Header Ads

ສົ່ງເສີມການຜະລິດເປັນສິນຄ້າ ພັດທະນາຕາມທິດສີຂຽວ ແລະ ຍືນຍົງ


ກອງ​ປະຊຸມ​ເພື່ອ​ລາຍ​ງານຄວາມ​ຄືບ​ໜ້າ ການ​ຄົ້ນຄວ້າ​ບັນຫາ​ຕາມ​ການ​ເຈາະ​ຈິ້ມ​ຂອງ​ນາຍົກ​ລັດຖະມົນຕີ ເພື່ອ​ກະທົບ​ໃສ່ການ​ປະຕິບັດ​ໂຄງການ​ສົ່ງເສີມການ​ຜະລິດ​ເປັນ​ສິນຄ້າ ແລະ ໂຄງການ​ຄ້ຳປະກັນ​ສະບຽງ​ອາຫານ ຈັດ​ຂຶ້ນ​ວັນ​ທີ 4 ຕຸລາ 2017 ທີ່​ກະຊວງ​ກະສິກຳ ແລະ ປ່າໄມ້ ເປັນ​ປະທານ​ຂອງ​ທ່ານ ພວງ​ປາຣິ​ສັກ ປຣະ​ວົງ​ວຽງ​ຄຳ ຮອງ​ລັດຖະ​ມົນຕີ​ກະຊວງ​ກະສິກຳ ແລະ ປ່າໄມ້ ມີ​ທ່ານ ລຽນ​ທິ​ແກ້ວ ລັດຖະ​ມົນຕີ​ກະຊວງ​ກະສິກຳ ແລະ ປ່າໄມ້ ພ້ອມ​ດ້ວຍ​ບັນດາ​ຮອງ​ລັດຖະ​ມົນຕີ​ກະຊວງ​ອ້ອມ​ຂ້າງ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ໂດຍ​ປະຕິບັດ​ຕາມ​ການ​ຊີ້ນຳ​ຂອງ​ທ່ານ​ນາຍົກລັດຖະມົນຕີ ແລະ ການ​ຊີ້​ນຳ​ສະເພາະ​ລົງ​ເລິກຂອງ​ທ່ານ​ລັດຖະມົນຕີ​ກະຊວງກະສິກຳ ແລະ ປ່າໄມ້ ເພື່ອ​ຜັນຂະຫຍາຍ​ນະໂຍບາຍ​ຕ່າງໆ​ໃຫ້ເປັນ​ຮູບ​ປະ​ທຳ ຈຶ່ງ​ໄດ້​ກຳນົດ​ຈັດແບ່ງ​ຫົວຂໍ້​ເນື້ອ​ໃນ​ວຽກ ແລະ ນະໂຍ​ບາຍ​ກຳນົດ​ແຜນ​ວຽກ​ກິດ​ຈະກຳ ເພື່ອ​ເຮັດ​ໃຫ້ການ​ສົ່ງເສີມການ​ຜະລິດ​ສະບຽງ​ອາຫານ ແລະ ການ​ຜະລິດ​ເປັນ​ສິນຄ້າ​ຢູ່ພາຍ​ໃນ​ສາມາດ​ດຳເນີນ​ໄປ​ຢ່າງແຂງແຮງ ມີ​ປະ​ສິດທິ​ຜົນ​ທາງດ້ານ​ເສດຖະກິດ ກາຍເປັນ​ແຫຼ່ງລາຍ​ຮັບ​ຂອງ​ປະເທດ ແລະ ແຫຼ່ງລາຍ​ໄດ້ຂອງ​ຜູ້​ຜະລິດ​ຜູ້​ປະກອບການ​ອັນ​ໃໝ່ ແລະ ໝັ້ນຄົງ ພັດທະ​ນາ​ໄປ​ຕາມ​ທິດ​ສີຂຽວ ແລະ ຍືນ​ຍົງ.

ກອງ​ປະຊຸມ​ໄດ້​ຄົ້ນຄວ້າ​ຈັດແບ່ງ​ຄຳ​ຖາມ​ເຈາະ​ຈິ້ມ​ຂອງ​ລັດນາຍົກ​ຖະ​ມົນຕີ ໂດຍ​ສະເພາະ ການຈັດຕັ້ງ​ຜັນ​ຂະຫຍາຍ​ບັນດາ 13+8 ນະໂຍບາຍ​ທີ່​ກຳນົດ​ແລ້ວ ໃຫ້​ປະຕິບັດ​ຢ່າງ​ກົມກຽວ​ໄປ​ລວງດຽວ​ກັນ ທັງ​ໝົດ​ລະບົບ​ຕ່ອງ​ໂສ້ ການ​ຜະລິດ​ການ​ປຸງ​ແຕ່ງ-ຫຸ້ມຫໍ່​ການ​ຈໍ​ລະ​ຈອນ ການຈຳໜ່າຍອອກ​ສູ່​ຕະຫຼາດ​ພາຍ​ໃນ ແລະ ຕ່າງປະເທດ ເພື່ອ​ຊຸກຍູ້​ການ​ຜະລິດ​ໃຫ້​ມີ​ຕົ້ນ​ທຶນ​ການ​ຜະລິດ​ຕ່ຳປາສະຈາກ​ຫຼາຍ​ຂອດ ລະຫວ່າງກາງ ແລະ ສິ້ນ​ເປືອງ​ດ້ານ​ບໍ​ລິຫານ ສະອາດ ປອດ​ໄພ ຕາມ​ທິດພັດທະນາ​ສີຂຽວ ແລະ ສາມາດແຂ່ງຂັນ​ໃນ​ລະດັບ​ອາ​ຊຽນ​ພາກພື້ນ ແລະ ສາກົນ.

ສຳລັບ​ການ​ກຳນົດ​ໄດ້​ແບ່ງເຂດ​ຜະລິດ​ເຂົ້າ ແລະ ພືດ​ສະບຽງເປັນ​ເຂດ​ສະເພາະ​ແລ້ວ ໂດຍ​ສຸມໃສ່​ເຂດ​ທີ່​ມີ​ຊົນລະປະທານ ແລະ ສ້າງ​ຊົນລະປະທານ ກວມ​ເນື້ອທີ່ປະມານ 350.000 ເຮັກຕາ ຕໍ່ບັນຫາ​ດັ່ງກ່າວ ສຸມ​ໃສ່​ສ້າງ​ເປັນຕົວ​ແບບ​ໃນ​ການ​ກຳນົດ​ແບ່ງ​ເຂດການ​ຂຶ້ນ​ສຳມະໂນ​ດິນ​ນາ


ປະຕິບັດ​ຢູ່​ແຂວງ​ຄຳ​ມ່ວນ ແລະ ແຂວງສະຫວັນ​ນະ​ເຂດ ມາ​ຮອດປັດຈຸບັນ ສາມາດ​ຈັດ​ສັນ​ແບ່ງເຂດ ແລະ ຂຶ້ນ​ສຳມະໂນ​ເນື້ອທີ່ດິນ​ນາ​ໄດ້ 18.243 ຕອນ ເນື້ອທີ່ນາ​ໃນ​ເຂດ​ຊົນລະປະທານ 18.395 ເຮັກຕາ ນອກ​ນັ້ນ ໄດ້​ສຳຫຼວດ​ດິນ​ນາ​ປະຕິບັດໄດ້ 644 ບ້ານໃນ 10 ເມືອງ 2 ແຂວງ ແລະ ໄດ້​ສຸມ​ໃສ່​ຟື້ນ​ຟູ​ສ້ອມແປງຊົນລະປະທານ ເພື່ອ​ສະໜອງ​ນ້ຳໄປ​ຕາມ​ຈຸດ​ສຸມ​ໂຄງການ​ສະບຽງ-ສິນຄ້າ ຄຽງ​ຄູ່​ກັນ​ນັ້ນ ໄດ້ສ້າງ​ໂຄງການ​ແນວ​ພັນ​ເຂົ້າ​ໃນ 10 ແຂວງ ແລະ ທົ່ວ​ປະເທດ ເຊິ່ງມີ​ຄວາມ​ຕ້ອງການ 17.000 ໂຕນ ຮອດ​ປີ 2020 ມີ​ແນວ​ພັນ​ປັບປຸງ ແລະ ແນວ​ພັນ​ດີ ປັດຈຸບັນ ສາມາດ​ຜະລິດ​ແນວ​ພັນ​ປັບປຸງ​ໄດ້ສະເພາະ​ເຂົ້າ​ແນວ​ພັນ​ລຸ້ນ 3 ປະມານ 7.600 ໂຕນ ແລະ ເຂົ້າແນວ​ພັນ​ດີ​ຜະລິດໄດ້ 36.000 ໂຕນ ສ່ວນ​ການ​ສົ່ງເສີມ​ການ​ບໍລິ​ການ​ເຕັກນິກ ແລະ ການ​ຫັນເປັນ​ກົນ​ຈັກ ສາມາດ​ຈັດ​ຕັ້ງ​ປະຕິບັດ​ມີ​ຄວາມ​ຄືບ​ໜ້າ​ໂດຍ​ລວມ.


________
ປະກາດ ຮ່ວມສ້າງຄວາມສຸກສູ່ສັງຄົມລາວ



No comments

Powered by Blogger.