Header Ads

ອາສາສະໝັກ ຍີ່ປຸ່ນ ສຳເລັດການປະຕິບັດໜ້າທີ່ ຢູ່ 4 ແຂວງຂອງລາວ



ໃນວັນ​ທີ 21 ກັນຍາ 2017 ນີ້, ທ່າ​ນ ນາງ ສາຍ​ໝອນ​ຄຳ ມັ່ງ​ໜໍ່​ເມກ ຮອງ​ຫົວໜ້າ​ກົມ​ຮ່ວມ​ມື​ສາກົນ, ກະຊວງ​ແຜນການ ​ແລະ ການ​ລົງທຶນ ​ໄດ້​​ໃຫ້​ກຽດ​ຕ້ອນຮັບການ​ເຂົ້າ​ຢ້ຽມ​ອຳ​ລາ ຂອງ​ອາສາ​ສະໝັກ​ຍີ່ປຸ່ນ 4 ທ່ານ, ນຳ​ໂດຍ ທ່ານ ຊູນ​ຊູ​ເກະ ຊາ​ກຸ​ໂດະ ຮອງ​ຜູ້ຕາງໜ້າ​ອົງການ​ໄຈ​ກາ ປະຈຳ​ ລາວ, ​ໃນ​ໂອກາດ​ສຳ​ເລັດ​ການ​ປະຕິບັດ​ໜ້າ​ທີ່ ​ໃນການປະກອບສ່ວນຊ່ວຍ​ເຫລືອວຽກ​ງານ​ດ້ານ​ການ​ສຶກສາ-ກິລາ, ສາທາລະນະ​ສຸກ, ສິ່ງ​ແວດ​ລ້ອມ ​ແລະ ອື່ນໆ ຢູ່ ​ແຂວງ​ໄຊ​ຍະ​ບູລີ, ​ແຂວງ​ຫລວງ​ພະ​ບາງ, ແຂວງ​ອັດ​ຕະປື ​ແລະ ​ແຂວງນະຄອນຫລວງ​ວຽງ​ຈັນ.

ໃນໂອກາດ​ດັ່ງກ່າວ,  ທ່າ​ນ ນາງ ສາຍ​ໝອນ​ຄຳ ມັ່ງ​ໜໍ່​ເມກ ​ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ ​ແລະ ຊົມ​ເຊີຍຕໍ່​ຜົນສຳ​ເລັດ​ ໃນ​ການ​​ປະກອບ​ສ່ວນຊ່ວຍ​ເຫລືອ ພັດທະນາ​ເສດຖະກິດ-ສັງຄົມ ຂອງ ສປປ ລາວ ກໍ​ຄື ​​ແຂວງ​ໄຊ​ຍະ​ບູລີ, ​ຫລວງ​ພະ​ບາງ, ​ອັດ​ຕະປື ​ແລະ ​ແຂວງ​ວຽງ​ຈັນ ​ໃຫ້​ໄດ້​ຮັບ​ການ​ພັດທະນາ ​ແລະ ອື່ນໆ. ພ້ອມ​ອວຍພອນໃຫ້​ອາສາ​ສະໝັກ​ທັງ 4 ທ່ານ ຈົ່ງ​ປະສົບ​ຜົນສຳ​ເລັດ​ໃນ​ການ​ປະຕິບັດ​ໜ້າ​ທີ່​ວຽກ​ງານອັນ​ໃໝ່ ​ແລະ ກັບ​ຄືນ​ປະ​ເທດດ້ວຍ​ຄວາມ​ສະຫວັດດີ​ພາບ.ໃນ​ໂອກາດ​ດຽວ​ກັນ, ຕາງໜ້າອາສາ​ສະໝັກ​ ກໍໄດ້​ສະ​ແດງ​ຄວາມ​ຂອບ​ໃຈ ຕໍ່​ທ່ານ​ ນາງ  ສາຍ​ໝອນ​ຄຳ ມັ່ງ​ໜໍ່​ເມກ ທີ່​ໄດ້​ສະຫລະ​ເວລາອັນ​ມີຄ່າ​ໃຫ້ການ​ຕ້ອນຮັບ​ອັນ​ອົບ​ອຸ່ນໃນ​ຄັ້ງ​ນີ້,


ພ້ອມ​ທັງ​ລາຍ​ງານກ່ຽວ​ກັບ​ການ​ເຄື່ອນ​ໄຫວ​ວຽກ​ງານ ​​ໃນ​​ຂະ​ແໜງ​ການຕ່າງໆ ​ໃນ​ໄລຍະ 2 ປີ ຜ່ານ​ມາ ​ໃຫ້​ທ່ານ ນາງ  ສາຍ​ໝອນ​ຄຳ ມັ່ງ​ໜໍ່​ເມ ຊາບ. ປັດຈຸບັນ ຍັງມີ​ອາສາ​ສະໝັກ​ຍີ່ປຸ່ນ 64 ທ່ານ ປະຕິບັດ​ໜ້າ​ທີ່​ ໃນ​ຂະ​ແໜງ​ການ​ຕ່າງໆ ຢູ່ 16 ​ແຂວງ ຂອງສປປ ລາວ, ​​ເຊິ່ງບັນດາ​ອາສາ​ສະໝັກດັ່ງກ່າວ, ລ້ວນ​ແລ້ວ​ແຕ່​ເປັນ​ຜູ້​ທີ່ມີ​ປະສົບ​ການ, ມີ​ຄວາມ​ຮູ້​ຄວາມ​ສາມາດ ທາງ​ດ້ານ​ສາທາລະນະ​ສຸກ, ການ​ສຶກສາ ​ແລະ ກິລາ, ກະສິກຳ ​ແລະ ປ່າ​ໄມ້, ວັດທະນະທຳ, ສິ່ງ​ແວດ​ລ້ອມ, ວິສະວະກຳ​ພື້ນຖານ​ໂຄງ​ລ່າງ, ພັດທະນາ​ຊົນນະບົດ ​ແລະ ອື່ນໆ.


 ຂ່າວ: ຫລ້າ ພາບ: ​ເກດສະໜາ
________
ປະກາດ ຮ່ວມສ້າງຄວາມສຸກສູ່ສັງຄົມລາວ



No comments

Powered by Blogger.