ຂ່າວເດັ່ນ

ທທທ ເປີດກິດຈະກຳ “Khon Kaen Shopping & Dining Paradise 2017” ເພື່ອກະຕຸ້ນການໃຊ້ຈ່າຍຊ່ວງກຣີນຊີຊັ້ນ ສົ່ງເສີມການທ່ອງທ່ຽວໃຫ້ຄຶກຄື້ນຕະຫຼອດປີ


ໃນຕອນແລງຂອງວັນທີ 1 ກໍລະກົດ 2017 ທ່ານ ຍຸດທະສັກ ສຸພະສອນ, ຜູ້ວ່າການການທ່ອງທ່ຽວແຫ່ງປະເທດໄທ (ທທທ.) ແລະ ທ່ານ ປິຢິນ ຕະລັບນາດ, ຫົວຫນ້າຫ້ອງການຈັງຫວັດຂອນແກ່ນ, ໃຫ້ກຽດເປັນປະທານໃນພິທີເປີດກິດຈະກຳ “Khon Kaen Shopping & Dining Paradise 2017” ພາຍໃຕ້ໂຄງການ Thailand Shopping and Dining Paradise 2017 ໂດຍມີ ທ່ານ ໄຊທະວັດ ນຽມສິຣິ, ຮອງຜູ້ວ່າລາຊະການຈັງຫວັດຂອນແກ່ນ ພ້ອມດ້ວຍ ທ່ານ ນົບພະດົນ ພາກພຣົດ, ຮອງຜູ້ວ່າການດ້ານສິນຄ້າ ແລະ ທຸລະກິດທ່ອງທ່ຽວຈາກ ທທທ, ທ່ານ ກອນວິດ ວົງປະເສີດ, ຜູ້ອຳນວຍການຝ່າຍລົງທຶນທຸລະກິດທ່ອງທ່ຽວ ຈາກ ທທທ, ທ່ານ ຊານຍຸດ ສະເວດສຸວັນ, ຜູ້ອຳນວຍການສຳນັກງານ ທທທ ປະຈຳສຳນັກງານ ຂອນແກ່ນ, ທ່ານ ພົງສັກ ຕັງວານິດກະພົງ ນາຍົກອົງການບໍລິຫານສ່ວນຈັງຫວັດ ຂອນແກ່ນ,ທ່ານ ທີຣະສັກ ທີຄາຍຸພັນ, ນາຍົກເທດສະມົນຕີເທດສະບານນະຄອນ ຂອນແກ່ນ, ທ່ານ ອາທອນ ກັນຕະວະທີລະ, ຮອງປະທານຫໍການຄ້າຈັງຫວດຂອນແກ່ນ, ທ່ານ ພູວະສິດ ວິລະປັນຍາວັດ, ຮອງປະທານສະພາອຸດສາຫະກຳຈັງຫວັດຂອນແກ່ນ ແລະ ທ່ານ ພົບພົນ ກະເສມສັນ ນະ ອະຍຸທະຍາ, ປະທານສະມາຄົມທຸລະກິດການທ່ອງທ່ຽວ ຈັງຫວັດຂອນແກ່ນ ແລະ ຜູ້ປະກອບການໃນອຸດສາຫະກຳທ່ອງທ່ຽວ ໃຫ້ກຽດເຂົ້າຮ່ວມ ງານທີ່ໄດ້ຈັດຂຶ້ນຢູ່ເດີ່ນຫນ້າ ຂອນແກນ ຮອນ ຊັ້ນ 5, ສູນການຄ້າ ເຊັນໂທຣ ພຼາຊາ ຂອນແກ່ນ, ຈັງຫວັດຂອນແກ່ນ.

ຜູ້ວ່າລາຊະການຈັງຫວັດຂອນແກ່ນ ກ່າວວ່າ ຈັງຫວັດຂອນແກ່ນເປັນຈັງຫວັດ ທີ່ມີເສດຖະກິດຂະໜາດໃຫຍ່, ເປັນສູນກາງທາງດ້ານໂລຈິດສະຕິກຂອງພາກພື້ນ ແລະ ອະນຸພາກພື້ນລຸ່ມນ້ຳຂອງ ເນື່ອງຈາກມີພູມສັນຖານຕັ້ງຢູ່ໃນແລວພື້ນທີ່ພັດທະນາ ເສດຖະກິດຕາເວັນອອກ-ຕາເວັນຕົກ ແລະ ແລວເໜືອ-ໃຕ້, ເຊິ່ງນອກຈາກມີໂຄງຂ່າຍ ທາງຖະໜົນທີ່ສາມາດເຂົ້າເຖິງທຸກຈັງຫວັດໃນພາກພື້ນຕາເວັນອອກສ່ຽງເໜືອແລ້ວ ຍັງມີສະໜາມບິນນານາຊາດທີ່ສາມາດຮອງຮັບຈຳນວນຖ້ຽວບິນໄດ້ຫຼາຍກວ່າ 30 ຖ້ຽວບິນຕໍ່ມື້. ນັກລົງທຶນຈຳນວນຫຼາຍໃຫ້ຄວາມສົນໃຈທີ່ຈະເຂົ້າມາລົງທຶນໃນຂົງເຂດ ເນື່ອງຈາກເຫັນວ່າມີສັກກະຍະພາບ. ໂດຍສະເພາະທາງດ້ານການທ່ອງທ່ຽວໄດ້ກຳນົດ ໃຫ້ຈັງຫວັດຂອນແກ່ນເປັນສູນກາງການປະຊຸມສຳມະນາ (MICE City) ໃນລະດັບ ພາກພື້ນ ແລະ ລະດັບສາກົນ. ການຈັດກິດຈະກຳ Khon Kaen Shopping & Dining Paradise 2017 ນອກຈາກຈະເປັນການສ້າງແຮງຈູງໃຈໃຫ້ນັກທ່ອງທ່ຽວ ທັງຊາວໄທ ແລະ ຊາວຕ່າງປະເທດທີ່ເດີນທາງມາທ່ອງທ່ຽວຊື້ສິນຄ້າ ແລະ ບໍລິການ ໃນຊ່ວງນອກລະດູການທ່ອງທ່ຽວ (Green Season) ຫຼາຍຂຶ້ນແລ້ວ ຍັງເປັນການ ສ້າງການຮັບຮູ້ໃຫ້ປະເທດໄທເປັນແຫຼ່ງຊື້ສິນຄ້າທີ່ສະດວກ ມີຄຸນນະພາບ ແລະ ຫຼາກຫຼາຍແຫ່ງໜຶ່ງໃນພາກພື້ນອາຊີ, ເຊິ່ງຈະຊ່ວຍກະຕຸ້ນໃຫ້ເກີດການໝູນວຽນ ແລະ ການກະຈາຍລາຍໄດ້ສູ່ພາກພື້ນ.




ຜູ້ວ່າການການທ່ອງທ່ຽວແຫ່ງປະເທດໄທ ກ່າວໃນລາຍລະອຽດວ່າ ການຈັດ ກິດຈະກຳ Khon Kaen Shopping & Dining Paradise 2017 ພາຍໃຕ້ ໂຄງການ Thailand Shopping and Dining Paradise 2017 ກຳນົດ ກຸ່ມເປົ້າໝາຍເປັນນັກທ່ອງທ່ຽວຊາວໄທ ແລະ ນັກທ່ອງທ່ຽວຊາວຕ່າງປະເທດ (ສາທະລະນະລັດ ປະຊາທິປະໄຕ ປະຊາຊົນລາວ). ໂດຍຈັດກິດຈະກຳພາຍໃຕ້ແນວຄິດ “ກິນ ຊັອບ ທ່ຽວ”. ຕະຫຼອດໄລຍະເວລາ 2 ເດືອນ ຂອງການຈັດກິດຈະກຳ ມີຜູ້ປະກອບ ການຫຼາຍກວ່າ 400 ຮ້ານຄ້າ ໃນເຂດຕົວເມືອງຈັງຫວັດຂອນແກ່ນ ຮ່ວມຈັດລາຍການ ສົ່ງເສີມການຂາຍ, ໂປຣໂມຊັ້ນ ແລະ ສິດພິເສດຕ່າໆຫຼາຍຢ່າງ ເພື່ອມອບໃຫ້ແກ່ນັກ ທ່ອງທ່ຽວ ແລະ ຜູ້ໃຊ້ບໍລິການເຊັ່ນ: ຫ້າງສັບພະສິນຄ້າ-ສູນການຄ້າ ຈັດໂປຣໂມຊັ້ນ ມອບສ່ວນຫຼຸດສູງສຸດເຖິງ 70 ສ່ວນຮ້ອຍ, ຮ້ານອາຫານ-ພັດຕະຄານ ຈັດໂປຣໂມຊັ້ນ ມອບສ່ວນຫຼຸດສູງສຸດເຖິງ 20 ສ່ວນຮ້ອຍ ຫຼື ຈັດແຄມເປນໃຫ້ເຄື່ອງດື່ມ ແລະ ຂະໜົມ ຫວານຟຣີ ເປັນຕົ້ນ. ນອກນັ້ນ, ຜູ້ປະກອບການຮ້ານສະປາ ຍັງຈັດໂປຣໂມຊັ້ນສ່ວນຫຼຸດ ສູງສຸດເຖິງ 30 ສ່ວນຮ້ອຍ, ໂຮງແຮມ ແລະ ທີ່ພັກ ມອບສ່ວນຫຼຸດພິເສດໃຫ້ແກ່ນັກ ທ່ອງທ່ຽວເຊັ່ນ: ໃຫ້ສ່ວນຫຼຸດສຳລັບຫ້ອງຊູພີເຣຍ ຈາກລາຄາ 1,000 ບາດ ຫຼຸດເຫຼືອ 690 ບາດ ຫຼື ຈັດໂປຣໂມຊັ້ນສຳລັບຫ້ອງຊູພີເຣຍ ໃນລາຄາຄືນລະ 750 ບາດ ເມື່ອພັກ 3 ຄືນ ຈ່າຍພຽງ 2 ຄືນ ເປັນຕົ້ນ. ຍິ່ງໄປກ່ວານັ້ນ, ຜູ້ປະກອບການ/ຮ້ານຄ້າໃນເທດສະ ບານນະຄອນຂອນແກ່ນ 300 ກວ່າຮ້ານຄ້າເຊັ່ນ: ຜູ້ປະກອບການຕະຫຼາດໂຕ້ລຸ້ງ ຮ່ວມຈິດ ຈັດໂປຣໂມຊັ້ນເຊັ່ນວ່າ ຊື້ເກົາເຫຼົາ 1 ຖ້ວຍ ຟຣີເຂົ້າລ້າ 1 ຖ້ວຍ, ຜູ້ປະກອບ ການຕະຫຼາດຕິດນຳ້ບຶງແກ່ນນະຄອນ ຈັດໂປຣໂມຊັ້ນ ຊື້ໂຈ້ກແຖມເຂົ້າໜົມຄູ່, ລວມໄປ ເຖິງ ຜູ້ປະກອບການຕະຫຼາດໂຕ້ລຸ້ງລື່ນລົມ, ຕະຫຼາດສີຂຽວຂອນແກ່ນ ແລະ ຖະໜົນ ຄົນຍ່າງຂອນແກ່ນ ທີ່ຮ່ວມໃຈກັນຈັດໂປຣໂມຊັ້ນພິເສດໃຫ້ແກ່ນັກທ່ອງທ່ຽວໃນຊ່ວງ ລະຫວ່າງເດືອນມິຖຸນາເຖິງເດືອນກໍລະກົດ 2017.

ນອກຈາກໄດ້ຮັບສ່ວນຫຼຸດ ແລະ ສິດພິເສດຈາກຮ້ານຄ້າທີ່ຮ່ວມໂຄງການແລ້ວ ຍັງໄດ້ຮັບສິດສົ່ງຄູປ໋ອງເພື່ອຊິງລາງວັນກັບ ທທທ, ເຊິ່ງລາງວັນໃຫຍ່ແມ່ນປີ້ໂດຍສານ ຖ້ຽວບິນ ໄປ-ກັບ ຂອນແກ່ນ-ກຸງເທບ-ຂອນແກ່ນ, ລວມເຖິງລຸ້ນຮັບລາງວັນອື່ນໆ ອີກຫຼາຍຢ່າງເມື່ອສິ້ນສຸດໂຄງການ. ທທທ ກຳນົດຈັດພິທີເປີດກິດຈະກຳ Khon Kaen Shopping & Dining Paradise 2017 ໃນວັນທີ 1 – 2 ກໍລະກົດ 2017, ເຊິ່ງ ພາຍໃນງານຈະພົບກັບການຈັດສະແດງຕົວຢ່າງສິນຄ້າຈາກຮ້ານຄ້າທີ່ຮ່ວມໂຄງການ, ສວນສັດຂອນແກ່ນ, ພິພິທະພັນຂອນແກ່ນ, ການສະແດງສິລະປະ, ຮ່ວມໃກ້ຊິດກັບ ສິລະປິນໃນດວງໃຈ ຣິດ ເດີະສະຕາ (ວັນທີ 1 ກໍລະກົດ 2017) ແລະ ແຊັກ ຊຸມແພ (ວັນທີ 2 ກໍລະກົດ 2017) ພ້ອມລຸ້ນຮັບປີ້ຖ້ຽວບິນໄປ-ກັບ ຂອນແກ່ນ-ກຸງເທບ-ຂອນແກ່ນ ຈຳນວນ 2 ລາງວັນ ແລະ ຮ່ວມຫຼິ້ນເກມລຸ້ນຮັບລາງວັນອີກຫຼາຍຢ່າງ.

ທ່ານ ຍຸດທະສັກ ກ່າວຕອນທ້າຍວ່າ ໂຄງການ Thailand Shopping and Dining Paradise 2017 ນີ້ເປັນໂຄງການທີ່ດຳເນີນຢ່າງຕໍ່ເນື່ອງເປັນປີທີ 19 ໂດຍປັບປ່ຽນຈາກໂຄງການ Amazing Thailand Grand Sale ເພື່ອໃຫ້ ນັກທ່ອງທ່ຽວໄດ້ຮັບຮູ້ເຖິງການເປັນແຫຼ່ງສິນຄ້າຄຸນນະພາບສູງຂອງພາກພື້ນ. ເຊິ່ງໃນປີ 2016 ລາຍໄດ້ທີ່ເກີດຈາກການໃຊ້ຈ່າຍຂອງນັກທ່ອງທ່ຽວຕ່າງປະເທດໃນໂຄງການ ເປັນເງິນຈຳນວນ 2,756,609,228 ບາດ, ເປັນຄ່າໃຊ້ຈ່າຍຈາກນັກທ່ອງທ່ຽວ ພາກພື້ນອາຊີ ແລະ ອິນເດຍ. ສິນຄ້າທີ່ໄດ້ຮັບຄວາມນິຍົມແມ່ນ ເສື້ອຜ້າ/ເຄື່ອງແຕ່ງ ກາຍ, ຮ້ານອາຫານ, ທີ່ພັກ/ໂຮງແຮມເຄື່ອງໃຊ້ໄຟຟ້າ/ອຸປະກອນອີເລັກໂຕຣນິກ, ງານສີມື/ງານຫັດຖະກຳ ແລະ ສະປາ.

ພ້ອມດຽວກັນນີ້ ທທທ ຄາດຫວັງວ່າກິດຈະກຳ Khon Kaen Shopping & Dining Paradise 2017 ຈະຊ່ວຍດຶງກຸ່ມນັກທ່ອງທ່ຽວ, ເພີ່ມຄ່າໃຊ້ຈ່າຍ ແລະ ສ້າງ ລາຍໄດ້ທາງການທ່ອງທ່ຽວໃນພື້ນທີ່ຈັງຫວັດຂອນແກ່ນໃຫ້ຫຼາຍຍິ່ງຂຶ້ນ. ສອບຖາມຂໍ້ມູນ ເພີ່ມເຕີມໄດ້ທີ່ www.thailandshoppingdining.com Facebook: thailandshoppingdining, khonkaenparadise ຫຼື 1672 ເບີດຽວທ່ຽວທົ່ວໄທ.



________
ປະກາດ ຮ່ວມສ້າງຄວາມສຸກສູ່ສັງຄົມລາວ



ແບ່ງປັນເລື່ອງນີ້:

Post a Comment


ປະກາດ Pakaad: ຮຽນຮູ້, ແບ່ງປັນ, ສ້າງສັນສັງຄົມ
ຢ່າລືມກົດຕິດຕາມແຟນເພຈ ປະກາດ Pakaad ເພື່ອໄດ້ຮັບຂ່າວສານ ແລະ ສາລະໜ້າຮູ້

ຫາກທ່ານພົບເຫັນຂໍ້ມູນຂ່າວບໍ່ຖືກຕ້ອງ ຫຼື ທ່ານຕ້ອງການສົ່ງຂ່າວຫາທີມງານປະກາດ ສາມາດສົ່ງໄປທາງຂໍ້ຄວາມດ້ານລຸ່ມ



ພິເສດ: ເປັນກໍາລັງໃຈໃຫ້ທີມງານພວກເຮົາ ຢ່າລືມແບ່ງປັນ ແລະ ປະກອບຄໍາຄິດເຫັນດ້ວຍ

 
Copyright © ປະກາດ Pakaad.