ພິທີເປີດການນໍາໃຊ້ເສັ້ນທາງເບຕົງ ບ້ານເທດສະບານ ເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້ນໃນວັນທີ 25 ກັນຍາ 2018 ນີ້, ຢູ່ທີ່ວັດຈອມແຈ້ງ. ໂດຍການເປັນກຽດເຂົ້າຮ່ວມຂອງ

ທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ, ທ່ານ ພົນຈັດຕະວາ ຄຳສາຍ ຈັນທະວົງ ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ກະຊວງປ້ອງກັນຄວາມສະຫງົບ, ທ່ານ ສໍາລານ ສຸວັນນະໂຊດ ເຈົ້້າເມືອງໆແກ່ນທ້າວ, ບັນດາທ່ານເຈົ້າເມືອງ, ຮອງເຈົ້າເມືອງ 11 ເມືອງພາຍໃນແຂວງ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 7, ຫົວໜ້າ, ຮອງຫົວໜ້າພະແນກການຂອງແຂວງ, ສະມາຊິກສະພາປະຊາຊົນຂັ້ນແຂວງ ປະຈໍາເມືອງ, ຫົວໜ້າ, ຮອງຫົວໜ້າຫ້ອງການ, ກົມກອງ, ອົງການຈັດຕັ້ງ, ພະນັກງານຫຼັກແຫຼ່ງ, ພະນັກງານອາວຸໂສບໍານານ, ນາຍທະຫານ, ນາຍຕຳຫຼວດ, ນັກທຸລະກິດຜູ້ປະກອບການ ແລະ ນາຍບ້ານ ພ້ອມດ້ວຍພໍ່ແມ່ປະຊາຊົນ ພາຍໃນບ້ານເທດສະບານເມືອງເຂົາຮ່ວມຢ່າງຫຼວງຫຼາຍ.

ໃນພິທີ ທ່ານ ສໍາລານ ສຸວັນນະໂຊດ ເຈົ້້າເມືອງແກ່ນທ້າວ ໄດ້ລາຍງານຫຍໍ້ ກ່ຽວກັບການຈັດຕັ້ງປະຕິບັດໂຄງການກໍ່ສ້າງທາງເບຕົງ ບ້ານເທດສະບານຈຳນວນ 5 ບ້ານຄື: ບ້ານຈອມເພັດ ຈໍານວນ 1 ເສັ້ນ ( ທາງຮ່ອມທີ 2 ) ລວງຍາວ 102 ແມັດ, ລວງກວ້າງ 4,50 ແມັດ, ໜາ 15 ຊັງຕີແມັດ, ເປັນທາງເບຕົງເສີມເຫຼັກເບົາ ມີມູນຄ່າການກໍ່ສ້າງທັງໝົດ 56.406.000 ກີບ, ເຊິ່ງການປະກອບສ່ວນຂອງປະຊາຊົນພາຍໃນບ້ານນັ້ນ ຄອບຄົວໜຶ່ງ 250.000 ກີບ ແລະ ນັກທຸລະກິດຜູ້ປະກອບການຢູ່ພາຍໃນບ້ານ 8.406.000 ກີບ, ທາງຊອຍບ້ານເມືອງເກົ່າ: ຈໍານວນ 4 ເສັ້ນ ( ທາງຮ່ອມ 2, ຮ່ອມ 4, ຮ່ອມ 6 ແລະ ແຕ່ສາມແຍກຮ່ອມ 1 ຫາ ຮ່ອມ 2 ) ລວງຍາວ 455 ແມັດ, ລວງກວ້າງ 4,50 ແມັດ, ໜາ 15 ຊັງຕີແມັດ, ເປັນທາງເບຕົງເສີມໄມ້ໄຜ່ ລວມມີມູນຄ່າການກໍ່ສ້າງທັງໝົດ 213.161.000 ກີບ, ໃນນີ້ເປັນທຶນປະກອບສ່ວນຂອງປະຊາຊົນພາຍໃນບ້ານ ຄອບຄົວໜຶ່ງ 275.000 ກີບ ແລະ ນັກທຸລະກິດ ຜູ້ປະກອບການ 130.701.000 ກີບ

ໃນນັ້ນ ບໍລິສັດ ສີຈະເລີນ ກໍ່ສ້າງຂົວ-ທາງ ປະກອບສ່ວນ ມູນຄ່າ 17.500.000 ກີບ, ທາງຊອຍບ້ານພວນ: ຈໍານວນ 1 ເສັ້ນ ( ທາງຮ່ອມ 4 ) ລວງຍາວ 82 ແມັດ, ລວງກວ້າງ 4,50 ແມັດ, ໜາ 15 ຊັງຕີແມັດ, ເປັນທາງເບຕົງເສີມໄມ້ໄຜ່ ລວມມີມູນຄ່າການກໍ່ສ້າງ 35.215.000 ກີບ, ໃນນີ້, ເປັນການປະກອບສ່ວນຂອງປະຊາຊົນພາຍໃນບ້ານ ຄອບຄົວໜຶ່ງ 165.000 ກີບ ແລະ ນັກທຸລະກິດ ຜູ້ປະກອບການພາຍໃນບ້ານ 11.950.000 ກີບ, ທາງຊອຍບ້ານນາບອນ: ຈໍານວນ 1 ເສັ້ນ ( ແຕ່ສາມແຍກວັດ ຫາ ຂົວເບເລຫ້ວຍນໍ້າຕໍາ ) ລວງຍາວ 520 ແມັດ, ລວງກວ້າງ 5 ແມັດ, ໜາ 15 ຊັງຕີແມັດ, ເປັນທາງເບຕົງເສີມໄມ້ໄຜ່ ລວມມີມູນຄ່າການກໍ່ສ້າງ 198.434.000 ກີບ, ໃນນີ້, ເປັນການປະກອບສ່ວນຂອງປະຊາຊົນ ພາຍໃນບ້ານ ຄອບຄົວໜຶ່ງ 500.000 ກີບ ແລະ ນັກທຸລະກິດຜູ້ປະກອບການພາຍໃນບ້ານ 8.934.000 ກີບ, ທາງຊອຍບ້ານເມືອງໝໍ: ຈໍານວນ 1 ເສັ້ນ ( ແຕ່ສາມແຍກ ຫາ ວັດບ້ານເມືອງໝໍ ) ລວງຍາວ 300 ແມັດ, ລວງກວ້າງ 6 ແມັດ, ໜາ 15 ຊັງຕີແມັດ, ເປັນທາງເບຕົງເສີມເຫຼັກເບົາ ລວມມີມູນຄ່າການກໍ່ສ້າງ 240.975.000 ກີບ,

ໃນນີ້, ເປັນການປະກອບສ່ວນຂອງປະຊາຊົນ ພາຍໃນບ້ານ ຄອບຄົວໜຶ່ງ 550.000 ກີບ ແລະ ນັກທຸລະກິດຜູ້ປະກອບການພາຍໃນບ້ານ 2.275.000 ກີບ.ນອກຈາກນີ້ແລ້ວ ກໍ່ໄດ້ສ້ອມແປງເສັ້ນທາງຊອຍ ( ທາງປູດິນຫີນ ) ພາຍໃນບ້ານເທດ ສະບານ ແລະ ບ້ານຢູ່ເຂດຫ່າງໄກອີກຈໍານວນ 6 ບ້ານ ລວມມູນຄ່າ 981.887.800 ກີບ, ເຊິ່ງເປັນການປະກອບສ່ວນຂອງປະຊາຊົນ 446.460.000 ກີບ ແລະ ນັກທຸລະກິດຜູ້ປະກອບການ 535.427.800 ກີບ. ພ້ອມກັນນີ້, ຍັງໄດ້ຂຶ້ນແຜນເພື່ອສືບຕໍ່ໂຄງການກໍ່ສ້າງທາງຊອຍບ້ານເທດສະບານເມືອງປີ 2018-2019 ນີ້ ຈໍານວນ 3 ໂຄງການ, ມູນຄ່າ 270.894.000 ກີບ.

ໃນພິທີຄັ້ງນີ້, ຍັງໄດ້ຮັບຟັງການໂອ້ລົມຂອງທ່ານ ເພັງນິລັນ ຄຳພັນເພັງ ຮອງເຈົ້າແຂວງໄຊຍະບູລີ ເຊິ່ງທ່ານໄດ້ ຮຽກຮ້ອງ ໃຫ້ຄະນະພັກເມືອງ, ອົງການປົກຄອງເມືອງ, ອົງການປົກຄອງທ້ອງຖິ່ນຂັ້ນບ້ານ ຈົ່ງໄດ້ສືບຕໍ່ ຊີ້ນໍາໆພາ ພໍ່ແມ່ປະຊາຊົນ ໃນການສ້າງເສດຖະກິດຄອບຄົວ ຕິດພັນກັບການມີສ່ວນຮ່ວມໃນການສ້າງສາພັດທະນາບ້ານເມືອງ ໃຫ້ນັບມື້ນັບເຂັ້ມແຂງ, ເປັນເຈົ້າການນໍາເອົາບັນດາແນວທາງແຜນນະໂຍບາຍຂອງພັກ-ລັດ, ບັນດາມະຕິ, ຄໍາສັ່ງ ແລະ ນິກໍາຕ່າງໆ ລົງໂຄສະນາເຜີຍແຜ່ ໃຫ້ພໍ່ແມ່ປະຊາຊົນ ໄດ້ເຊື່ອມຊຶມຢ່າງເປັນປົກກະຕິ ແລະ ຕໍ່ເນື່ອງ ທັງນີ້ແມ່ນເພື່ອສ້າງໃຫ້ໄດ້ແນວຄິດການເມືອງທີ່ໜັກແໜ້ນ, ສ້າງໄດ້ນໍ້າໃຈເສຍສະຫຼະເພື່ອສ່ວນລວມ ແລະ ພ້ອມກັນເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງຢ່າງໜັກແໜ້ນ,ພໍ່ແມ່ປະຊາຊົນຕ້ອງໃຫ້ຄວາມເຄົາລົບ, ຄວາມສາມັກຄີຮັກແພງ ແລະ ຊຸກຍູ້ ການຈັດຕັ້ງພັກ-ລັດ, ເຊິ່ງເປັນຜູ້ນໍາພາ, ໃຫ້ຄິດສະເໝີວ່າ, ເຮົາຜູ້ດຽວເຮັດຫຍັງຈະບໍ່ສໍາເລັດໄດ້ ຖ້າບໍ່ມີທີມ ຫຼື ບໍ່ມີການຊີ້ນໍາໆພາ ແລະ ຮ່ວມແຮງຮ່ວມໃຈກັນຂອງຫຼາຍຄົນ,

ດັ່ງນັ້ນ, ເມື່ອເຮົາເຮັດໄດ້ແລ້ວ ກໍ່ຕ້ອງຮັກສາໄວ້ໃຫ້ດີ ໂດຍສະເພາະແມ່ນຜົນງານໂຄງການກໍ່ສ້າງທາງເບຕົງບ້ານຂອງພວກທ່ານທີ່ເຮັດໄດ້ ແລະ ໄດ້ເປີດນໍາໃຊ້ເປັນທາງການແລ້ວ ຂໍໃຫ້ບັນດາທ່ານຜູ້ຊົມໃຊ້ ຈົ່ງໄດ້ເປັນເຈົ້າການປົກປັກຮັກສາໃຫ້ດີ, ເອົາໃຈໃສ່ບົວລະບັດຮັກສາຄວາມສະອາດ, ຄວາມເປັນລະບຽບຮຽບຮ້ອຍ, ເມື່ອມີການເປ່ເພ ກໍ່ຕ້ອງປັບປຸງສ້ອມແປງ, ເຮັດໃຫ້ເສັ້ນທາງດັ່ງກ່າວຊົມໃຊ້ຍາວນານ ໄປຊົ່ວເຊັນລູກເຊັນຫຼານ. ຮຽກຮ້ອງໃຫ້ອົງການປົກຄອງເມືອງ, ຂະແໜງການທີ່ກ່ຽວຂ້ອງ ສືບຕໍ່ຂຶ້ນແຜນການໂຄງການກໍ່ສ້າງເສັ້ນທາງບ່ອນທີ່ມີເງື່ອນໄຂຢູ່ບ້ານອື່ນໆຕື່ມ, ພ້ອມທັງເປັນເຈົ້າການອອກແບບຄິດໄລ່, ເອື້ອອໍານວຍຄວາມສະດວກ ແລະ ຕິດຕາມກວດກາການຈັດຕັ້ງປະຕິບັດ ໃຫ້ເກີດຜົນເປັນຈິງ ເຮັດໃຫ້ເທດສະບານເມືອງແກ່ນທ້າວ ມີທາງເບຕົງໝົດທຸກໆເສັ້ນ ເປັນຕົວແບບເພື່ອຜັນຂະຫຍາຍໄປສູ່ບ້ານອື່ນໆໃນທົ່ວເມືອງ ແລະ ໃຫ້ເມືອງອື່ນໄດ້ເອົາເປັນແບບຢ່າງ.

ຈາກນັ້ນ ໄດ້ລັ່ນຄອງ 9 ບາດ ແລະ ຕັດແຖບຜ້າເພື່ອເປີດນໍາໃຊ້ເສັ້ນທາງເບຕົງເທດສະບານເມືອງແກ່ນທ້າວຢ່າງເປັນທາງການ.

LEAVE A REPLY

Please enter your comment!
Please enter your name here