[Latest News][6]

ຂ່າວລັດຖະບານ

ນວຈ ແຈ້ງຄ່າຝາກລົດ ແລະ ຂໍ້ຫ້າມ ໄລຍະບຸນອອກພັນສາ 2558, ຝ່າຝືນ ປັບໃໝໃສ່ໂທດ!


ເພື່ອ​ຮັບປະກັນ​ຄວາມ​ສະຫງົບຄວາມ​ເປັນ​ລະບຽບ​ຮຽບ​ຮ້ອຍ ແລະ ຄວາມ​ປອດ​ໄພ​ຮອບດ້ານໃຫ້​ແກ່​ການ​ນຳ​ພັກ-ລັດ ມວນ​ຊົນນັກ​ທ່ອງ​ທ່ຽວ​ພາຍ​ໃນ ແລະ ຕ່າງປະເທດ​ທີ່​ມາ​ຫຼິ້ນ​ບຸນ​ປະເພນີ​ຂອງລາວ​ເຮົາ ​ໃຫ້​ມີ​ຄວາມ​ເບີກບານມ່ວນຊື່ນ ທີ່​ເຕັມ​ໄປ​ດ້ວຍ​ບັນ​ຍາກາດ​ແຫ່ງ​ຄວາມ​ສະຫງົບ ຄວາມປອດ​ໄພ​ທາງ​ດ້ານ​ຊີວິດ ແລະ ຊັບສິນ.

ບຸນ​ອອກ​ພັນ​ສາ​ປະ​ວໍລະນາ ແລະ ບຸນຊ່ວງເຮືອ​ເປັນ​ບຸນ​ປະ​ເພນີ​ອັນ​ດີງາມ​ທີ່​ປະຊາຊົນ​ລາວ​ບັນດາ​ເຜົ່າ ​ເວົ້າ​ລວມ ເວົ້າ​ສະເພາະ ຊາວ​ນະຄອນຫຼວງ​ວຽງ​ຈັນ ​ເຄີຍປະຕິບັດ​ສືບ​ທອດ​ກັນ​ມາ​ແຕ່​ດົນນານ ​ອັນ​ໄດ້​ສະແດງ​ເຖິງ​ຮີດຄອງປະເພນີ ວິຖີ​ຊີວິດ ແລະ ວັດ​ທະນະ​ທຳ​ຂອງ​ຄົນ​ລາວ ບຸນ​ດັ່ງກ່າວ ຍັງ​ມີ​ການ​ວາງ​ຂາຍ​ສິນຄ້າ ສະແດງ​ສິລະ​ປະ ແລະ ອື່ນໆ ໂດຍມີ​ການ​ນຳ​ພັກ-ລັດ ແຂກ​ພາຍ​ໃນ ແລະ ຕ່າງປະເທດ ຕະຫຼອດ​ເຖິງມວນ​ຊົນ​ເຂົ້າ​ຮ່ວມ​ຢ່າງ​ຫຼວງຫຼາຍໃນ​ແຕ່​ລະ​ປີ ສະນັ້ນ ເພື່ອ​ຮັບ​ປະກັນ​ໄລຍະ​ງານ​ບຸນ​ ທີ່​ຈະ​ໄດ້​ຈັດຂຶ້ນ​ລະຫວ່າງ​ວັນ​ທີ 22-28 ຕຸລາ 2015 ນີ້ ໃຫ້​ມີ​ຄວາມ​ສະຫງົບປອດ​ໄພ ມີ​ຄວາມ​ເປັນ​ລະບຽບຮຽບ​ຮ້ອຍ​ທາງ​ດ້ານ​ສັງຄົມ ແລະ ບໍ່​ໃຫ້​ມີ​ເຫດການ​ທີ່​ຮ້າຍ​ແຮງ​ເກີດຂຶ້ນ ປະທານ​ຄະນະ​ກຳມະການຈັດ​ງານ ຈຶ່ງ​ໄດ້​ອອກ​ກົດ​ລະບຽບຊົ່ວຄາວ​ ວ່າ​ດ້ວຍ​ການ​ຄຸ້ມ​ຄອງງານ​ບຸນ​ອອກ​ພັນ​ສາ​ປະ​ວໍລະນາ ແລະ ບຸນຊ່ວງເຮືອ​ປະເພນີ ປະຈຳປີ 2015 ມີ​ດັ່ງນີ້:

ຂອບ​ເຂດ​ສະຖານທີ່​ຂອງ​ການຈັດ​ງານ​ບຸນ ແມ່ນ​ກຳນົດ​ຂອບເຂດ​ຕາມ​ເສັ້ນທາງ​ຖະໜົນ​ເຈົ້າຟ້າ​ງຸ່ມ ແຕ່​ເຂດ​ບ້ານ​ສີ​ຖານ​ເໜືອ (ເມືອງ​ສີ​ໂຄດ​ຕະບອງ) ຫາ​ໂຮງໝໍ​ມະໂຫສົດ (ເມືອງ​ສີ​ສັດຕະນາກ) ສ່ວນ​ຂອບ​ເຂດ​ສະຖານທີ່ຈັດ​ງານ​ຕະຫຼາດນັດ​ ແມ່ນ​ໄດ້​ກຳນົດ​ເອົາ​ບໍລິເວນ​ຕາມ​ເສັ້ນທາງ​ຖະໜົນ​ເຈົ້າຟ້າ​ງຸ່ມ ແຕ່​ເຂດ​ບ້ານ​ສີຖານ​ເໜືອຫາ​ໂຮງໝໍ​ມະໂຫສົດ ເຂດ​ສວນ​ເຈົ້າ​ອະນຸວົງ ຕາມ​ເສັ້ນທາງ​ແຄມ​ຂອງ​ທີ່​ສ້າງ​ໃໝ່ ແລະ ພັກ​ລຸ່ມ​ແຄມ​ຂອງ​ກັ້ນ​ຕາຝັ່ງເຈື່ອນ ສຳລັບ​ສະຖານທີ່​ບໍລິການຮັບ​ຝາກ​ລົດ ​ແມ່ນ​ກຳນົດ​ເອົາ​ແຕ່ໂຮງຮຽນ​ມັດທະຍົມ​ສີ​ໂຄດ​ຕະບອງ ໄປ​ຫາ​ໂຮງໝໍ​ມະໂຫສົດ ແລະ ຕາມ​ເສັ້ນທາງ​ຊອຍ​ຕ່າງໆທີ່​ທາງ​ຄະນະ​ກຳມະການ​ທີ່​ກ່ຽວຂ້ອງ​ໄດ້​ກຳນົດ​ໄວ້ (ຄ່າ​ຝາກ​ລົດ: ລົດ​ໃຫຍ່ 15.000 ກີບ ລົດ​ຕຸກໆ-ຈຳ​ໂບ້ 10.000 ກີບ ລົດຈັກ 5.000 ກີບ ແລະ ລົດຖີບ 2.000 ກີບ​ຕໍ່​ຄັນ​ຕໍ່​ຄັ້ງ).

ບັນຫາ​ທີ່​ສຳຄັນ​ເພື່ອ​ເປັນ​ການປະກອບສ່ວນ ​ໃນ​ການ​ປົກ​ປັກ​ຮັກສາ​ຄວາມ​ປອດ​ໄພ ແລະ ຄວາມເປັນ​ລະບຽບ​ຮຽບ​ຮ້ອຍ​ຕ່າງໆ​ນັ້ນ ໃຫ້​ແຕ່​ລະ​ອົງ​ການຈັດຕັ້ງ​ທີ່​ເຂົ້າມາ​ຮ່ວມ​ງານ​ຕະຫຼາດນັດ ​ຕ້ອງ​ຈັດ​ຕັ້ງ​ເວນຍາມ​ຂອບ​ເຂດ​ຮ້ານ​ຂອງຕົນ ໃນ​ກໍລະນີ​ມີ​ບັນຫາ​ເກີດ​ຂຶ້ນ ຜູ້​ຮັບຜິດຊອບ​ຮ້ານ​ຕ້ອງ​ແກ້​ໄຂທັນທີ ແລະ ແຈ້ງ​ຂໍ​ຄວາມ​ຊ່ວຍເຫຼືອ​ຈາກ​ເຈົ້າ​ໜ້າທີ່​ປ້ອງ​ກັນຄວາມ​ສະຫງົບ ທີ່​ພວມ​ປະຕິບັດງານ​ໄດ້​ທຸກ​ເວລາ ຫຼື ຄະນະ​ສູນບັນຊາ​ການ​ປະຈຳການ​ແຕ່​ລະຈຸດ​ຕະຫຼາດນັດ ​ເພື່ອ​ຂໍ​ຄວາມ​ຮ່ວມ​ມື​ປະສານ​ງານ​ຊ່ວຍ.

ສຳລັບ​ຂໍ້​ຫ້າມ​ຕ່າງໆ​ໃນ​ໄລຍະງານ​ບຸນ​ມີ​ທັງ​ໝົດ 12 ຂໍ້ຄື: 

1. ຫ້າມບໍ່​ໃຫ້​ມີ​ການ​ໂຄສະນາ​ທຸກ​ຮູບແບບ​ທີ່​ຜິດ​ຕໍ່​ກົດໝາຍ​ຂອງ ​ສປປ ລາວ 
2. ຫ້າມ​ຂາຍ ຫຼື ນຳ​ເອົາ​ອາວຸດ​ທຸກ​ປະເພດ ​ລວມທັງ​ງ້າວ ໜ້າ ກະຖຸນ ສະໜັບມື ໂຄມໄຟລອຍ​ເຂົ້າ​ໄປ​ພາຍ​ໃນ​ງານ ເວັ້ນເສຍ​ແຕ່​ເຈົ້າ​ໜ້າທີ່​ໄດ້​ຮັບ​ອະນຸຍາດ 
3. ຫ້າມ​ຂາຍ ແລະ ນຳ​ເອົາຢາ​ເສບ​ຕິດ ທາດ​ເບື່ອ ສານ​ເຄ​ມີ ທີ່​ອອກ​ລິດ​ຕໍ່​ລະບົບ​ປະສາດ​ທຸກຊະນິດ 
4. ຫ້າມຂາຍບັ້ງ​ກະໂພກ ແລະ ສິ່ງ​ທີ່ເກີດ​ສຽງ​ດັງ​ເກີນ​ຂອບ​ເຂດ​ເຂົ້າມາ​ວາງ​ຂາຍ 
5. ຫ້າມ​ເອົາ​ຜະລິດຕະ​ພັນ​ທີ່​ລອກ​ຮຽນ​ແບບ (ຜ້າ​ສິ້ນລາວ) ເຂົ້າ​ມາ​ວາງ​ຂາຍ 
6. ຫ້າມວາງ​ຂາຍເຄື່ອງ​ເກີນ​ຂອບ​ເຂດອອກ​ມາ​ໜ້າ​ຮ້ານ ​ທີ່​ຄະນະ​ກຳ​ມະການ​ຈັດ​ງານ​ຕະຫຼາດນັດ​ກຳນົດໄວ້ 
7. ຫ້າມ​ຂາຍ ແລະ ນຳ​ເອົາ​ຜະລິດ​ຕະ​ພັນ​ວັດທະນະທຳ​ທີ່​ລາມົກ ແລະ ເຊື່ອມ​ຊາມ​ຕ່າງໆ 
ຫ້າມຫຼິ້ນ​ການ​ພະນັນ​ທຸກ​ປະເພດ 
8. ຫ້າມ​ຂາຍເຄື່ອງ​ຊະຊາຍ​ໂດຍ​ບໍ່ໄດ້​ຮັບ​ອະນຸຍາດ​ຈາກ​ຄະນະ​ກຳມະ​ການ​ຈັດ​ງານ 
9. ຫ້າມ​ບໍ່​ໃຫ້​ມີການ​ອາ​ລະ​ວາດ​ຕີ​ກັນ 
10. ຫ້າມ​ດື່ມສິ່ງ​ມຶນເມົາ​ເກີນ​ຂອບ​ເຂດ ຖ້າຫາກ​ຜູ້​ໃດ​ລະເມີດ ​ຈະ​ຖືກ​ເຈົ້າໜ້າທີ່​ກ່າວ​ເຕືອນ ຫຼື ນຳ​ຕົວ​ໄປພັກຜ່ອນ 
11. ຫ້າມ​ບຸກຄົນ ວັດ ສຳນັກ​ງານ-ອົງການ ອຳນາດ​ການປົກຄອງ​ບ້ານ ກີດຂວາງ​ການ​ຈັດສັນ​ສະຖານທີ່ວາງສະແດງ​ຂາຍສິນຄ້າ ​ຂອງ​ຄະນະ​ກຳມະການ​ຈັດ​ງານ​ຕະຫຼາດນັດ​ ແລະ 
12. ຫ້າມ​ຕອກເຫຼັກ ຫຼື ສິ່ງ​ຂອງ​ຕ່າງໆ​ໃສ່​ພື້ນຢ່າງ​ເດັດຂາດ.

ຖ້າ​ຫາກ​ບຸກຄົນ ຫຼື ພາກສ່ວນໃດ​ໜຶ່ງ​ທີ່​ຝ່າຝືນ​ກົດ​ລະບຽບ ແລະ ຂໍ້​ກຳນົດ​ຕ່າງໆ​ທີ່​ປະທານ​ຄະນະກຳມະການ​ຈັດ​ງານ​ໄດ້​ວາງ​ອອກນັ້ນ​ ຈະ​ໄດ້​ຖືກ​ກ່າວ​ເຕືອນ ສຶກ​ສາອົບຮົມ ປັບ​ໃໝ ແລະ ປະຕິບັດວິໄນ​ຕາມ​ສະຖານ​ໜັກ ຫຼື ເບົາຂອງ​ຄວາມ​ຜິດ ແລະ ຕາມ​ລະບຽບ​ກົດໝາຍ​ຂອງ​ລັດ ໃນ​ກໍລະນີມີ​ການ​ລະເມີດ​ກົດ​ລະບຽບ ຂໍ້​ກຳນົດ​ຮ້າຍ​ແຮງ​ ແມ່ນ​ຈະ​ບໍ່​ມີ​ການກ່າວ​ເຕືອນ ແລະ ທຸກ​ຄົນ​ຕ້ອງເປັນ​ເຈົ້າ​ການ​ເຮັດ​ວຽກ​ງານ​ປ້ອງກັນ​ຄວາມ​ສະຫງົບ​ສຸກ ນັບຖື​ກົດລະບຽບ​ທີ່​ທາງ​ຄະນະ​ກຳມະການວາງ​ອອກ​ຢ່າງ​ເຂັ້ມ​ງວດ ຖ້າ​ຜູ້​ໃດຫາກ​ລະເມີດ​ຂໍ້​ຫ້າມ​ໃດ​ໜຶ່ງ​ ແມ່ນຈະ​ຖືກ​ປັບ​ໃໝ​ແຕ່ 50.000 ກີບ ຫາ 1 ລ້ານ​ກີບ ແລ້ວແຕ່​ກໍລະນີ​ໜັກ ຫຼື ເບົາ ຫຼື ກັກ​ຕົວ​ສືບສວນຕາມ​ສະຖານ​ຄວາມ​ຜິດ.

ທີ່ມາ: ວຽງຈັນໃໝ່

ປະກາດ Pakaad: ຮ່ວມສ້າງຄວາມສຸກສູ່ສັງຄົມລາວ

ສົນໃຈໂຄສະນາ ແລະ ປະຊາສຳພັນໂທ 0305898959

No comments:

Post a Comment

Start typing and press Enter to search

ຂ່າວໜ້າ 1