Header Ads

ການດຳເນີນວຽກງານໂຄງລ່າງ ສ້າງ ອານຸສອນ ອົງແກ້ວ ທີ່ເຊກອງ ດຳເນີນໄປ ແລ້ວສ່ວນຫຼາຍ


ເຊກອງ : ກອງປະຊຸມສະຫຼຸບລາຍງານຄວາມຄືບໜ້າຂອງໂຄງການກໍ່ສ້າງສວນອະນຸສາວະລີອົງແກ້ວຂອງແຂວງເຊອງ ໃນໄລຍະ 6 ເດືອນຕົ້ນປີ ແລະ ວາງທິດທາງແຜນການຈັດຕັ້ງປະຕິບັດບັນດາ ໜ້າວຽກຂອງໂຄງການໃນ 6 ເດືອນທ້າຍປີ 2017, ເຊິ່ງໄດ້ໄຂຂຶ້ນໃນວັນທີ 30 ສິງຫາ ນີ້ ຢູ່ທີ່ຫ້ອງປະຊຸມພະແນກ ຖວທ ແຂວງ ໂດຍການເຂົ້າຮ່ວມຂອງທ່ານ ຖາວອນ ພົມມະໄລລຸນ ກຳມະການປະຈຳພັກແຂວງ, ຮອງເຈົ້າແຂວງ, ປະທານຄະນະກຳມະການຄຸ້ມຄອງໂຄງການກໍ່ສ້າງສວນອະນຸສາວະລີອົງແກ້ວ, ມີບັນດາຄະນະກຳມະການຄຸ້ມຄອງ ແລະ ຄະນະກອງເລຂາໂຄງການດັ່ງກ່າວເຂົ້າຮ່ວມ.



ທ່ານ ສີນວນ ໄຫຼມຸນຕີ ກອງເລຂາຕິດຕາມໂຄງການກໍ່ສ້າງ ສວນອະນຸສາວະລີອົງແກ້ວ ໄດ້ລາຍງານຄວາມຄືບໜ້າໃນການຈັດຕັ້ງປະຕິບັດຂອງໂຄງການ ໃນໄລຍະ 6 ເດືອນຕົ້ນປີ ແລະ ວາງທິດທາງແຜນການຈັດຕັ້ງປະຕິບັດກິດ ບັນດາໜ້າວຽກຕ່າງໆຂອງໂຄງການ ໃນ 6 ເດືອນທ້າຍປີ 2017 ຊຶ່ງໄດ້ໃຫ້ຮູ້ວ່າ: ໃນໄລຍະ 6 ເດືອນຜ່ານມາ ພະແນກ ຖວທ ແຂວງ ໃນນາມເຈົ້າຂອງໂຄງການກໍ່ສ້າງສວນອະນຸສາວະລີອົງແກ້ວຂອງແຂວງເຊກອງ ເຫັນວ່າບໍລິສັດໄດ້ສືບຕໍ່ຈັດຕັ້ງປະຕິບັດບັນດາໜ້າວຽກທີ່ຍັງບໍ່ທັນສໍາເລັດ ຢ່າງຕໍ່ເນື່ອງ, ຊຶ່ງມາຮອດປະຈຸບັນມີຜົນສຳເລັດບາງໜ້າວຽກຄື: ວຽກຄັດຫີນອ່ອນ ຂອບລະບຽງອ້ອມໄຫໝໍ້ທອງ, ວຽກຄວັດແກະສະຫຼັກຖານຕັ້ງອົງແກ້ວ, ວຽກກໍ່ຂອບທາງຍ່າງສວນຫຍ້າຍ່ອມ ເດີ່ນອະເນກປະສົງ, ວຽກຕິດຕັ້ງເສົາໄຟຟ້າໃນສວນ, ວຽກປູເບຕົງທາງຂຶ້ນສວນອະນຸສາວະລີອົງແກ້ວ, ວຽກປູໂຕໜອນຂອບທາງຍ່າງ, ຕີລາຄາຜົນສໍາເລັດໜ້າວຽກຕ່າງໆມີດັ່ງນີ້: 



ວຽກດິນຕັດ-ດິນຖົມ ແລະ ປູຢາງທາງຂຶ້ນສວນ ປະຕິບັດໄດ້ 70%, ວຽກສະຫຼົບກັນເຈື່ອນ ແລະ ຂັ້ນໄດທາງຂຶ້ນ ປະຕິບັດໄດ້ 64,18%, ວຽກຕົບແຕ່ງເດີ່ນອະເນກປະສົງ ແລະທາງຍ່າງ ປະຕິບັດໄດ້ 80,29%,ພາກສ່ວນປ້າຍຊີ້ບອກ ແລະ ອ່າງນໍ້າພຸ ປະຕິບັດໄດ້ 74,21%, ພາກສ່ວນຖານອົງແກ້ວປະຕິບັດໄດ້ 75,29%, ພາກສ່ວນອາຄານຫ້ອງການ, ຫ້ອງນໍ້າ ແລະ ຮ້ານອາຫານ ປະຕິບັດໄດ້ 72,88%, ພາກສ່ວນຖານປະຕິກຳຮູບປັ້ນອົງແກ້ວ ປະຕິບັດໄດ້ 68,76%, ພາກສ່ວນຕິດຕັ່ງໄຟຟ້າໃນອາຄານ ປະຕະບັດໄດ້ 100%, ຕິດຕັ້ງເສົາໄຟຟ້າໃນເດີ່ນ ປະຕິບັດໄດ້ 100%, ຕິດຕັ້ງໄຟຟ້າປະດັບໃນສວນ ປະຕິບັດໄດ້ 70%, ຕິດຕັ້ງໝໍ້ແປງ 3P.250 ກິໂລວັດ ປະຕິບັດໄດ້ 99%, ກໍ່ສ້າງຕາຂ່າຍ 22 ກິໂລໂວນ ປະຕິບັດໄດ້ 100%, ກໍ່ສ້າງຕາຂ່າຍ 0,4 ກິໂລໂວນແບບຝັງດິນ ປະຕິບັດໄດ້ 0%.


 ສ່ວນຮູບປັ້ນຫຼໍ່ອົງແກ້ວ ຍັງບໍ່ທັນປະຕິບັດ, ຍັງຢູ່ໃນຂັ້ນຕອນສະເໜີຂັ້ນເທິງ ເຊິ່ງໄດ້ຮັບການແຈ້ງຕອບຈາກຫ້ອງວ່າການສູນກາງພັກ ກ່ຽວກັບການເຫັນດີຮັບຮອງເອົາຮູບຈຳລອງອົງແກ້ວຕາມທີ່ປັບປຸງໃໝ່ ໃນທ່າຢືນປຸກລະດົມ, ມືຂວາຊູກໍ້າປັ້ນຂຶ້ນ , ມືຊ້າຍຖືປືນ ການຈັດຕັ້ງປະຕິບັດໂຄງການດັ່ງກ່າວແມ່ນມີທັງຂໍ້ສະດວກ ແລະ ຂໍ້ຫຍຸ້ງຍາກ ເປັນຕົ້ນ ດ້ານຂໍ້ຫຍຸ້ງຍາກ: 


ບໍລິສັດຜູ້ຮັບເໝົາກໍ່ສ້າງຍັງບໍ່ທັນຍົກສູງຄວາມຮັບຜິດຊອບ ແລະ ບໍ່ໄດ້ຈັດຕັ້ງປະຕິບັດໜ້າວຽກຕາມຄຳແນະນຳຂອງຜູ້ຕິດຕາມໂຄງການ ຈຶ່ງເຮັດໃຫ້ບາງໜ້າວຽກມີລັກສະນະຊັກຊ້າ, ການພົວພັນລະຫວ່າງເຈົ້າຂອງບໍລິສັດຮັບເໜົາກໍ່ສ້າງ ແລະ ເຈົ້າຂອງໂຄງການ ບໍ່ທັນຄ່ອງຕົວ ເຮັດໃຫ້ການຈັດຕັ້ງປະຕິບັດວຽກງານບາງດ້ານບໍ່ໄປຕາມແຜນການທີ່ວາງໄວ້;  ສຳລັບທິດທາງແຜນການໃນ 6 ເດືອນຕໍ່ໜ້າ ຈະໄດ້ສືບຕໍ່ກໍ່ຂອບຕາມທາງ, ຕົບແຕ່ງປູກຕົ້ນໄມ້ໃນສວນຍ່ອມເດີ່ນອະເນກປະສົງ ແລະ ທາງຍ່າງ; ສືບຕໍ່ລົງມືກໍ່ສ້າງເສັ້ນທາງອ້ອມໂຄງການ; ສືບຕໍ່ກໍ່ສ້າງລະບົບຕ້ານກັນເຈື່ອນ; ສືບຕໍ່ປູໂຕ ໜອນຕາມທາງຍ່າງ; ສືບຕໍ່ວຽກກໍ່ສ້າງຕາຂ່າຍ 0,4 ກິໂລໂວນແບບຝັງດິນ ແລະ ບັນດາໜ້າວຽກອື່ນໆ ທີ່ຍັງຄ້າງໃຫ້ສຳເລັດ.



ຂ່າວ-ພາບ: ພຸດທະສອນ

________
ປະກາດ ຮ່ວມສ້າງຄວາມສຸກສູ່ສັງຄົມລາວ





No comments

Powered by Blogger.