Anniversary 8ປີ 🎊 ໃຜຊິໄປຄິດເນາະວ່າຊີວິດທຳມະດາຂອງເດັກນ້ອຍ 2 ຄົນໃນມື້ນັ້ນຊິມາມີມື້ນີ້ໄດ້ ຊິຂໍແຊປະສົບການໃຫ້ຟັງ ຕອນນັ້ນຕິນ່າກະເປັນເດັກນ້ອຍທຳມະດາໃນຄອບຄົວຄ້າຂາຍຂໍເງິນພໍ່ແມ່ໃຊ້ຄືເດັກນ້ອຍຫລາຍຫລາຍຄົນ

ມື້ຫນຶ່ງໂຊກຊະຕາກະໄດ້ພາໃຫ້ມາລົມກັບນາຍຊ່າງປະດັບຍົນທີເປັນເດັກນ້ອຍຕ່າງແຂວງໃຊ້ຊີວິດຢູ່ນຳເອື້ອຍບໍ່ມີບ້ານບໍ່ມີລົດບໍ່ມີຊັບສົມບັດຫຍັງ ເຮົາ 2 ຄົນຄົບກັນໄດ້ 2 ມື້ ດ້ວຍຄວາມທີ່ຫມໍດູບອກວ່າຜູ້ຊາຍຄົນນີ້ເປັນເນື້ອຄູ່ເຮົາກະເລີຍເຊື່ອ ແລະ ກະມາຖາມເສີດວ່າຊິລົມເຮົາແບບໃດຊິຄົບໄປເລື້ອຍໆ ຫລື ຕັ້ງໃຈວ່າຊິມາແຕ່ງເອົາເຮົາເປັນເມຍ ເພາະຖ້າລາວຈິງຈັງເຮົາກະຈະໄປຕໍ່ ແຕ່ຖ້າລາວບໍ່ຈິງຈັງເຮົາກະບໍ່ຢາກເສຍເວລາ ລາວໄປຄິດ 2ອາທິດ“ໂຊກດີທີ່ລາວຕອບວ່າຄິດດີແລ້ວວ່າຊິຕັ້ງໃຈລົມລະຊິມາແຕ່ງເອົາເຮົາແຕ່ຂໍເວລາ 2 ປີໄດ້ບໍ່ເພາະຕອນນັ້ນລາວບໍ່ມີເງິນ“

ເຮົາກະໂອເຄ ລະກະຕັດສິນໃຈສິສ້າງຊີວິດຮ່ວມກັນຕອນນັ້ນຕິນ່າກະຕັດສິນໃຈບໍ່ເອົາເງິນນຳແມ່ເພາະຢ້ານແມ່ສິບໍ່ໃຫ້ຄົບກັບເສີດ ເລິຍໄປຊອກວຽກເຮັດພໍດີຕອນນັ້ນຮຽນຈົບປະລິນຍາຕີ ແລະ ແມ່ກະສົ່ງເງິນກ້ອນສຸດທ້າຍໃຫ້ຮຽນປະລິນຍາໂທ ແລະ ໄດ້ເປັນພະນັກງານເງິນເດືອນເລີ້ມຕົ້ນຕິນ່າ ລ້ານປາຍກີບ ສ່ວນເສີດ ເງິນເດືອນ 500.000ກີບ ຕິນ່າເປັນຄົນເກັບ ແລະ ບໍລິຫານເງິນ ເຮົາ 2 ຄົນ ເອົາເງິນ 500.000ກີບ ຂອງເສີດໃສ່ຫວຍ ແລະ ເງິນເດືອນຕິນ່າ ເປັນເງິນເອົາມາໃຊ້ຈ່າຍ

ສ່ວນເງິນພິເສດອື່ນໆ ຫລື ເງິນເສີດແມ່ນເປັນເງິນເກັບ ແລະ ເຮົາ 2 ຄົນກະເຮັດວຽກທຸກຢ່າງທີ່ຈະໄດ້ເງິນເພີ່ມທັງໄປຕິດຟີມລົດໃຫ້ລູກຄ້າຮອດບ້ານ ບໍ່ວ່າຊິເດິກ ຝົນຊິຕົກ ຟ້າຊິຮ້ອງ ແດດຊິອອກ ຫລື ຫານັ້ນນີ້ມາຂາຍເສີມ ເຮົາມີລົດເວບຈີນເກົ່າເກົ່າ 1 ຄັນ ເເລະ ກະຊື້ຄຳທ້ອນໄວ້ເທື່ອລະ 5ຫຸນ ເຮົາຈະບໍ່ເອົາເງິນໃນອານາຄົດມາໃຊ້ ແຕ່ເຮົາຈະໃຊ້ເງິນຈ່າຍສິ່ງທີ່ຕ້ອງຈ່າຍໃນອານາຄົດເພື່ອແບ່ງເບົາພາລະໃນອານາຄົດ ເຊັ່ນ ຄ່ານັ້ນນີ້ທີ່ເຮົາຕ້ອງຈ່າຍເຮົາກໍ່ຈະຈ່າຍໄວເລິຍ ຄືຄາຫວຍ ຄ່າໂທລະສັບ ອາຫານແຫ້ງທີ່ເຮົາຕ້ອງຊື້ ແລະ ພະຍາຍາມບໍ່ສ້າງຫນີ້

ເວລາກິນກະປະຢັດເອົາຄືເສີດກະກິນງ່າຍຊື່ປີ້ຫົວໃຈ 3000ກີບ ເຂົ້າ 2000ກີບ ກະອີ່ມແລ້ວ ແຕ່ເຮົາກະບໍ່ໄດ້ລຳບາກດົນດົນກະໄປກິນເຂົ້ານອກບ້ານແບບຊີ້ນດາດ ຫລື ຮ້ານອາຫານເທື່ອ 1 ໄປຮ້ານເບຍນຳຫມູ່ກະກິນເຕັມທີ່ ແຕ່ຢາມທີ່ມີເງິນເຮົາກະຄ່ອຍໄປ ຍາມບໍ່ມີກະຊື້ເບຍ 2ແກ້ວ ນຳ້ກ້ອນ 1000ກີບ ຂະຫນົມຂ້ຽບກຸ້ງ 2 ຖົງມາແກ້ມ ຊຳນັ້ນກະພໍແລ້ວ ເຮົາເຮັດແບບນັ້ນມາ 2ປີ ມີເງິນ 100.000.000ກີບ ຄຳ 6 ບາດ ລົດເວບໄທ 1 ຄັນ ເຮັດໃຫ້ຄອບຄົວສາມາດຍອມຮັບໃນຄວາມຕັ້ງໃຈຂອງເຮົາສອງຄົນໄດ້ ລະກະມາເຮັດດອງ ທຸກມື້ນີ້ເຮົາ 2 ຄົນ ກະຖືວ່າມາໄກຈາກແຕ່ກີ້ຫລາຍ ເຮົາມີທຸລະກິດເປັນຂອງໂຕເອງ ຕິນ່າໄດ້ຮັບໂອກາດທີ່ດີເປັນຕົວແທນນຳເຂົ້າເຄື່ອງສຳອາງຂອງ Cental clinic ເສີດມີຮ້ານປະດັບຍົນ ຕິດຟີມລົດ ນ້ອຍນ້ອຍ ມີທຸລະກິດຂອງໂທເອງ ອາດຈະບໍ່ລຳ້ລວຍຫລາຍ ແຕ່ເຮົາກະມີຄວາມສຸກ ເພາະມີຫມູ່ຄູ່ ເອື້ອຍອ້າຍຮັກ ພີ່ນ້ອງ ຄົນຮູ້ຈັກມາອຸດຫນູນຕະຫລອດບໍ່ຖິ້ມບໍ່ປະເຮົາ ມີຄອບຄົວໃຫຍ່ຄ່ອຍຊ່ອຍເຫລືອຍາມລຳບາກ ຂໍຝາກເຖິງຄົນທີ່ກຳລັງສ້າງເນື້ອສ້າງໂຕຢ່າທໍ້ແທ້ເພາະຖ້າເຮົາດຸຫມັ້ນເຮົາກະສາມາດມີເງິນໄດ້ ຄືເຮົາ 2 ຄົນ ກະໃຊ້ເວລາ ແນວເຮົາບໍ່ໄດ້ເກີດມາມີທຸກຢ່າງ ຢາກໄດ້ຫຍັງເຮົາກໍຕ້ອງເຮັດຕ້ອງຫາເອົາ ເຮົາດຸຫມັ້ນເຮົາກໍຈະບໍ່ລຳບາກ 😊

ໄດ້ອ່ານແລ້ວຮູ້ເລີຍວ່າຮັກແທ້ຍັງມີໃນໂລກ ແລະ ຍັງສາມາດເອົາຊະນະເງິນຄຳໄດ້ ຖ້າໃຈທັງສອງສູ້ຊົນໄປນຳກັນ ແລະ ໃຫ້ໂອກາດກັນ ອົດທົນຜ່ານຜ່າອຸປະສັກໄປນຳກັນໄດ້ ຂໍໃຫ້ທັງສອງຄອງຮັກຈົນເຖົ້າແກ່ ແລະ ມີຄວາມສຸກ

ໃຜທີ່ມີຮັກແທ້ກໍ່ຈົ່ງເບິ່ງແຍງດູແລກັນໃຫ້ດີເດີ້ ບາງຄົນຊອກແທ້ຊອກວ່າກະຍັງບໍ່ເຫັນແຕ່ບາງຄົນມີຢູ່ກັບຕົວແຕ່ບໍ່ເຫັນຄຸນຄ່າກໍ່ມີ.

ຂອບໃຈຂໍ້ມູນຈາກ:  Tina Vadsana Chanthalungsy

Advertisements

Leave a Reply

This site uses Akismet to reduce spam. Learn how your comment data is processed.