ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງສີສັດຕະນາກ ນະຄອນຫຼວງວຽງຈັນ ຈັບຜູ້ຄ້າຂາຍຢາເສບຕິດປະເພດຢາບ້າລາຍຍ່ອຍໄດ້ 1 ຄົນ ພ້ອມຂອງກາງ 33 ເມັດ ຈາກນັ້ນ, ຂະຫຍາຍຜົນຕິດຕາມຈັບຕົວຜູ້ຮ່ວມຂະບວນການໄດ້ອີກ 3 ຄົນ ຍິງ 1 ຄົນ ພ້ອມຢຶດຂອງກາງຢາປະເພດຢາບ້າໄດ້ ຈຳນວນ 6.000 ເມັດ ໃນວັນທີ 5 ພະຈິກ 2018.


ເຈົ້າໜ້າທີ່ ປກສ ເມືອງສີສັດຕະນາກ ໃຫ້ຮູ້ວ່າ: ໃນເບື້ອງຕົ້ນແມ່ນຈັບຕົວເປົ້າໝາຍຄ້າຂາຍຢາບ້າລາຍຍ່ອຍ ຊື່ ທ້າວ ພຸດສະຫວັນ ອາຍຸ 27 ຢູ່ບ້ານໂນນຄໍ້ເໜືອ ເມືອງໄຊເສດຖາ ນະຄອນ ຫຼວງວຽງຈັນ, ຜ່ານການສອບສວນ ຜູ້ກ່ຽວໄດ້ຊັດທອດຈົນສາມາດຈັບຜູ້ຮ່ວມຂະບວນການໄດ້ອີກ 3 ຄົນ ມີ ທ້າວ ວຽງສາຄອນ ຫຼື ໂບ້ ຢູ່ບ້ານຫົວຂົວ ເມືອງໄຊເສດຖາ, ນາງ ນູເຮີ ອາຍຸ 21 ປີ ຢູ່ບ້ານ ວັງຊາຍ ເມືອງໄຊເສດຖາ ແລະ ທ້າວ ກົງຢາງ ອາຍຸ 25 ປີ ຢູ່ບ້ານສາຍນໍ້າເງິນ ເມືອງໄຊທານີ ນະຄອນຫຼວງວຽງຈັນ ພ້ອມຂອງກາງຢາບ້າ 3 ມັດ ເທົ່າກັບ 6.000 ເມັດ.

ທ້າວ ພຸດສະຫວັນ ສາລະພາບວ່າ: ໄດ້ເລີ່ມພົວພັນເສບຢາເສບຕິດມາແຕ່ຕົ້ນປີ 2015 ເສບມື້ລະ 3 ເມັດ ຢາບ້າທີ່ນຳມາເສບແມ່ນໄດ້ຊື້ນຳພັກພວກທີ່ຂາຍຢູ່ຕາມຮ້ານເກມເຂດບ້ານໂນນຄໍ້ ແລະ ຮ້ານເກມເຂດບ້ານທາດຫຼວງ, ຈາກນັ້ນ ມາໃນວັນທີ 30 ພະຈິກ ໄດ້ເລີ່ມເຄື່ອນໄຫວຊື້-ຂາຍຢາບ້າ; ໃນເບື້ອງຕົ້ນ, ໄດ້ເອົາຢາບ້ານຳ ທ້າວ ວຽງສາຄອນ ຫຼື ໂບ້ ຄັ້ງລະ 1 ຖົງ ເທົ່າກັບ 200 ເມັດ ໄປຂາຍໃຫ້ໄວລຸ້ນທີ່ມົ້ວສຸມຢູ່ຕາມຮ້ານເກມເຂດບ້ານໂນນສະຫວ່າງ ແລະ ເສບເອງຈຳນວນໜຶ່ງ, ຜ່ານມາເຄີຍຊື້ຢາບ້ານຳ ທ້າວ ໂບ້ ມາແລ້ວ 4 ຄັ້ງ ແລະ ຄັ້ງສຸດທ້າຍນີ້ ໃນວັນທີ 5 ພະຈິກ 2018 ໄດ້ຕິດຕໍ່ຫາ ທ້າວ ໂບ້ ເພື່ອຊື້ຢາບ້າຈຳນວນ 1 ຖົງ ເມື່ອໄປເອົາຢາບ້າມາແລ້ວ ກໍນຳໄປຂາຍໃຫ້ໄວລຸ້ນຕາມເຄີຍ ຍັງເຫຼືອຢາບ້າຈຳນວນ 33 ເມັດ ແລ້ວຖືກເຈົ້າໜ້າທີ່ກັກຕົວໃນເວລາຕໍ່ມາ.

ທ້າວ ວຽງສາຄອນ ໃຫ້ການວ່າ: ເລີ່ມເສບຢາບ້າມາແຕ່ປີ 2010, ຢາບ້າແມ່ນຊື້ນຳໄວລຸ້ນຢູ່ຕາມຮ້ານເກມ ຄັ້ງລະ 2-3 ເມັດ ຈາກນັ້ນ ໄດ້ຮູ້ຈັກກັບ ທ້າວ ບີ້ ອາຍຸ 17 ປີ ບໍ່ຮູ້ບ່ອນຢູ່ ທີ່ທ່ຽວໄປ ຫຼິ້ນເກມຢູ່ຮ້ານເກມເຂດບ້ານໂນນສະຫວ່າງ ແລ້ວ ທ້າວ ບີ້ ໄດ້ແນະນຳໃຫ້ຕິດຕໍ່ຊື້-ຂາຍຢາບ້ານໍາ ນາງ ນູເຮີ ພ້ອມທັງເອົາເບີໂທລະສັບໄວ້ໃຫ້, ອີກ 3 ວັນ ກໍຕິດຕໍ່ຫາ ນາງ ນູເຮີ, ຈາກນັ້ນ ນາງ ນູເຮີ ໄດ້ຖາມວ່າຈະຊື້ເທົ່າໃດ ຕົນຈຶ່ງສະເໜີຊື້ ຈໍານວນ 1 ມັດ ເທົ່າກັບ 2.000 ເມັດ ໂດຍນັດຈຸດຊື້- ຂາຍຢູ່ເຂດບ້ານໂຊກຄຳ ເມືອງໄຊເສດຖາ ເມື່ອໄດ້ຢາບ້າມາແລ້ວ ກໍນຳໄປຂາຍ ໃຫ້ກັບພັກພວກ ແລະ ໄວລຸ້ນຢູ່ຕາມຮ້ານເກມ ແລະ ຂາຍໃຫ້ກັບ ທ້າວ ພຸດສະຫວັນ; ຜ່ານມາເຄີຍຊື້ຢາບ້ານຳ ນາງ ນູເຮີ ມາແລ້ວຫຼາຍຄັ້ງ. ສ່ວນ ນາງ ນູເຮີ ສາລະພາບວ່າ: ໃນເດືອນຕຸລາ 2018 ໄດ້ຮູ້ຈັກກັບ ທ້າວ ໂນດ ອາຍຸປະມານ 27 ປີ ບໍ່ຮູ້ບ່ອນຢູ່ ຜ່ານທາງເຟດບຸກ ແລະ ຕິດຕາມກັບລົມເລື່ອງຄ້າຂາຍຢາເສບຕິດ ເມື່ອລົມກັນແລ້ວໄດ້ສັ່ງຊື້ຢາບ້ານຳ ທ້າວ ໂນດ. ນອກນີ້, ຍັງໄດ້ເອົາຢາບ້ານຳ ທ້າວ ກົງຢ່າງ (ແຟນ) ຈຳນວນ 1-3 ເມັດ.

ສ່ວນ ທ້າວ ກົງຢ່າງ ສາລະພາບ ວ່າ: ໃນເດືອນສິງຫາ 2018 ໝູ່ໄດ້ເອົາເບີໂທລະສັບຜູ້ຄ້າຂາຍຢາເສບຕິດຢູ່ແຂວງບໍ່ແກ້ວໃຫ້ ເມື່ອຕິດຕໍ່ຊື້-ຂາຍຢາບ້າ ພ້ອມທັງນັດຈຸດຊື້-ຂາຍຢູ່ເຂດເສັ້ນ ທາງໃຫຍ່ເຂດແຂວງອຸດົມໄຊ ຊື້ຄັ້ງທຳ ອິດ 1 ມັດ ແລະ ຊື້ມາແລ້ວຫຼາຍຄັ້ງ ຢາບ້າແມ່ນໄປນຳໄປຂາຍໃຫ້ກັບໄວລຸ້ນທີ່ສັ່ງຊື້ ແລະ ຂາຍໃຫ້ແຟນ ມາວັນທີ 5 ພະຈິກ 2018 ແຟນໄດ້ໂທລະສັບມາຫາບອກວ່າມີລູກຄ້າຢູ່ເຂດບ້ານວັງຊາຍ ຕ້ອງການຢາບ້າ ຈຳນວນ 3 ມັດ ຕົນຈຶ່ງນຳເອົາຢາບ້າໄປຫາແຟນ ແລະ ພາກັນໄປສົ່ງຢາບ້າໃຫ້ກັບຜູ້ສັ່ງຊື້ ຈຶ່ງຖືກເຈົ້າໜ້າທີ່ກັກຕົວ.

ຂອບໃຈຂໍ້ມູນຈາກ: ຫນັງສືພິມຄວາມສະຫງົບ

Leave a Reply

This site uses Akismet to reduce spam. Learn how your comment data is processed.