຮັດຖືກຕາມຮີດຄອງທີ່ເຄີຍປະຕິບັດກັນມາແຕ່ລະປີຈະບໍ່ມີການປ່ຽນແປງວັນເວລາຈັດງານບຸນຊ່ວງເຮືອຕາມທີ່ຂ່າວລືຜ່ານມາທີ່ວ່າຈະຊ່ວງເຮືອໃສ່ມື້ບຸນເຂົ້າສະຫຼາກກົງກັນມື້ຂຶ້ນ 15 ຄໍ່າເດືອນຕຸລາ ຫຼື ວັນທີ 6 ກັນຍາ 2017 ນັ້ນແມ່ນຈະບໍ່ໃຫ້ຈັດໃສ່ ແລະ ໃຫ້ປະຕິບັດຄືເກົ່າໃສ່ມື້ບຸນອອກພັນສາປະວໍລະນາໃນວັນທີ 5-6 ຕຸລາ 2017 .


ສ່ວນສະຖານທີ່ຊ່ວງເຮືອໃຫ້ກັບຄືນມາຈັດຢູ່ສະຖານທີ່ເກົ່າທ່າວັດຈັນ ແຕ່ຈະມີການປ່ຽນແປງບາງອັນຄືຖ້າປີໃດນໍ້າຂອງຂຶ້ນຫຼາຍໃຫ້ຊ່ວງເຮືອໃຫຍ່ແຕ່ປີໃດນໍ້າຂອງບົກແຫ້ງຕື່ນເຂີນແມ່ນໃຫ້ຊ່ວງເຮືອນ້ອຍໄປຕາມສະພາບແວດລ້ອມຂອງທຳມະຊາດ ທັງນີ້ກໍ່ເພື່ອປະຕິບັດຕາມຮີດຄອງປະເພນີທີ່ເຄີຍສືບທອດກັນມາຫຼາຍເຊັນຄົນ ດັ່ງນັ້ນສັງຄົມກໍ່ຄືປະຊາຊົນບັນດາເຜົ່າຊາວນະຄອນ ຫຼວງວຽງຈັນ ຈົ່ງເຂົ້າໃຈຕາມນີ້ ແລະ ບໍ່ໃຫ້ເຊື່ອຂໍ້ມູນກໍ່ຄືຂ່າວລືທາງສື່ອອນລາຍ.


ບຸນຊ່ວງເຮືອປີຜ່ານໆມາ




ຂ່າວຈາກຫນັງສືພິມວຽງຈັນໃຫມ່
ຮູບຈາກ Facebook/lao photo magazine
Credited: Laos Update


________
ປະກາດ ຮ່ວມສ້າງຄວາມສຸກສູ່ສັງຄົມລາວ



No comments

Powered by Blogger.