ໃນວັນທີ 25 ທັນວາ ນີ້, ທ່ານ ເຈົ້າຄອງ ນະຄອນຫລວງວຽງຈັນ ໄດ້ຂຶ້ນລາຍງານກ່ຽວກັບແຜນພັດທະນາເສດຖະກິດ-ສັງຄົມ ໃນປີ 2018 ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນ ນະຄອນຫລວງວຽງຈັນ ໃຫ້ຮູ້ວ່າ: ນະຄອນຫລວງວຽງຈັນ ຍັງເປັນອີກບ່ອນໜຶ່ງທີ່ມີການລົງທຶນຄຶກຄື້ນ, ມີຕົວເລກອະນຸມັດການລົງທຶນ ບັນລຸເຖິງ 18.000 ຕື້ກີບ, ເຮັດໃຫ້ GDP ເຕີບໂຕສະເລ່ຍ 9,3% ສະເລ່ຍລາຍຮັບຫົວຄົນບັນລຸ 5.300 ກ່ວາໂດລາສະຫະລັດ, ພົ້ນເດັ່ນແມ່ນຂະແຫນງອຸດສາຫະກຳ, ການຄ້າ ແລະ ການລົງທຶນໄດ້ມີການເຕີບໃຫຍ່ຂະຫາຍຕົວ ແລະ ການຈັດເກັບລາຍຮັບເຂົ້າງົບປະມານ ບັນລຸຄາດໝາຍ ຂອງແຜນການປີ 1.222 ກ່ວາຕື້ກີບ. ໃນນັ້ນ ບັນດາຂະແຫນງການຜະລິດ ແລະ ຫົວໜ່ວຍທຸລະກິດເຖິງວ່າຈະປະເຊີນກັບຜົນກະທົບຈາກໄພທຳມະຊາດ, ຈຳນວນໜຶ່ງຢຸດຈຶ້ງແຕ່ສ່ວນໃຫຍ່ກໍຄົງຕົວຢູ່ໄດ້ ແລະ ມີຫລາຍຫົວໜ່ວຍເກີດຂຶ້ນໃໝ່ ເຊິ່ງ ເປັນທ່າແຮງປະກອບສ່ວນເຂົ້າໃນການພັດທະນາເສດຖະກິດຂອງ ນະຄອນຫລວງວຽງຈັນ, ພິເສດ ພວກເຮົາໄດ້ເອົາໃຈໃສ່ຟຶ້ນຟູກະສິກຳ, ສ້ອມແປງເສັ້ນທາງພາຍຫລັງນ້ຳຖ້ວມຢູ່ຫລາຍເມືອງ, ໄດ້ເຂົ້າຮ່ວມຈັດຕັ້ງປະຕິບັດໂຄງການໃຫຍ່ລະດັບຊາດຄື: ໂຄງການທາງລົດໄຟ, ໂຄງການກໍ່ສ້າງເສັ້ນທາງ ແລະ ປ້ອງກັນຕາຝັ່ງເຈື່ອນວຽງຈັນຕອນໃຕ້ສຳເລັດໂດຍພຶ້ນຖານ, ໂຄງການທາງດ່ວນວຽງຈັນ-ວັງວຽງ, ແລະ ອື່ນໆ, ອັນເປັນທ່າແຮງ ພຶ້ນຖານໃນການພັດທະນາເສດຖະກິດ ຢູ່ ນະຄອນຫລວງວຽງຈັນ

ທ່ານ ​ເຈົ້າ​ຄອງ ນະຄອນຫລວງ​ວຽງຈັນ ​ໃຫ້​ຮູ້​ວ່າ: ​ໃນ​ປີ 2019, ​ໄດ້​ມີ​ການວາງ​ແຜນ​ພັດທະນາ​ເສດຖະກິດ​ຢ່າງ​ມີ​ຈຸດ​ສຸມ ​ແລະ ​ເປັນ​ອີກ​ປີໜຶ່ງ​ໃຫ້​ມີ​ການ​ລົງທຶນ​ຢ່າງ​ຄຶກຄຶ້ນ, ພ້ອມ​ທັງ​ວາງ​ຄາດໝາຍ GDP ​ເຕີບ​ໂຕ 9,5% ​ໃນ​ນັ້ນກະສິກຳ​ໃຫ້ ເພີ່ມ​ຂຶນ 4,2%, ອຸດສາຫະກຳ 12,5%, ການ​ບໍລິການ​ໃຫ້​ເພີ່ມ​ຂຶ້ນ 9,5%, ​ດັ່ງ​ນັ້ນ ຮຽກຮ້ອງ​​ໃຫ້​ບັນດາ​ຂະ​ແຫນງ​ເສດຖະກິດ, ກະສິກຳ​ປ່າ​ໄມ້, ອຸດສາຫະກຳ-ການ​ຄ້າ, ພະລັງງານ ​ແລະ ບໍ່​ແຮ່, ​ໂຍທາ​ທິການ ​ແລະ ຂົນ​ສົ່ງ, ຕ້ອງ​ເຮັດ​ສຳ​ເລັດ​ຄາດໝາຍ​ແຜນການ​ຂອງ​ຕົນຍົກ​ສູງ​ສະຖານະ​ການ​ເງີ​ນ, ການ​ຈັດ​ເກັບ​ລາຍ​ຮັບ​ເຂົ້າ​ງົບປະມານ ​ໃຫ້​ບັນລຸ 4.800 ຕື້ກີບ ​ແລະ ​ແຕ່​ລະ​ຫົວໜ່ວຍວິ​ສາ​ຫະກິດ, ​ແຕ່ລະ​ຄອບຄົວ​ຕ້ອງ​ຫັນໜ້າ​ເຂົ້າ​ສູ່​ການ​ຜະລິດ, ການ​ບໍລິການ ​ເຮັດ​ໃຫ້​ລາຍ​ຮັບ​ຂອງ​ຕົນ​ເພີ່ມ​ຂຶ້ນຢ່າງ​ບໍ່ຢຸດ​ຢັ້ງ.

ຂອບໃຈຂໍ້ມູນຈາກ : ຫນັງສືພິມລາວພັດທະນາ

Leave a Reply

This site uses Akismet to reduce spam. Learn how your comment data is processed.