Header Ads

ກອງປະຊຸມ ລັດຖະມົນຕີ ຕ່າງປະເທດ FEALAC Troika ຄັ້ງທີ 2





ໃນວັນທີ 22 ກັນຍາ 2017, ທີ່ນິວຢອກ ສ.ອາເມລິກາ, ທ່ານ ສະເຫລີມໄຊ ກົມມະສິດລັດຖະມົນຕີ ກະຊວງການຕ່າງປະເທດ ໄດ້ຮັບກຽດເປັນປະທານ ຮ່ວມກັບກົວເຕມາລາ ຈັດກອງປະຊຸມລັດຖະມົນຕີ ຕ່າງປະເທດ, ປະເທດປະສານງານ ຂອງຂອບການຮ່ວມມື ອາຊີຕາເວັນອອກ-ອາເມລິກາລາຕິນ (FEALAC Troika) ຄັ້ງທີ 2, ເຊິ່ງມີບັນດາລັດຖະມົນຕີ ຕ່າງປະເທດ FEALAC Troika, ພ້ອມດ້ວຍຄະນະຜູ້ແທນເຂົ້າຮ່ວມ.


ຈຸດປະສົງຂອງກອງປະຊຸມ ແມ່ນເພື່ອຊຸກຍູ້ ການຮັດແໜ້ນ ສາຍພົວພັນຮ່ວມມື ລະຫວ່າງ ສອງພາກພື້ນ ໃຫ້ແໜ້ນແຟ້ນຍິ່ງຂຶ້ນ ແລະ ກ້າວເຂົ້າສູ່ລວງເລິກ ເພື່ອເປັນແຮງຊຸກຍູ້ ໃຫ້ແກ່ການພັດທະນາ ໃນສອງພາກພື້ນ ຢ່າງມີປະສິດທິພາບ ແລະ ໄດ້ຮັບຜົນປະໂຫຍດສູງສຸດ. ໃນນັ້ນ, ບັນດາລັດຖະມົນຕີ ໄດ້ຮ່ວມກັນ ປຶກສາຫາລື ແລະ ທົບທວນຄືນ ກ່ຽວກັບຖະແຫລງການ ປູຊານ, ແຜນການປະຕິບັດງານສະບັບ​ໃໝ່ ຟີແລັກໃນໄລຍະ 5 ປີຕໍ່ໜ້າ ແຕ່ປີ 2017-2021 ແລະ ການສ້າງຕັ້ງ ກອງທຶນຟີແລັກ ທີ່ ໄດ້ຖືກຮັບຮອງເອົາ ໃນກອງປະຊຸມລັດຖະມົນຕີ ຕ່າງປະເທດ ຟີແລັກຄັ້ງທີ 8 ທີ່ ປູຊານ, ສ.ເກົາຫລີ ໃນວັນທີ 31 ສິງຫາ 2017 ທີ່ຜ່ານມາ.

ນອກຈາກນີ້, ທ່ານ ສະເຫລີມໄຊ ກົມມະສິດ ຍັງໄດ້ແຈ້ງຕໍ່ ກອງປະຊຸມວ່າ ສປປ ລາວ ຈະເປັນເຈົ້າພາບ ຈັດກອງປະຊຸມ ເຈົ້າໜ້າທີ່ອາວຸໂສ ຟີແລັກ ຄັ້ງທີ 19 ຢູ່ນະຄອນຫລວງວຽງຈັນ, ໃນປີ 2018 ແລະ ເປັນປະທານຮ່ວມ ກອງປະຊຸມລັດຖະມົນຕີ ຕ່າງປະເທດ ຟີແລັກ ຄັ້ງທີ 9 ຈະຈັດຂຶ້ນ ໃນປີ 2019 ຢູ່ ພາກພື້ນອາເມລິກາ-ລາຕິນ ໃນຖານະເປັນປະເທດ ປະສານງານຝ່າຍ ອາຊີຕາເວັນອອກ ສຳລັບສົກປີ 2017-2019.

ກອງປະຊຸມ FEALAC Troika ແມ່ນກອງປະຊຸມລັດຖະມົນຕີ ຕ່າງປະເທດຟີແລັກ ແບບ 3 ຝ່າຍ ຄື: ປະເທດປະສານງານຜູ້ເກົ່າ, ຜູ້ປັດຈຸບັນ ແລະ ຜູ້ຕໍ່ໄປ ປະຈຳແຕ່ລະພາກພື້ນ, ເຊິ່ງຈະຈັດຄຽງຄູ່ກັບກອງປະຊຸມ ສະມັດຊາໃຫຍ່ຂອງ ສປຊ ໃນເດືອນກັນຍາ ຂອງທຸກໆປີ.


ທີ່ມາຂ່າວ: ຂປລ

________
ປະກາດ ຮ່ວມສ້າງຄວາມສຸກສູ່ສັງຄົມລາວ



No comments

Powered by Blogger.