Header Ads

9 ເດືອນໄຊຍະບູລີ ສົ່ງອອກສິນຄ້າມູນຄ່າ 25 ລ້ານໂດລາ ສະຫະລັດ



ການສົ່ງອອກສິນຄ້າ​ໄປຕ່າງປະເທດ ແລະ ຕ່າງແຂວງຂອງ ແຂວງໄຊຍະບູລີ ນັບມື້ເພີ່ມຂຶ້ນ ຍ້ອນມີການສົ່ງເສີມການຄ້າຊາຍແດນທີ່ເປັນທ່າແຮງ ແລະ ແທດເໝາະກັບຈຸດພິເສດຂອງ ແຂວງ ກໍຄື ຜະລິດຕະພັນກະສິກຳ ທີ່ໄດ້ຮັບການປຸງແຕ່ງໃຫ້ເປັນສຳເລັດຮູບ ​ແລະ ມີຄຸນນະພາບ ເຊິ່ງໃນ 9 ເດືອນຜ່ານມາ ແຂວງໄຊຍະບູລີ ສາມາດສົ່ງອອກສິນຄ້າໄປຕ່າງປະເທດ ແລະ ແຂວງໃກ້ຄຽງມີມູນຄ່າທັງໝົດ 25 ລ້ານໂດ​ລາ​ສະຫະລັດ, ທຽບໃສ່ແຜນການປີປະຕິບັດໄດ້ 75%.


ທ່ານ ວາລະໄຊ ເລັ່ງສະຫວັດ ຫົວໜ້າພະແນກອຸດສາຫະກຳ ແລະ ການຄ້າ ໄດ້ໃຫ້ຂໍ້ມູນຕໍ່ນັກຂ່າວວ່າ: ສິນຄ້າທີ່ສົ່ງອອກສ່ວນຫລາຍ ແມ່ນປະເພດຜະລິດຕະພັນກະສິກໍາ ມີມູນຄ່າ 24 ລ້ານ ກ່ວາໂດລາສະຫະລັດ, ເຄື່ອງປ່າຂອງດົງ ມີ 1 ລ້ານໂດລາສະຫະລັດ, ຂະນະທີ່ສິນຄ້ານຳເຂົ້າຈາກຕ່າງປະເທດ ມີມູນຄ່າ 4 ລ້ານກ່ວາໂດລາສະຫະລັດ, ທຽບໃສແຜນການປີ ປະຕິບັດໄດ້ 15,45%. ໃນນີ້, ສິນຄ້ານຳເຂົ້າສ່ວນໃຫ່ຍ ແມ່ນເຄື່ອງອຸປະໂພກ-ບໍລິໂພກ ເຄື່ອງການຜະລິດ ມີ ອຸປະກອນກໍ່ ສ້າງ, ເຄື່ອງໄຟຟ້າ, ມີມູນຄ່າ 1 ລ້ານກ່ວາໂດລາສະຫະລັດ ແລະ ພາຫານະ ແລະ ອຸປະກອນຮັບໃຊ້ອື່ນໆ.


ນອກຈາກສົ່ງອອກສິນຄ້າແລ້ວ, ແຂວງໄຊຍະບູລີ ຍັງໄດ້ຢັ້ງຢືນຜະລິດຕະພັນໄມ້ສຳເລັດຮູບ ເພື່ອການສົ່ງອອກຕ່າງປະເທດ ມີ 13 ໂຮງງານ, ລວມບໍລິມາດທັງໝົດ 1.810 ກ່ວາແມັດກ້ອນ, ມີມູນຄ່າທັງໝົດ 6 ລ້ານກ່ວາໂດລາສະຫະລັດ.



ໃນນີ້, ໄມ້ທຳມະຊາດ ມີບໍລິມາດ 1.178 ແມັດກ້ອນ, ມູນຄ່າ 4 ແສນກ່ວາໂດລາສະຫະລັດ ແລະ ໄມ້ສັກປູກ ມີບໍລິມາດ 632 ກວ່າແມັດກ້ອນ, ມູນຄ່າ 1 ແສນກ່ວາໂດລາ, ໄດ້ຢັ້ງຢືນຜະລິດຕະພັນໄມ້ສຳເລັດຮູບ ພາຍໃນແຂວງໄດ້ຈຳນວນ 30 ຊຸດ, ມີບໍລິມາດທັງໝົດ 2.932 ກ່ວາແມັດກ້ອນ, ມີມູນຄ່າ 1 ລ້ານກ່ວາໂດລາສະຫະລັດ, ໄດ້ອອກເອກະສານອະນຸຍາດສ້າງຕັ້ງ ແລະ ດຳເນີນກິດຈະການ ໂຮງງານອຸດສາຫະກຳ ແລະ ຫັດຖະກຳໄດ້ 87 ແຫ່ງ, ໃນນີ້ ສືບຕໍ່ໃບອານຸຍາດດຳເນີນກິດຈະກຳໂຮງງານ 50 ແຫ່ງ, ອອກອະນຸຍາດສ້າງຕັ້ງໃໝ່ 37 ແຫ່ງ. ປັດຈຸບັນ ທົ່ວແຂວງ ມີໂຮງງານທັງໝົດ 2.166 ແຫ່ງ, ມີໂຮງງານຂະໝາດໃຫ່ຍ 48 ແຫ່ງ, ຂະ ໝາດກາງ 53 ແຫ່ງ, ຂະໝາດນ້ອຍ 326 ແຫ່ງ ແລະ ຜະລິດແບບຄອບຄົວ 1.739 ແຫ່ງ, ມີທຶນທັງໝົດ 1.000 ຕື້ກ່ວາກີບ.


ຫົວໜ້າພະແນກອຸດສາຫະກຳ ແລະ ການຄ້າ ​ໃຫ້​ຮູ້​ຕື່ມ​ວ່າ: ຍອດມູນຄ່າການຈຳໜ່າຍສິນຄ້າຜະລິດຕະພັນອຸດສາຫະກຳ ແລະ ຫັດຖະກຳ ບັນລຸໄດ້ 172 ຕື້ກີບ, ຂະນະທີການຈໍລະຈອນສິນຄ້າພາຍໃນແຂວງ ມີທັງໝົດ 221 ຕື້ກ່ວາກີບ. ຢ່າງ​ໃດ​ກໍ​ຕາມ ການ​ຄ້າ​ແຂວງ ຈະສືບຕໍ່ປະສານສົມທົບກັບຂະແໜງການທີ່ກ່ຽວຂ້ອງ ເພື່ອປັບປຸງຄຸນນະພາບຂອງຜະລິດຕະພັນພາຍໃນ ໃຫ້ເປັນສຳເລັດຮູບເທື່ອລະກ້າວ, ສະໜອງຂໍ້ມູນຂ່າວສານດ້ານການຕະຫລາດ ໃຫ້ແກ່ຜູ້ຜະລິດ ແລະ ສົ່ງອອກໃນ 3 ເດືອນທ້າຍປີ ຄາດວ່າການສົ່ງອອກສິນຄ້າ ຈະມີມູນຄ່າ 8 ລ້ານກ່ວາໂດລາສະຫະລັດ ແລະ ການນຳເຂົ້າສິນຄ້າຈາກຕ່າງປະເທດ ຈະມີມູນຄ່າຫລາຍກວ່າ 13 ກ່ວາໂດລາສະຫະລັດ.
________
ປະກາດ ຮ່ວມສ້າງຄວາມສຸກສູ່ສັງຄົມລາວ



No comments

Powered by Blogger.