ຂປລ. ວັນທີ 11 ພະຈິກ 2018 ນີ້, ຢູ່ ຫໍສະພາແຫ່ງຊາດ, ສະຫາຍ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການພົບປະຢ້ຽມຢາມ ຂອງ ສະຫາຍ ມີເກັນ ດີເອັດ-ກາແນນ ແບຣມູເດັດ ປະທານສະພາແຫ່ງລັດ, ປະທານສະພາລັດຖະມົນຕີ ແຫ່ງ ສາທາລະນະລັດ ກູບາ ພ້ອມຄະນະ ໃນໂອກາດ ເດີນທາງມາຢ້ຽມຢາມ ລັດຖະກິດ ສາທາລະນະລັດ ປະຊາທິປະໄຕ ປະຊາຊົນລາວ.

ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງມາຢ້ຽມຢາມ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນສໍາຄັນ ເຂົ້າໃນການຮັດແໜ້ນສາຍພົວພັນມິດຕະພາບ, ຄວາມສາມັກຄີຖານອ້າຍນ້ອງ ແລະ ການຮ່ວມມືຮອບດ້ານ ລະຫວ່າງ ສອງປະເທດ ກໍຄື ປະຊາຊົນສອງຊາດ ລາວ-ກູບາ ທີ່ມີມາດົນນານນັ້ນ ໃຫ້ນັບມື້ນັບໄດ້ຮັບການເພີ່ມພູນຄູນສ້າງ ແລະ ພັດທະນາໄປສູ່ບາດກ້າວໃໝ່ເພື່ອຜົນປະໂຫຍດລວມຂອງທັງສອງປະເທດ ເວົ້າລວມ, ເວົ້າສະເພາະ ແມ່ນຂົງເຂດວຽກງານສະພາແຫ່ງຊາດລາວ ແລະ ສະພາແຫ່ງລັດ ກູບາ.

ການພົບປະຄັ້ງນີ້, ສອງຝ່າຍຕ່າງກໍໄດ້ແຈ້ງໃຫ້ກັນຊາບ ກ່ຽວກັບ ສະພາບການທີ່ພົ້ນເດັ່ນຂອງສອງປະເທດ, ໄດ້ຕີລາຄາກ່ຽວກັບການຮ່ວມມືໃນໄລຍະຜ່ານມາ ແລະ ປຶກສາຫາລືທິດທາງການຮ່ວມມືໃນຕໍ່ໜ້າ ລະຫວ່າງ ສອງປະເທດ ແລະ ໄດ້ແລກປ່ຽນຄຳຄິດຄຳເຫັນທີ່ສອງຝ່າຍມີຄວາມສົນໃຈຮ່ວມກັນ.

Advertisements

Leave a Reply

This site uses Akismet to reduce spam. Learn how your comment data is processed.