Header Ads

ພິທີໂຮມຊຸມນຸມ ສະເຫຼີມສະຫຼອງ 70 ປີ ວັນການທູດລາວ



ພິທີໂຮມຊຸມນຸມ ສະເຫຼີມສະຫຼອງ 70 ປີ ວັນການທູດລາວ

ໃນວັນທີ 12 ຕຸລາ 2015 ທີ່ຫໍປະຊຸມ ແຫ່ງຊາດ ກະຊວງການຕ່າງປະເທດ ໄດ້ຈັດພິທີ ສະເຫຼີມສະຫຼອງ ວັນການທູກລາວ ຄົບຮອບ 70 ປີ (12/10/1945-12/10/2015) ເປັນກຽດເຂົ້າຮ່ວມ ຂອງທ່ານ ຈູມມະລີ ໄຊຍະສອນ, ເລຂາທິການໃຫ່ຍ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ມີບັນດາ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ບັນດາ ທ່ານ ຜູ້ນຳພັກ-ລັດ, ສະມາຊິກ ສະພາແຫ່ງຊາດ, ບັນດາ ທ່ານ ອະດີດຜູ້ນຳຂັ້ນສູງ, ພະນັກງານປະຕິວັດອາວຸໂສ, ພະນັກງານ, ທະຫານ-ຕຳຫຼວດ ແລະ ແຂກຖືກເຊີນ ເຂົ້າຮ່ວມ ຫຼາຍກວ່າ 1.800 ຄົນ.

ໃນພິທີ, ທ່ານ ທອງລຸນ ສີສຸລິດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ, ໄດ້ກ່າວລາຍງານ ການເຄື່ອນໄຫວ ການທູດລາວ ໃນໄລຍະ 70 ປີຜ່ານມາວ່າ: ການປະກາດເອກະລາດ ເທື່ອທໍາອິດ ຂອງປະເທດລາວ ໃນວັນທີ 12 ຕຸລາ 1945 ແມ່ນໝາກຜົນ ແຫ່ງການຕໍ່ສູ້ ດ້ວຍກຳລັງອາວຸດ, ການຕໍ່ສູ້ ທາງດ້ານການເມືອງ ຂອງປະຊາຊົນ ລາວ ບັນດາເຜົ່າ ໂດຍນຳພາ ຂອງປະທານ ໄກສອນ ພົມວິຫານ ແລະ ປະທານ ສຸພານຸວົງ ຊຶ່ງເປັນຂີດໝາຍ ແຫ່ງການເລີ່ມຕົ້ນ ຂອງວຽກງານການຕ່າງປະເທດ ຂອງລາວ ຈົນເຖິງປະຈຸບັນ. ສະນັ້ນ, ໂດຍການ ຄົ້ນຄວ້າ ແລະ ສະເໜີ ຂອງກະຊວງການຕ່າງປະເທດ ແລະ ຄະນະພົວພັນ ຕ່າງປະເທດສູນກາງພັກ, ກົມການເມືອງສູນກາງພັກ ຈຶ່ງໄດ້ຕົກລົງ ເຫັນດີກຳນົດເອົາວັນທີ 12 ຕຸລາ 1945 ເປັນວັນການທູດລາວ ຢ່າງເປັນທາງການ.

ຕະຫຼອດໄລຍະ 70 ປີຜ່ານມາ ພາຍໃຕ້ການນຳພາ ອັນສະຫຼາດສ່ອງໃສ ແລະ ຖືກຕ້ອງ ຂອງພັກປະຊາຊົນປະຕິບັດລາວ, ຂະແໜງການຕ່າງປະເທດ ໄດ້ມີການເຕີບໃຫ່ຍ ຂະຫຍາຍຕົວ ເປັນກ້າວໆ ທັງດ້ານປະລິມານ ແລະ ຄຸນນະພາບ. ໂດຍຍຶດໝັ້ນ ແນວທາງການຕ່າງປະເທດ ສັນຕິພາບ ເອກະລາດ ມິດຕະພາບ ແລະ ການຮ່ວມມື ຢ່າງສະເໝີຕົ້ນ ສະເໝີປາຍ ແລະ ປະຕິບັດ ນະໂຍບາຍ ເປີດກວ້າງ ການພົວພັນຮ່ວມມື ແບບຫຼາຍທິດ, ຫຼາຍຝ່າຍ ແລະ ຫຼາຍຮູບແບບ ຕາມທິດນຳ “ເພີ່ມມິດ ຫຼຸດຜ່ອນສັດຕູ”. ປະຈຸບັນ ສປປ ລາວ ໄດ້ມີສາຍພົວພັນ ການທູດກັບ 138 ປະເທດ, ມີສາຍພົວພັນ ກັບ ພັກການເມືອງທົ່ວໂລກ 124 ພັກ, ມີສຳນັກງານ ຜູ້ຕາງໜ້າການທູດ ຂອງລາວ ຢູ່ຕ່າງປະເທດ 38 ແຫ່ງ. ໃນນັ້ນ, ມີສະຖານເອກອັກຄະລັດສະທູດ 26 ແຫ່ງ, ສໍານັກງານ ຜູ້ຕາງໜ້າຖາວອນ 3 ແຫ່ງ, ສະຖານກົງສຸນໃຫ່ຍ 8 ແຫ່ງ, ຫ້ອງການກົງສຸນ 1 ແຫ່ງ, ມີດ່ານສາກົນ 27 ແຫ່ງ, ກົງສຸນກິດຕິມະສັກ ຂອງ ສປປ ລາວ ຢູ່ຕ່າງປະເທດ 17 ປະເທດ, ກົງສຸນກິດຕິມະສັກ ຕ່າງປະເທດຢູ່ລາວ ມີ 15 ປະເທດ ແລະ ມີການພົວພັນ ດ້ານການຄ້າ ກັບຫຼາຍກວ່າ 50 ປະເທດໃນໂລກ. ສປປ ລາວ ໄດ້ເຄື່ອນໄຫວ ວຽກງານການຕ່າງປະເທດ ຢ່າງມີຈຸດສຸມ ແລະ ບຸກທະລຸ ຊຶ່ງມີຜົນສຳເລັດໃນຫຼາຍດ້ານ ເປັນຕົ້ນ ການເຄື່ອນ ໄຫວການທູດສອງຝ່າຍ, ຫຼາຍຝ່າຍ ແລະ ການຮ່ວມມືກັບສາກົນ.


ໃນໂອກາດ ອັນສະຫງ່າລາສີນີ້ ທ່ານ ຈູມມາລີ ໄຊຍະສອນ ໄດ້ກ່າວຍ້ອງຍໍຊົມເຊີຍ ຕໍ່ຜົນສຳເລັດ ທີ່ຂະແໜງການຕ່າງປະເທດຍາດມາໄດ້ ໃນຕະຫຼອດໄລຍະ 70 ປີຜ່ານມາ ພ້ອມທັງ ໃຫ້ທິດຊີ້ນຳ ຕໍ່ ຂະແໜງການຕ່າງປະເທດ ຈົ່ງສືບຕໍ່ຮັກສາມູນເຊື້ອທີ່ດີ ທີ່ຍາດມາໄດ້ໃນໄລຍະຜ່ານມາ, ສືບຕໍ່ ເປັນເສນາທິການ ດ້ານການຕ່າງປະເທດ ໃຫ້ແກ່ພັກ-ລັດ ຈົ່ງພ້ອມພາກັນ ບຸກບືນກ້າວຂຶ້ນ ຍາດເອົາຜົນສຳເລັດ ອັນໃຫ່ຍຫຼວງກວ່າເກົ່າ, ສູ້ຊົນສຳເລັດ ໜ້າທີ່ອັນມີກຽດ ຂອງຕົນ ພາຍໃຕ້ຄຳຂວັນ: “ການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ສ້າງສາ ພັດທະນາ ປະເທດຊາດ”.ໂອກາດດຽວກັນ, ທ່ານປະທານປະເທດ ຍັງໄດ້ຕາງໜ້າ ໃຫ້ພັກ-ລັດຖະບານ ປະດັບຫຼຽນຄຳແຫ່ງຊາດ ໃຫ້ແກ່ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ເພື່ອເປັນການຢັ້ງຢືນ ເຖິງຜົນງານຂອງ ຂະແໜງການຕ່າງປະເທດ ທີ່ຍາດມາໄດ້ ໃນໄລຍະ 70 ປີຜ່ານມາ.

ແຫລ່ງ: ຫ້ອງວ່າການລັດຖະບານ
ຜູ້ຂຽນ: ຂ່າວ/ພາບ: ບຸນສະຖຽນ ເກິ່ງແກ້ວບຸນນອງ/ອານຸພາບ ອານຸລັກ




No comments

Powered by Blogger.