Header Ads

ຊົມເຊີຍ...!!! ຫັດຖະກຳແພງໄໝ ເປັນທີ່ຍອມຮັບໃນລະດັບສາກົນ



ໃນ​ໂອກາດ​ທີ່​ທ່ານ ບຸນ​ຍັງ ວໍລະ​ຈິດ ປະທານ​ປະເທດ ແລະ ທ່ານ ສິນ​ລະ​ວົງ ຄຸດ​ໄພທູນ ເຈົ້າຄອງນະຄອນຫຼວງ​ວຽງ​ຈັນ ເຄື່ອນ​ໄຫວ​ພົບ​ປະ​ກັບ​ອຳນາດການ​ປົກຄອງ ແລະ ພໍ່​ແມ່​ປະຊາຊົນ ເມືອງ​​ຈັນ​ທະ​ບູ​ລີ ນະຄອນຫຼວງ​ວຽງ​ຈັນ ວັນ​ທີ 29 ກັນຍາ 2017 ທ່ານ​ເອງ​ພ້ອມ​ດ້ວຍ​ຄະນະ ໄດ້​ໄປ​ຢ້ຽມຢາມ​ສູນ​ຫັດຖະກຳແພງ​ໄໝ (ຫັດຖະກຳ​ຄະເນດ) ປູກ​ມອນ-ລ້ຽງ​ມ້ອນ​ຄົບ​ວົງ​ຈອນຂອງ​ທ່ານນາງ ກົງ​ທອງ ນັນທະວົງ​ດວງ​ສີ ຢູ່​ບ້ານ​ໂພນ​ຕ້ອງ​ຈອມມະນີ ເມືອງ​ຈັນທະ​ບູ​ລີ ນະຄອນຫຼວງ​ວຽງ​ຈັນ ເພື່ອ​ເປັນ​ການ​ຊຸກຍູ້​ສົ່ງເສີມ​ການ​ຜະລິດ​ໃຫ້​ເປັນ​ສິນຄ້າ ແລະ ອື່ນໆ.

ທ່ານ​ນາງ ກົງ​ທອງ ນັນທະວົງ​ດວງ​ສີ ຜູ້ອຳນວຍການ​ສູນ​ຫັດຖະ​ກຳແພງ​ໄໝ​ ກ່າວ​ວ່າ: ສູນ​ຫັດຖະ​ກຳ​ພວກ​ເຮົາ​ເປັນ​ສູນ​ໜຶ່ງ​ຜະລິດ​ແຜ່ນແພ​ດ້ວຍ​ສີໄມ້ລາຍມືຂອງ​ແມ່ຍິງ​ລາວ ທີ່​ມີ​ຫຼາຍ​ແບບຫຼາຍ​ສີສັນອັນ​ສວຍ​ງາມ​ອອກຮັບ​ໃຊ້​ສັງຄົມ ເຊິ່ງ​ໄດ້​ສືບ​ທອດຈາກ​ຮຸ່ນ​ແມ່​ຫາ​ຮຸ່ນ​ລູກ ໂດຍ​ເລີ່ມຕົ້ນ​ຈາກ​ການ​ສ້າງ​ເສດຖະກິດຄອບຄົວ​ຂະໜາດ​ນ້ອຍ ເພື່ອ​ຕອບສະໜອງ​ຕາມ​ແນວທາງ​ປ່ຽນແປງ​ໃໝ່​ຂອງ​ພັກ-ລັດ ປີ 1980 ໄດ້​ເລີ່ມ​ມີ​ການ​ສົ່ງ​ອອກ​ຜະລິດ​ຕະພັນ ແລະ ມາ​ຮອດ​ປີ 1990 ໄດ້ສ້າງ​ເປັນ​ສູນ​ຫັດຖະກຳ​ແພງ​ໄໝ ໃນ​ນີ້ເນັ້ນ​ໃສ່​ການ​ຮັກສາ​ວິທີການ​ຕຳ​ຫູກ​ແບບ​ດັ່ງ​ເດີມ ເພື່ອດຶງ​ດູດ​ນັກ​ທ່ອງ​ທ່ຽວ ທັງ​ເປັນການ​ຮັກສາ​ວັດທະນະທຳ ແລະ ສິ່ງແວດລ້ອມ​ໄປ​ພ້ອມ​ກັນ ​ໄດ້​ໃຊ້​ສີ​ຍ້ອມ​ທຳ​ມະ​ຊາດ ປູກ​ມອນ-ລ້ຽງມ້ອນ ປູກ​ຝ້າຍ​ປອດ​ສານ​ເຄ​ມີ ເພື່ອ​ໃຫ້​ຜູ້​ຊົມໃຊ້​ມີ​ຄວາມ​ພໍໃຈ ຕໍ່ຈາກ​ນັ້ນ ປີ 2000 ໄດ້​ມີ​ໂອກາດເຮັດ​ວຽກ​ກັບ​ຊຸມ​ຊົນ​ຕ່າງໆ​ໃນການ​ປູກ​ມອນ-ລ້ຽງ​ມ້ອນ ຈຶ່ງ​ໄດ້ສ້າງ​ບໍລິສັດ​ຫັດຖະກຳ​ພະ​ຄະເນດຂຶ້ນ ແນໃສ່​ລົງ​ເລິກ​ກ່ຽວ​ກັບ​ການຜະລິດ​ວັດຖຸ​ດິບ ແລະ ປະດິດ​ຄິດຄົ້ນ​ເຄື່ອງມື​ຮັບ​ໃຊ້​ການ​ຜະລິດ ດ້ວຍ​ການ​ອະນຸ​ຮັກ​ພູມ​ປັນຍາແບບ​ຊາວບ້ານ ເມື່ອ​ມີ​ຕະຫຼາດຮອງ​ຮັບ​ມັນ​ຮຽກຮ້ອງ ​ໃຫ້​ມີ​ການຜະລິດ​ທີ່​ໄດ້​ມາດຕະຖານ ໃຫ້​ສາມາດ​ແຂ່ງຂັນ​ກັບ​ປະເທດ​ອື່ນໆ ປັດຈຸບັນ ສູນ​ມີ​ພະນັກງານ​ຫຼາຍກວ່າ 600 ຄົນ ສະເລ່ຍ​ລາຍ​ຮັບຂອງ​ພະນັກງານ​ຜູ້​ໜຶ່ງ​ບໍ່​ຕ່ຳ​ກວ່າ 1 ລ້ານ​ກີບ ຫຼື ຕາມ​ການ​ຜະລິດຂອງ​ແຕ່ລະຄົນ.

ປັດຈຸບັນ ຫັດຖະກຳ​ແພງ​ໄໝ ໄດ້​ເປັນ​ທີ່​ຮູ້​ຈັກຢ່າງ​ກວ້າງຂວາງ ແລະ ເປັນ​ທີ່​ຍອມຮັບ​ໃນ​ລະດັບສາກົນ​ສະແດງ​ອອກ ໃນ​ປີ 2006 ໄດ້​ຮັບ​ໃບຢັ້ງຢືນ​ກ່ຽວ​ກັບ​ຄວາມເປັນ​ເລີດ​ໃນ​ດ້ານ​ການ​ອອກ​ແບບ ແລະ ຜະລິດ​ຕະ​ພັນ​ຄຸນະພາບ​ໃນຂະແໜງ​ແຜ່ນແພ ປີ 2011 ໄດ້ຮັບ​ນາມມະຍົດ​ສິລະ​ປະ​ດີເດັ່ນ ໃນສາຂາ​ສິລະ​ປະ​ຫັດຖະກຳ​ຕ່ຳແຜ່ນ ຂະແໜງ​ວິຈິດ​ສິນ ຈາກ​ລັດ​ຖະບານ​ລາວ ແລະ ປີ 2012 ໄດ້​ຮັບລາງວັນ UNESCO ໃນ​ຂະແໜງແຜ່ນແພ​ພື້ນເມືອງ​ຢູ່​ໃນ​ພາກ​ພື້ນອາຊີ ນອກ​ນັ້ນຍັງ​ໄດ້​ປະກອບສ່ວນ​ຕາມ​ຄວາມ​ສາມາດ​ໃຫ້​ຄຳປຶກສາ​ແກ່​ອົງ​ການຈັດຕັ້ງ​ທັງພາຍ​ໃນ ແລະ ຕ່າງປະເທດ ກ່ຽວກັບ​ວຽກ​ງານ​ຫັດຖະກຳ​ຕ່ຳຫູກ ປູກ​ມອນ-ລ້ຽງ​ມ້ອນ ການ​ອອກແບບ​ຜ້າໄໝ ແລະ ອື່ນໆ ນອກ​ນີ້ຍັງ​ໄດ້​ສ້າງ​ຕົວ​ແທນ​ຈຳໜ່າຍ​ຢູ່ອາ​ເມ​ຣິ​ກາ ເອີ​ຣົບ ແລະ ຍີ່ປຸ່ນ ຕື່ມ​ອີກ.


________
ປະກາດ ຮ່ວມສ້າງຄວາມສຸກສູ່ສັງຄົມລາວ



No comments

Powered by Blogger.